ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް ވައިޑް-ބޮޑީ މަތިންދާބޯޓުގެ ދަތުރުތައް ފަށައިފިއެވެ.

ޤައުމީ އެއަރލައިން މޯލްޑިވިއަންގެ ވައިޑް-ބޮޑީ މަތިންދާބޯޓުން ޗައިނާއަށް ދަތުރުތައް ރަސްމީކޮށް ފެށީ ރެއެވެ. ފުރަތަމަ ދަތުރުކޮށްފައި ވަނީ ޗައިނާގެ ޗެންޑޫ ސިޓީއަށެވެ.

ފުރަތަމަ ދަތުރުގައި 52 ފަސިންޖަރުން ބައިވެރިވެފައިވާއިރު، އޭގެ ތެރެއިން 32 ފަސިންޖަރުންނަކީ ފަތުރުވެރިންނެވެ.

މޯލްޑިވިއަން އިން ވިދާޅުވީ ރާއްޖެއިން ޗައިނާގެ ތިން ސިޓީއަކަށް ހަފުތާއަކު 3 ދަތުރު ކުރުމަށް ހަމަޖެހިފައިވާ ކަމަށެވެ. އެއީ ޗައިނާގެ ޗެންޑޫ ސިޓީ، ޝެންހާއީ އަދި ބެއިޖިންގއެވެ. މި ދަތުރުތައް ކުރުމަށް ހަމަޖެހިފައިވަނީ ހޯމަ، ބުދަ އަދި ހުކުރު ދުވަހު އެވެ.

ވައިޑް-ބޮޑީ މަތިންދާބޯޓު މޯލްޑިވިއަންގެ ޚިދުމަތަށް ގެނައުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. މި ވަޢުދުފުޅު އިތުރަށް ފުރިހަމަކުރުމުގެ ގޮތުން، އަންނަ އޮކްޓޯބަރު މަހުގެ ތެރޭގައި އިތުރު ވައިޑް-ބޮޑީ މަތިންދާބޯޓެއް ރާއްޖެ ގެނެސް، ޔޫރަޕަށް ދަތުރުތައް ފެށުމަށް ޤައުމީ އެއަރލައިނުން އަންނަނީ ތައްޔާރުވަމުންނެވެ.

މި އާ ޚިދުމަތުގެ ސަބަބުން ދިވެހިރާއްޖެ އާއި ޗައިނާއާ ދެމެދު ދަތުރުފަތުރުގެ ގުޅުން އިތުރަށް ހަރުދަނާވެ، ފަތުރުވެރިކަމުގެ ދާއިރާއަށް އިތުރު ކުރިއެރުންތަކެއް ލިބިގެންދާނެ އެވެ. މީގެ އިތުރުން، މި ފިޔަވަޅުގެ ސަބަބުން ދިވެހި އިޤްތިޞާދަށް ވެސް ފާހަގަކޮށްލެވޭ ފައިދާތަކެއް ކުރާނެ ކަމަށް އުންމީދު ކުރެވެއެވެ.

މޯލްޑިވިއަންގެ ބޯޓު ޗައިނާގެ ޗެންގްޑޫ އިން ރާއްޖެ އައުމަށް ހަމަޖެހިފައި ވަނީ މާދަމާ އެވެ. 

ވައިޑް ބޮޑީގެ ދެވަނަ ދަތުރު ކުރާނީ މި މަހުގެ 24 ވަނަ ދުވަހު ރާއްޖެއިން ޗައިނާގެ ބެއިޖިންގއަށެވެ. ޗައިނާގެ ޝެންހާއީއަށް ފުރަތަމަ ދަތުރު ކުރާނީ މި މަހުގެ 27 ވަނަ ދުވަހުއެވެ.

ޗެންގްޑޫއަށް ދެ ކޮޅު ޓިކެޓުގެ އަގަކީ 688 އެމެރިކާ ޑޮލަރެވެ. ބެއިޖިންގ ދެ ކޮޅު ޓިކެޓުގެ އަގަކީ 788 އެމެރިކާ ޑޮލަރެވެ. އަދި ޝެންހާއީ ދެ ކޮޅު ޓިކެޓުގެ އަގަކީ 777 އެމެރިކާ ޑޮލަރެވެ.

މި މަހު 6 ވަނަ ދުވަހު ރާއްޖެ ގެނައި އެއާބަސް އޭ330 މަރުކައިގެ މި ބޯޓަކީ 264 މީހުންގެ ޖާގައިގެ މަތިންދާބޯޓެކެވެ. ބިޒްނަސް، ޕްރިމިއަމް އިކޮނޮމީ އަދި އިކޮނޮމީ ކްލާސް ވެސް ހިމެނޭގޮތަށް ފަރުމާކޮށްފައިވާ މި ބޯޓުގައި 18 ބިޒްނަސް ސީޓާއި 36 ޕްރިމިއަމް އިކޮނޮމީ ސީޓާއި 210 އިކޮނޮމީ ސީޓު ހިމެނެއެވެ. މީގެ އިތުރުން، މި ބޯޓުގެ ކާގޯ އުފުލޭ ކެޕޭސިޓީއަކީ 10 ޓަނެވެ.

މި އާ އެއާބަސް އޭ330 ބޯޓާ އެކު މޯލްޑިވިއަން އެއަރލައިންސްގެ ފްލީޓުގެ އަދަދު ވަނީ 25 އަށް އިތުރުވެފައެވެ. އަދި ޗައިނާއަށް ފެށި ދަތުރުތަކާ އެކު މޯލްޑިވިއަން އިން ދަތުރުކުރާ މަންޒިލްގެ އަދަދު 22 އަށް ވަނީ އަރައިފައެވެ.