ENGLISH
04 އޭޕްރީލު 2025
ރާއްޖެ، ޗައިނާ މިނިވަން ވިޔަފާރީގެ އެއްބަސްވުމުގެ ދަށުން މިހާތަނަށް 1.9 މިލިއަން ރުފިޔާގެ މުދާ އެތެރެކޮށްފި
21 ޖެނުއަރީ 2025
|
އެންމެ މަޤްބޫލު
ރާއްޖެއިން ޗައިނާއާ އެކު ވެފައިވާ މިނިވަން ވިޔަފާރީގެ އެއްބަސްވުމުގެ ދަށުން މި އަހަރުގެ މިހާތަނަށް 1.9 މިލިއަން ރުފިޔާގެ މުދާ ކްލިއާރ ކުރެވިފައިވާކަ މަށް މޯލްޑިވްސް ކަސްޓަމްސް ސާރވިސްގެ ތަފާސްހިސާބުތަކުން ދައްކައިފިއެވެ.
ކަސްޓަމްސްގެ ތަފާސްހިސާބު އާންމުކޮށްފައިވާއިރު، މި އަހަރުގެ ފުރަތަމަ 18 ދުވަހުގެ ތެރޭގައި، މިނިވަން ވިޔަފާރީގެ އެއްބަސްވުމުގެ ދަށުން ޗައިނާއިން ރާއްޖެ އެތެރެކޮށްފައިވާ 1.9 މިލިއަން ރުފިޔާގެ މުދަލުގެ ކްލިއަރެންސް ވަނީ ހަދާފައެވެ. މިއީ ވައިގެ މަގުން ގެނައި ސީއައިއެފް އަގު 882،381 ރުފިޔާއަށް އަރާ ނުވަ ޝިޕްމެންޓަކާއި ކަނޑުމަގުން ގެނައި ސީއައިއެފް އަގު 1،040،875 ރުފިޔާއަށް އަރާ ތިން ޝިޕްމެންޓެވެ.
ރާއްޖެއާއި ޗައިނާ މިނިވަން ވިޔަފާރީގެ އެއްބަސްވުމަށް އަމަލުކުރަން ފަށާފައިވަނީ މި އަހަރުގެ ޖެނުއަރީ މަހުން ފެށިގެންނެވެ.
ރާއްޖެ އާއި ޗައިނާގެ މިނިވަން ވިޔަފާރީގެ އެއްބަސްވުމުގައި 2014 ވަނަ އަހަރު ސޮއިކުރި ނަމަވެސް ނިމިދިޔަ އެމްޑީޕީގެ ވެރިކަމުގައި އެ އެއްބަސްވުން މުރާޖައާ ކުރަމުންދާކަމަށް ބުނެ، އެ އެއްބަސްވުމަށް އަމަލުކޮށްފައެއް ނުވެއެވެ. ރާއްޖެ އާއި ޗައިނާއާ ދެމެދު ޤާއިމްކޮށްފައިވާ އެފްޓީއޭ އެއްބަސްވުމަށް އަމަލު ކުރަންފަށާފައި ވަނީ މިސަރުކާރުންނެވެ.
ދިވެހި ސަރުކާރާއި ޗައިނާގެ މަރުކަޒީ ބޭންކާ ދެމެދު ކަރަންޓު އެކައުންޓު މުއާމަލާތްތަކެއް ދެ ގައުމުގެ ފައިސާއިން ކުރެވޭ އެއްބަސްވުމުގެ މައްޗަށް، މިނިވަން ވިޔަފާރީގެ އެއްބަސްވުމަށް އަމަލު ކުރަން ފެށުމާއެކު ދިވެހި ވިޔަފާރިތަކަށާއި ރާއްޖޭގެ އިގުތިސާދަށް ބޮޑެތި ކުރިއެރުންތަކެއް ލިބޭނެ ކަމަށް އިކޮނޮމިކް މިނިސްޓަރު މުހައްމަދު ސައީދު މީގެ ކުރިން ވިދާޅުވެފައިވެއެވެ.
މީގެ އިތުރުން، މި އެއްބަސްވުމުގެ ދަށުން ޗައިނާއިން ރާއްޖެ އެތެރެކުރާ މުދަލުގެ 91 ޕަސެންޓުގެ ބާވަތުން ޑިއުޓީ ދައްކާކަށް ނުޖެހޭނެއެވެ. އަދި މި އެއްބަސްވުމުގެ ދަށުން ދިވެހި ރުފިޔާއިން، ޗައިނާއިން މުދާ ގަނެވޭނެއެވެ.
ޗައިނާ، ރާއްޖެ މިނިވަން ވިޔަފާރީގެ އެއްބަސްވުމާއި އެކު އެކި ސިނާޢަތްތަކަށް ބޭނުންވާ މުދަލުން ޑިއުޓީ ވަނީ މަޢާފްވެފައެވެ. މީގެތެރޭގައި އެލެކްޓްރޯނިކް ސާމާނާއި ފަރުނީޗަރު އަދި ހަރުމުދާތައް ހިމެނެއެވެ. މީގެއިތުރުން އިމާރާތްކުރުމުގެ މަސައްކަތަށް ބޭނުންވާ ސާމާނުން ޑިއުޓީ މަޢާފުވެގެންދާނެ ކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވުޒާރާއިން ވިދާޅުވެއެވެ.
ހަމަ މިއާއެކު، ރާއްޖެއަށް އެތެރެކުރާ ގިނަ މުދާތަކަކުން، އެއްބަސްވުމުގެ ދަށުން ޑިއުޓީ މައާފްވާއިރު، ރާއްޖެއިން ބޭރުކުރާ މަހަށް ވެސް ޑިއުޓީ މަޢާފްވެގެންދާނެއެވެ. މިއާއެކު ރާއްޖޭގެ މަސްވެރިކަމުގެ ސިނާޢަތަށް ކުރިއެރުންތަކެއް ލިބިގެންދާނެ ކަމަށް ސަރުކާރުން ވިދާޅުވެއެވެ.
ސަރުކާރުން ހާމަކުރައްވާ ގޮތުގައި، މިހާރުވެސް ދިވެހިރާއްޖެ އާއި ޗައިނާއާ ދެމެދު 700 މިލިއަން ޑޮލަރުގެ ވިޔަފާރި ދަނީ ކުރެވެމުންނެވެ. އަދި މިނިވަން ވިޔަފާރީގެ އެއްބަސްވުމަށް އަމަލު ކުރަން ފެށުމާއެކު މި އަދަދު އެއް ބިލިޔަން ޑޮލަރަށް އަރާނެކަމަށް ސަރުކާރުންވަނީ ލަފާ ކުރައްވައިފައެވެ.