އުތުރު އިންޑިއާގެ އުއްތަރާކަންޑު ސްޓޭޓުގެ ހިމާލަޔާ ފަރުބަދަމަތިން ބަހެއް ވެއްޓި މަދުވެގެން 36 މީހުން މަރުވެ، އެތައް ބަޔަކަށް ޒަހަމްވެއްޖެއެވެ.

އުއްތަރާކަންޑު ސްޓޭޓުގެ ޗީފް މިނިސްޓަރ ޕުޝްކަރ ސިންގް ދާމީ ވިދާޅުވި ގޮތުގައި މި ހާދިސާ ހިނގީ ހޯމަ ދުވަހު އަލްމޯރާ ޑިސްޓްރިކްޓުގެ މާޗުލާ ސަރަހައްދުގައެވެ. އޭނާ އެކްސްގައި ލިޔުއްވާފައިވަނީ މީހުން ސަލާމަތްކުރުމާއި އެހީތެރިކަން ފޯރުކޮށްދިނުމުގެ މަސައްކަތް އަވަހަށް ކުރިއަށް ގެންދިއުމަށް ޑިސްޓްރިކްޓް އެޑްމިނިސްޓްރޭޝަނަށް އަންގާފައިވާ ކަމަށެވެ.

ސީނިއަރ އޮފިޝަލެއް ކަމަށްވާ ވިނީޓް ޕާލް ނޫސްވެރިންނަށް މަޢުލޫމާތު ދެއްވި ގޮތުގައި މި ހާދިސާގައި 36 މީހުން މަރުވެފައިވާ އިރު، އަނިޔާވެފައިވާ ބައެއް މީހުން ޚާއްޞަ ފަރުވާ ދިނުމަށް ވައިގެ މަގުން ހޮސްޕިޓަލަށް ގެންދެވުނެވެ.

ލޯކަލް ފުލުހުންގެ އޮފިސަރެއް ކަމަށްވާ ދެވެންދްރާ ޕިންޗާ ރޯއިޓަރސްއަށް ވިދާޅުވި ގޮތުގައި މި ބަސް ދަތުރުކުރަމުން ދިޔައީ އުއްތަރާކަންޑުގެ އުތުރުގައިވާ ގާވާލް ޑިސްޓްރިކްޓުން ރާމްނަގަރަށެވެ. އަދި މި ބަހުގައި މަދުވެގެން 42 ފަސިންޖަރުން ތިބިކަމަށް އޭނާ ވިދާޅުވިއެވެ.

ސަރުކާރުގެ ރެސްކިއު ޓީމުތަކުން ހާމަކޮށްފައިވާ ފޮޓޯތަކުގައި ފެންނަނީ ބަސް ވެއްޓުނު ތަނުގައި ހުރި ބޯ ވިނަތަކުގެ ތެރޭގައި ބަހުގެ ހަލާކުވެފައިވާ ބައިތަކެވެ. އަދި ބަހުގެ ކުރީކޮޅު ހަލާކުވެފައިވާ މަންޒަރެވެ.

ޕާލް ވިދާޅުވި ގޮތުގައި އިބްތިދާއީ ތަޙްޤީޤުން ދައްކާ ގޮތުގައި ބަސް ފުރޮޅާލައި 60 މީޓަރު (200 ފޫޓު) ފުންމިނުގެ ވާދީއަކަށް ވެއްޓުނީއެވެ. ބައެއް ޕަސިންޖަރުން ސަލާމަތްނުވީ ބަސް ވެއްޓުނު ވަގުތު ބޭރަށް ބައެއްމީހުން ވެއްޓުމުގެ ސަބަބުންނެވެ.

މިހާދިސާއާ ގުޅިގެން އިންޑިއާގެ ބޮޑުވަޒީރު ނަރެންދްރާ މޯދީ އެކްސްގައި ކުރެއްވި ޕޯސްޓެއްގައި ވަނީ ހާދިސާގައި މަރުވި އަދި އަނިޔާ ލިބުނު ފަރާތްތަކަށް އެންމެ ފުންމިނުގައި ހިތާމައާއި ތަޢުޒިއާ ވިދާޅުވެފައެވެ.

މޯދީގެ އޮފީހުން ނެރުއްވި ބަޔާނެއްގައި ވިދާޅުވެފައިވަނީ، މި ހާދިސާގައި މަރުވި މީހުންގެ ޢާއިލާތަކަށް 200,000 ރުޕީސް (2,380 އެމެރިކާ ޑޮލަރު) ގެ އެހީތެރިކަން ދެއްވާނެ ކަމަށާއި، އަދި ޒަޚަމްވި މީހުންނަށް 50,000 ރުޕީސް (595 އެމެރިކާ ޑޮލަރު) ދެއްވާނެ ކަމަށެވެ.