ސަތޭކަ ސާޅީސް ގްރާމްގެ މަސްދަޅު ބާޒާރަށް އަލަށް ނެރެފައިވީ ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނިންމެވުމާ އެއްގޮތަށް، ސަރުކާރުން ގޭބިސީތަކަށް ބައްސަވާ މަސް ކޭހުގައި ހުންނާނީ 180 ގްރާމުގެ ތެޔޮ މަސް ދަޅުކަމުގެ ޔަޤީންކަން މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން މިއަދު ދެއްވައިފިއެވެ. 

މިފްކޯގެ އޮފިސަލަކު މިއަދު ވިދާޅުވީ 140 ގްރާމުގެ ތެޔޮ މަސް ދަޅު ބާޒާރަށް ނެރުނީ، ކުދި ގޭބިސީތަކަށް އިސްރާފު ކުޑަވާނެ، އަގުހެޔޮ މަސްދަޅެއް ފޯރުކޯށްދިނުމުގެ ބޭނުމުގައި ކަމަށެވެ. އޭނާ ވިދާޅުވީ މަސްދަޅު ފުރިޖުކޮށް ބޭނުންކުރުމަކީ ރަނގަޅު ކަމަކަށްނުވާއިރު، އާންމުކޮށް ހުންނަ ސައިޒަށްވުރެ މަދުން ހުންނަ މަސްދަޅެއް ބާޒާރަށް ނެރުމުން، މަސް ދަޅު އަގުހެޔޮކޮށް ގަންނަން ލިބިފައި އިގްތިސާދު ވެސް ކުރެވޭނެ ކަމަށެވެ.

މިފްކޯގެ އުފެއްދުންތަކުގެ ތެރެއިން ދިވެހިންގެ މެދުގައި އެންމެ މަޤުބޫލު ތެޔޮ މަސް ދަޅެއްގައި 180 ގަރާމް ހުންނައިރު، އެ ސައިޒުގެ މަސް ދަޅެއް ވިއްކަނީ 17.50ރ. އަށެވެ. އަލަން ނެރުނު 140 ގްރާމުގެ ސައިޒުގެ މަސް ދަޅެއް ވިއްކަނީ 15ރ. އަށެވެ.

މިފްކޯ އިން ވިދާޅުވީ އެސްޓީއޯ މެދުވެރިކޮށް، އަންނަ ރަމަޟާން މަހަށް ރާއްޖޭގެ ކޮންމެ ގޭބިސީއަކަށް ސަރުކާރުން ދޫކުރައްވާ މަސްދަޅު ބަންދުކުރުމުގެ މަސައްކަތް މިހާރު ފެލިވަރުގައި ކުރިއަށްދާ ކަމަށެވެ. ސަރުކާރުން ދޫކުރައްވަނީ 180 ގްރާމްގެ 48 ދަޅުގެ، ތެޔޮމަހުގެ ކޭސް ކަމަށް މިފްކޯއިން ވިދާޅުވިއެވެ.