ރާއްޖެ އަށް ޒިޔާރަތް ކުރަނީ، ރާއްޖެއާ މެދު ޝައުޤުވެރިވެ, ރާއްޖެއާ ބެހޭ މައުލޫމާތު ހޯދާ 20 މިލިއަން މީހުންގެ ތެެރެއިން އެންމެ ޕަސެންޓެއް ކަމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) އިން ވިދާޅުވެއްޖެއެވެ.

މި އަހަރު ރާއްޖެ އިސްތިހާރު ކުރުމަށް ހިންގި ހަރަކާތްތަކާއި ބެހޭ މައުލޫމާތު ދިނުމަށް އިއްޔެ ބޭއްވި ނޫސްވެރިންގެ ބައްދަލުވުމެއްގައި އެމްއެމްޕީއާރުސީގެ މެނޭޖިން ޑިރެކްޓަރ އިބްރާހިމް ޝިއުރީ ވިދާޅުވީ ސާރޗިން އިންޖީނުތަކުގެ ޑޭޓާއަށް ބަލާއިރު، ގިނަ ބަޔަކު ރާއްޖެއަށް ޝައުގުވެރިވާކަން ފާހަގަކުރެވޭ ކަމަށެވެ. އަދި އޭނާ ވިދާޅުވީ ޝައުގުވެރިވާ ވީހާވެސް ގިނަ ބަޔަކު، ރާއްޖެ ގެނައުމަށް ކުރެވޭނީ ކޮންކަމެއްކަން ދަނެގަންނަން ޖެހޭ ކަމަށެވެ. 

ޝިއުރީ ވިދާޅުވީ ރާއްޖެއާ ބެހޭގޮތުން މައުލޫމާތު ހޯދި ނަމަވެސް، ރާއްޖެ ނާންނަން ދިމާވާ ސަބަބުތަކުގެ ތެރޭގައި، ޗުއްޓީހޭދަކުރަން ބޭނުންވާ ރިސޯޓުން ރޫމް ނުލިބިގެން ނުވަތަ ފްލައިޓް ކަނެކްޝަން ނެތިގެން އަދި އެނޫން ވެސް ސަބަބެއް އޮވެދާނެ ކަމަށެވެ.

ޝިއުރީ ވިދަޅުވީ ތަޖުރިބާއަށް ބަލާއިރު، ފެއާތަކަށް ދިއުމަށްވުރެ ޑިޖިޓަލްކޮށް މާކެޓް ކުރުމުން ސަމާލުކަން ލިބޭ މިންބަރު ބޮޑު ކަމަށެވެ. އެހެންކަމުން އެމްއެމްޕީއާރުސީ އަށް އިސްތިހާރު ކުރުމަށް ލިބިފައިވާ ކުޑަ ބަޖެޓުގެ ތެރެއިން، ޑިޒިޓަލް މާކެޓިންއަށް ވަރަށް ބޮޑު އިސްކަމެއް ދޭ ކަމަށާއި ނަތީޖާ ވެސް ރަނގަޅުކަމަށް އޭނާ ވިދާޅުވި އެވެ.

ރާއްޖޭގެ ފަތުރުވެރިކަމުގައި ކޮންޓްރޯލެއް ނެތި ޑިމާންޑަށްވުރެ ސަޕްލައި އިތުރުވުމަކީ އޮތް ގޮންޖެހުމެއްކަން އެމްއެމްޕީއާރުސީން ފާހަގަކުރައްވައެވެ. އެމްއެމްޕީއާރުސީން ބުނީ، ރާއްޖެ މާކެޓް ކުރުމުގައި ރާއްޖޭގެ ފަތުރުވެރިކަމަށް ހުރި ހުރިހާ ގޮންޖެހުމަކާ މެދު ވިސްނުން ގެންގުޅުއްވާ ކަމަށެވެ. 

މި އަހަރު ރާއްޖެއަށް ދެ މިލިއަން ފަތުރުވެރިން ޒިޔާރަތްކޮށްފައިވާއިރު، ރާއްޖެއަކީ ދުނިޔޭގެ ނިސްބަތުން ވެސް އަގުބޮޑު މަންޒިލެކެވެ. ދުނިޔޭގެ ލީޑިން ޑެސްޓިނޭޝަންގެ މަގާމު މި އަހަރު ވަނީ ޖައްސަޖައްސައިގެން ފަސްވަނަ ފަހަރަށް ރާއްޖެއަށް ލިބިފައެވެ.