ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް ގެނައި މޯލްޑިވަންގެ ފުރަތަމަ ވައިޑް ބޮޑީ މަތިންދާބޯޓުގެ ފުރަތަމަ ދަތުރުގައި ޗައިނާ އިން 172 ފަތުރުވެރިން މިއަދު ރާއްޖެ އަތުވެއްޖެއެވެ.

އޭއާބަސް 330-200 ގެ ބޯޓުގެ ފުރަތަމަ ދަތުރުގައި ޗައިނާގެ ކުރިއަރާފައިވާ ސިޓީއެއް ކަމަށްވާ ޗެންދޫ އަށް ދަތުރުކުރީ އަންގާރަ ދުވަހުގެ ރެއެވެ. އެ ފްލައިޓު އެނބުރި މާލެ އަކީ މިއަދު ފަތިހުއެވެ.

މޯލްޑިވިއަން އިން ވިދާޅުވި ގޮތުގައި 264 މީހުންގެ ޖާގައިގެ ބޯޓުގެ ފުރަތަމަ ދަތުރުގައި މާލެއިން ޗެންދޫއަށް 52 ދެމީހުން ދަތުރުކުރިއެވެ. އޭގެތެރެއިން 32 މީހުންނަކި ފަތުރުވެރިންނެވެ. މިއަދު އެ ފްލައިޓް އެނބުރި އައިއިރު 192 މީހުން ދަތުރުކުރިއެވެ. އޭގެ ތެރެއިން 172 މީހުންނަކީ ރާއްޖޭގައި ޗައިނީސް ނިއު އިޔާ ފާހަގަކުރުމަށް އައި ޗައިނާގެ ފަތުރުވެރިންނެވެ. މީގެ އިތުރުން، 10 ޓަނުގެ ކާގޯ އުފުލޭ ބޯޓުގައި ފުލްކޮށް މުދާވެސް ގެނައެވެ.

މޯލްޑިވިއަންގެ ފުރަތަމަ ފްލައިޓުގައި ޗެންދޫއިން އައި ފަތުރުވެރިންނަށް ވެލާނާ އިންޓަނޭޝަނަލް އެއަރޕޯޓުން ހޫނު މަރުހަބާއެއް ވަނީ ކިޔައިފައެވެ. ކޮންމެ ފަސިންޖަރަކަށް މަރުހަބާ ކިޔުމަށް ރަތް ފިނިފެން މަލެއް ވަނީ ހަދިޔާކޮށްފައެވެ. ދިވެހި ސަގާފީ ބޮޑުބެރާއި އެކު ބޭއްވި ރަސްމިއްޔާތުގައި، ފަތުރުވެރިކަމާއި ބެހޭ ވަޒީރު އިބްރާހީމް ފައިސަލް، އިޤްތިޞާދީ ތަރައްޤީ އާއި ވިޔަފާރި އާއި ބެހޭ ވަޒީރު މުޙައްމަދު ސަޢީދު އަދި ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުހައްމަދު އަމީން ވަނީ ބައިވެރިވެވަޑައިގެންނެވިއެވެ. އަދި މޯލްޑިވިއަންގެ ޚިދުމަތްދޭ އައިލެންޑް އޭވިއޭޝަން ސާވިސް (އައިއޭއެސް) އާއި މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ގެ އިސް ބޭފުޅުންވެސް މަރުހަބާ ކިޔުމަން ބޭއްވި ހަރަކާތުގައި ބައިވެރިވެ ވަޑައިގެންނެވިއެވެ. މޯލްޑިވިއަނުން ވަނީ މި ދަތުރުގެ ބައިވެއިންނަށް ސަޕްރައިޒް ހަދިޔާއްގެ ގޮތުގައި ގިފްޓް ޕެކެއް ވެސް ދީފައެވެ.

މޯލްޑިވިއަންގެ ދަތުރުތައް ޗައިނާގެ ތިން ސިޓީއަކަށް ވަނީ ޝެޑިއުލްކޮށްފައެވެ. ޗެންދޫގެ އިތުރުން މޯލްޑިވިއަންގެ ވައިޑް ބޮޑީ މަތިންދާބޯޓު ދަތުރުތައް ކުރާނީ ޗައިނާގެ ވެރިރަށް ބެއިޖިން އާއި ޝަންހާއީ އަށެވެ. ކޮންމެ ސިޓީ އަކަށް ވެސް ހަފުތާއަކު އެއް ދަތުރު ކުރާނެއެވެ. މި ދަތުރުތައް އޮންނާނީ ހޯމަ، ބުދަ އަދި ހުކުރު ދުވަހު އެވެ.  

މޯލްޑިވިއަނުން އަންދާޒާކުރާ ގޮތުގައި ވައިޑް ބޮޑީގެ ދަތުރުތައް ޗައިނާއަށް ޚާއްސަކޮށްފައިވާއިރު، އަހަރަކު 40،000 އަށްވުރެ ގިނަ ފަތުވެރިން އެ ގައުމުން ރާއްޖެ ގެނެވޭނެއެވެ. ޗައިނާގެ ފަތުރުވެރިންނަށް ރަނގަޅު ޚިދުމަތެއް ދިނުމަށްޓަކައި މި ދަތުރުތަކުގައި ޗައިނާ ބަސް ދަންނަ ކެބިން ކްރޫއިން ހަރަކާތްތެރިވެއެވެ.

ރާއްޖެ- ޗައިނާ މިނިވަން ވިޔަފާރީގެ އެއްބަސްވުމަށް މި މަހުގެ ފުރަތަމަ ދުވަހުން ފެށިގެން އަމަލުކުރަން ފަށާފައިވާއިރު، އާންމު ފަރާތްތަކާއި ވިޔާފާރިވެރިން ބޭނުންވާ މުދާ ގެނައުމަށް ވެސް މި ދަތުރުތަކުގެ ސަބަބުން ފަސޭހަވެގެންދާނެ އެވެ. 

ވައިޑް ބޮޑީގެ ދެވަނަ ދަތުރުގައި ރާއްޖެއިން ޗައިނާގެ ބެއިޖިންއަށް މަދަމާ ފުރާނެއެވެ.  ޗައިނާގެ ޝެންހާއީއަށް ފުރަތަމަ ދަތުރު ކުރާނީ މި މަހުގެ 27 ވަނަ ދުވަހުއެވެ.

މޯލްޑިވިއަނުން ޗެންދޫ އަށް ދެ ކޮޅު ޓިކެޓުގެ އަގަކީ 688 އެމެރިކާ ޑޮލަރަށެވެ.  ބެއިޖިންއަށް ދެ ކޮޅު ޓިކެޓުގެ އަގަކީ 788 އެމެރިކާ ޑޮލަރެވެ. އަދި ޝެންހާއީ ދެ ކޮޅު ޓިކެޓުގެ އަގަކީ 777 އެމެރިކާ ޑޮލަރެވެ.

މި އަހަރުގެ އޮކްޓުބަރު މަހު އޭ 330-200 ގެ ދަވަނަ ބޯޓެއް ގެނެސް ޔޫރަޕަށް ސީދާ ދަތުރުތައް ފަށަން މޯލްޑިވިއަނުން އަންނަނީ މަސައްކަތް ކުރައްވަމުންނެވެ.