މަތީފަންތީގެ ރިސޯޓުތަކެއްގެ މެދުގައި އޮތް މާފަރު އިންޓަނެޝަނަލް އެއާޕޯޓުން މިދިޔަ މަހު 50 އެއްހާ ޕްރައިވެޓް ޖެޓަށް ޚިދުމަތް ދީފައިވާކަމަށް، އެ އެއާޕޯޓު ހިންގާ އައިލެންޑް އޭވިއޭޝަން ސާވިސަސް (އައިއޭއެސް) އިން  ވިދާޅުވެއްޖެއެވެ. 

ނ. އަތޮޅުގައި އޮންނަ މާފަރު އެއާޕޯޓަކީ ވެލާނާ އިންޓަނެޝަނަލް އެއާޕޯޓަށް ފަހު ދެން އެންމެ ގިނަ ޕްރައިވެޓް ޖެޓް ޖައްސާ އެއާޕޯޓެވެ.

އައިއޭއެސްއިން ވިދާޅުވީ މިދިޔަ އަހަރު ހަތަރު ވަރަކަށް މަސް ދުވަހަށް ބަންދުކުރުމަށްފަހު، މާފަރު އެއާޕޯޓު ހުޅުވިފަހުން މިދިޔަ ޑިސެމްބަރު މަހުގެ ތެރޭގައި ޕްއިވެޓް ޖެޓުގެ 98 މޫވްމަންޓް ރެކޯޑް ކުރެވިފައިވާ ކަމަށެވެ. މިދިޔަ އަހަރުގެ ޖޫން މަހުން ސެޕްޓެމްބަރު މަހުގެ ނިޔަލަށް މާފަރު އެއާޕޯޓު ބަންދުކުރީ ރަންވޭއަށް 650 މީޓަރު ދިގުކޮށް، އެއާޕޯޓަށް ބޭނުންވާ އިތުރު ޚިދުމަތްތައް ތަރައްގީކުރުމަށެވެ.

އައިއޭއެސްގެ ޖެނެރަލް މެނޭޖަރ، އެއާޕޯޓްސް މުމްތާޒު ޢަލީ ވިދާޅުވި ގޮތުގައި މިދިޔަ މަހު ގިނަ އަދަދެއްގެ ޕްރައިވެޓް ޖެޓް ޚިދުމަތް ހޯދުމުން ދައްކައިދެނީ، ލީޑިން ލަގްޒަރީ ހަބެއްގެ ގޮތުގައި މާފަރު އެއާޕޯޓު ފާހަގަވަމުން އަންނަ ކަމަށެވެ. އަދި މާފަރު އެއާޕޯޓުގެ ޚިދުމަތްތައް ރަނގަޅުކުރުމަށް މަސައްކަތް ކުރަމުންދާ ކަމަށް އޭނާ ވިދާޅުވިއެވެ.

މަތީ ފެންވަރުގެ ރިސޯޓުތައް ކަމަށްވާ ވެލާ އާއި ސޮނޭވާ ޖާނީ އަދި ރަންދެލި ރިސޯޓަށް ވެސް މާފަރު އެއާޕޯޓު މެދުވެރިކޮށް ފަތުރުވެރިން ދަތުރުކުރެއެވެ.