މޯލްޑިވްސް އިސްލާމިކް ބޭންކް (އެމްއައިބީ)ގެ ސާވިސް ސެންޓަރަކާއި އޭޓީއެމްގެ ޚިދުމަތް ރ. އުނގޫފާރުގައި ފެށުމުގެ އެއްބަސްވުމެއްގައި، އެރަށު ކައުންސިލާއެކު ރޭ ސޮއިކޮށްފިއެވެ. 

މި އެއްބަސްވުމުގައި ސޮއިކުރީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރ. އަތޮޅަށް ކުރައްވާ ދަތުރުފުޅުގެ ތެރެއިން އުނގޫފާރަށް ވަޑައިގެން އެރަށުގެ ރައްޔިތުންނާ ބައްދަލުކުރެއްވުމަށް ރޭ ބޭއްވި ރަސްމިއްޔާތުގެ ތެރެއިންނެވެ.

އެމްއައިބީގެ ފަރާތުން މި އެއްބަސްވުމުގައި ސަޮއިކުރެއްވީ އެ ބޭންކުގެ މެނޭޖިން ޑިރެކްޓަރ މުފައްދަލް އިދުރީސް ކުމްރީއެވެ. އުނގޫފާރު ކައުންސިލުގެ ފަރާތުން ސޮއިކުރެއްވީ ކައުންސިލުގެ ރައީސް އަބްދުﷲ ރަޝީދުއެވެ. 

އުގޫފާރުގައި ރައީސް ޑރ. މުޢިއްޒު ދެއްކެވި ވާހަކަފުޅުގައި އެ އަތޮޅު ދުވާފަރުގައި މި އަހަރުގެ ޖޫން މަހުގެ ތެރޭގައި ބޭންކް އޮފް މޯލްޑިވްސްގެ (ބީއެމްއެލް)ގެ ބްރާންޗެއްގެ ޚިދުމަތް ފައްޓާނެކަމުގެ ޚަބަރު ދެއްވިއެވެ. އެ މަނިކުފާނު ވިދާޅުވީ ބީއެމްއެލް އާއި ދުވާފަރު ކައުންސިލާއެކު އެކަމުގެ އެއްބަސްވުމުގައި އަންނަ ހަފުތާ ތެރޭގައި ސޮއިކުރާނެ ކަމަށެވެ.

ރ. ހުޅުއްްދުއްފާރުގައި ބީއެމްއެލް އާއި އެމްއައިބީގެ އޭޓީއެމް ޚިދުމަތް ފެށުމަށް، އެ ދެ ބޭންކާއި އެރަށު ކައުންސިލާދެމެދު މިއަދު ވަނީ އެއްބަސްވުމެއްގައި ސޮއިކޮށްފައެވެ. 

ބޭންކިން ޚިދުމަތް ރަށްރަށުގައި ވަރަށް ބޮޑަށް ފުޅާކުރެއްވުމަށް ރައީސުލްޖުމްހޫރިއްޔާ އިސްކަން ދެއްވައެވެ.