ރާއްޖޭގެ ރީތިރަށްތަކުގެ ތެރޭގައި ހިމެނޭ ލ. މާބައިދޫން، ދެ ގެސްޓުހައުސް އާއި ރެސްޓޯރަންޓެއް ތަރައްގީކުރާނެ ބިން ކުއްޔަށް ދޫކުރުމަށް އިއުލާނުކޮށްފިއެވެ. 

ފަތުރުވެކަމަށް ކަމުދާ ސިފަތަކެއް ލިބިފައިވާ މާބައިދޫން މިކަމަށް ބިން ދޫކުރަނީ ރަށުގެ ދުރުދަނޑު މަތިފުށުން އަދި ކެރެންޑޫންނެވެ. ގުދުރަތީ މުއްސަނދިކަމާއި ހިތްގައިމުކަން ލިބިފައިވާ މާބައިދޫން ގެސްޓުހައުސް ތަރައްޤީކޮށް ހިންގުމަށް ދޫކުރަކީ 10،800 އަކަފޫޓޫގެ ބިމަކާއި 6،300 އަކަފޫޓުގެ ބިމެކެވެ. ރެސްޓޯރަންޓް ތަރައްޤީކުރުމަށް ދޫކުރަނީ 1،300 އަކަފޫޓޫގެ ބިމެކެވެ. މި ބިންތައް ކުއްޔަށް ދޫކުރުރަނީ 35 އަހަރު ދުވަހުގެ މުއްދަތަށެވެ.

މި ތިން ބިން ކުއްޔަށް ދޫކުރުމަށް މާބައިދޫ ކައުންސިލުން ދިވެހި ސަރުކާރުގެ ގެޒެޓުގައި ކުރައްވާފައިވަނީ ވަކިވަކި ތިން އިއުލާނެކެވެ. އިޢުލާނުގައި ބުނެފައިވާ ގޮތުގައި މި ބިންތަކުގެ ބިޑުފޮތް މިއަދުން ފެށިގެން މިމަހުގެ 30 ވަނަ ދުވަހުގެ ނިޔަލަށް ވިއްކާނެއެވެ. ބީލަން ހުށަޅަން ޖެހެނީ ފެބަރުއަރީ މަހުގެ 10 ވަނަ ދުވަހުއެވެ. މި ބިޑުގައި ބައިވެރިވާ ފަރާތްތަކުން ބިޑު ސެކިޔުރިޓީ ހުށަހަޅަން ޖެހެއެވެ. އަދި ބީލަން ކާމިޔާބުކުރާ ފަރާތުން ބިން ކުއްޔަށް ލިބިގަތުމުގެ ފީއެއްވެސް ދައްކަން ޖެހެއެވެ. މި ބީލަމާ ބެހޭ ތަފުސީލު އިއުލާނުގައި ހިމަނާފައިވެއެވެ. 

ގާތްގަނޑަކަށް 1،200 މީހުން ދިރިއުޅޭ، މާބައިދޫ އޮންނަނީ ލ. ކައްދޫ އެއާޕޯޓުން ފުރަައިގެން 30 މިނިޓުން ފޯރާ ހިސާބުގައެވެ. ހިތްގައިމު ކޯރަކާއި ރާޅު ޕޮއިންޓެއް އޮންނަ މާބައިދޫއަކީ 44 ހެކްޓަރުގެ ރަށެކެވެ. ރަށުގެ ދިގުމިނުގައި 1.5 ކިލޯމީޓަރ ހުންނައިރު ފުޅާމިނުގައި ބައި ކިލޯމީޓަރު ހުރެއެވެ.