މީލާދީ އާ އަހަރު ފެށުން ފާހަގަ ކުރުމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) އިން ބާއްވާ ޑްރޯން ޝޯވ އާއި "މޯލްޑިވްސް ކަލްޗަރ އެންޑް ފުޑް ފެސްޓިވަލް" މިރެ އާއި މާދަމާރޭ ހުޅުމާލެ ސެންޓްރަލް ޕާކުގައި އޮންނާނެއެވެ.

އެމްއެމްޕީއާރުސީން މިއަދު ވިދާޅުވީ ދިވެހިންނާއި ފަތުރުވެރިންނަށް ވެސް ތަފާތު ތަޖުރިބާއެއް ލިބިގެންދާނެ މި ފެސްޓިވަލް ކުރިއަށްދާނީ މިރޭ 8 އިން 12 އަށް އަދި މާދަމާ ހަވީރުން ފެށިގެން ރޭގަނޑު 10:00 އަށް ކަމަށެވެ. އެމްއެމްޕީއާރުސީ އިން ވިދާޅުވީ މި ފެސްޓިވަލުގައި ކުޑަކުދިންނަށް ހާއްސަ ކަންކަމާއި، އާއިލާތަކަށް ހާއްސަ ހަރަކާތްތައް ކުރިއަށް ގެންދާނެ ކަމަށެވެ. ކާބޯތަކެއްޗާއި ސަގާފީ ސްޓޯލްތައް ދައްކާލުން ވެސް މި ފެސްޓިވަލްގައި އޮންނާނެއެވެ. 

ފެސްޓިވަލްގެ އެންމެ މުހިންމު އިވެންޓަކީ ދިވެހިރާއްޖެއަށް ފަތުރުވެރިއަކު ޒިޔާރަތްކުރާ ދަތުރު ދައްކާލުމުގެ ޑްރޯން ޝޯ އެެވެ. މި ޝޯވއާއި ހަވާ އެރުވުން މިރޭ އޮންނާނީ މޫސުން ތަންދޭނަމަ އެވެ. 

މި ފެސްޓިވަލާއި ބެހޭ ގޮތުން އެމްއެމްޕީއާރުސީގެ މެނޭޖިން ޑިކެޓަރ އިބްރާހިމް ޝިޢުރީ ވިދާޅުވީ މި ފެސްޓިވަލުގެ ބޭނުމަކީ ރާއްޖޭގެ ފަތުރުވެރިކަމަށް މި އަހަރު ލިބުނު ކާމިޔާބީ ފާހަގަކުރުމާއި ރާއްޖޭގެ ސަގާފީ ތަރިކަ ޕްރޮމޯޓްކުރުމެވެ.

އެމްއެމްޕީއާރުސީން ވިދާޅުވީ މި ފެސްޓިވަލް އިންތިޒާމުކުރަނީ ސަރުކާރުގެ އޮފީސްތަކާއި ކުންފިތަކާއި ވަރަށް ގިނަ ފަރާތްތަކެއްގެ އެހީތެރިކަމާއެކުގައި ކަމަށެވެ.