މޯލްޑިވިއަންގެ ފުރަތަމަ ވައިޑް-ބޮޑީ އެއާކްރާފްޓް، އޭ 330-200 ގައި ޗައިނާގެ ތިން މަންޒިލަކަށް ފަށާ ދަތުރުތަކުގެ ޓިކެޓް ވިއްކަން ފަށައިފިއެވެ. 

ޤައުމީ އެއާލައިންގެ 264 މީހުންގެ ޖާގައިގެ ބޯޓުގައި ފުރަތަމަ މަންޒިލެއްގެ ގޮތުގައި މިމަހުގެ 22 ވާ ބުދަ ދުވަހު ދަތުރުކުރާނީ ޗައިނާގެ ކުރިއަރާފައިވާ ސިޓީއެއް ކަމަށްވާ ޗެންދޫއަށެވެ. ވެލާނާ އިންޓަނެޝަނަލް އެއާޕޯޓް (ވީއައިއޭ) އިން ފުރައިގެން ޗެންދޫއަށް ކުރާ 5 ގަޑިއިރާއި 45 މިނިޓުގެ ދަތުރުގެ ދެކޮޅު ޓިކެޓުގެ އަގަކީ 688 ޑޮލަރު (10،610ރ.) އެވެ.

ވީއައިއޭއިން ފުރައިގެން ޗައިނާގެ ވެރިރަށް ބެއިޖިންއަށް ކުރާ ދަތުރަށް 8 ގަޑިއިރާއި 10 މިނިޓް ހޭދަވާއިރު، އެ ދަތުރުގެ ދެ ކޮޅު ޓިކެޓުގެ އަގަކީ 788 ޑޮލަރު (12،151ރ.) އެވެ. ޗައިނާގެ ތިންވަނަ މަންޒިލެއްގެ ގޮތުގައި މޯލްޑިވިއަނުން ދަތުރުކުރާނީ ޝަންހާއީއަށެވެ. ވީއައިއޭ އިން ފުރައިގެން ސެންހާއީ އަށް 7 ގަޑިއިރާއި 30 މިނިޓް ހޭދަވާނެ އެވެ. އެ ރޫޓުގެ ދެކޮޅު ޓިކެޓުގެ އަގަކީ 777 ޑޮލަރު (11،981ރ.) އެވެ. 

މޯލްޑިވިއަނުން ބުނެފައިވާ ގޮތުގައި މި ދަތުރުތަކުގައި ކޮންމެ ފަސެންޖަރަކަށް ވެސް 40 ކިލޯގެ ބެގެޖް އެލަވަންސް ލިބޭނެއެވެ. ޗައިނާ ދަތުރުތަކުގެ ޓިކެޓް ގަންނަން ބޭނުންވާ ފަރާތްތަކަށް މޯލްޑިވިއަންގެ ވެބްސައިޓާއި އެޕުން ވެސް ޓިކެޓް ބައްލަވައިގަނެވޭނެއެވެ. 

މޯލްޑިވިއަންގެ އެއާބަސް 330 އަކީ ބިޒްނަސް ކްލާސް 18 ސީޓާއި، 36 ޕްރިމިއަމް އިކޮނޮމީ އަދި 210 އިކޮނޮމީ ސީޓު ހިމެނޭ 10 ޓަނުގެ ކާގޯ އުފުލޭ ބޯޓެކެވެ.