ނިމިގެން މިދާ އަހަރަކީ ކާމިޔާބީތަކެއް ހާސިލުކުރެވުނު އަހަރެއް ކަމަށާއި، އަންނަ އަހަރު ފަތުރުވެރިކަމުން ރާއްޖެއަށް ލިބޭ އާމްދަނީ ފަސް ބިލިއަން ޑޮލަރު (77 ބިލިއަން ރުފިޔާ) އަށް އިތުރުމަކީ އަމާޒެއް ކަމަށް މޯލްޑިވްސް މާކެޓިންގ އެންޑް ޕަބްލިކް ރިލެޝަންސް ކޯފަރޭޝަން (އެމްއެމްޕީއާރުސީ) އިން ވިދާޅުވެއްޖެއެވެ.

އެމްއެމްޕީއާރުސީން މި އަހަރު ހިނގި ހަރަކާތްތަކާއި ބެހޭ މައުލޫމާތު ދެއްވުމަށް އިއްޔެ ބޭއްވި ނޫސްވެރިންގެ ބައްދަލުވުމެއްގައި އެ ކުންފުނިން ވިދާޅުވީ ވިސްނުމަކީ ސަރުކާރުން އަންދާޒާކުރާ ވަރަށް ވުރެ މަތީ އަމާޒަކަށް މަސައްކަތްކުރުން ކަމަށެވެ.

ރާއްޖޭގެ ޤައުމީ އުފެއްދުންތެރިކަމުގައި ފަތުރުވެރިކަމުގެ ދާއިރާ 30 އިންސައްތަ ހިއްސާކުރެއެވެ. މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ފާހަގަ ކުރައްވާފައިވާ ގޮތުގައި ފަތުރުވެރިކަމުން ލިބޭ އާމްދަނީ މި އަހަރު ވަނީ 15 އިންސައްތަ އިތުރުވެފައެވެ.

އެމްއެމްޕީއާރުސީން ވިދާޅުވީ ވޯލްޑް ލީޑިން ޑެސްޓިނޭޝަން އެވޯޑް ޖެހިޖެހިގެން ފަސް ވަނަ ފަހަރަށް ހާސިލުކުރެވުމާއި، ވޯލްޑް ލީޑިން ގްރީން ޑެސްޓިނޭޝަން އެވޯޑް ފުރަތަމަ ފަހަރަށް ހާސިލު ކުރެވުމާއި ދެ މިލިއަން ފަތުރުވެރިންގެ އަމާޒު ހާސިލު ކުރެވުމަކީ މި އަހަރު ހޯދުނު ފާހަގަ ކުރެވޭ ކާމިޔާބީތަކެއް ކަމަށެވެ. އަދި އެއް ދުވަހާއި އެންމެ ގިނަ ފަތުރުވެރިން އައުމުގެ ރިކޯޑާއި މަސް ދުވަހުގެ ތެރޭގައި އެންމެ ގިނަ ފަތުރުވެރިން އައުމުގެ ރިކޯޑް މި އަހަރުގެ ފެބްރުއަރީ މަހު ހާސިލު ކުރެވުމަކީ ވެސް ކާމިޔާބީއެއް ކަމަށް އެމްއެމްޕީއާރުސީން ވިދާޅުވެއެވެ.

ފަތުރެވިކަމުގެ ދާއިރާއިން ކާމިޔާބީތައް ހާސިލުކުރުމުގައި އެމްއެމްޕީއާރުސީގެ ހަރަކާތްތައް މުހިއްމު ދައުރެއް އަދާކުރެއެވެ. އެމްއެމްޕީއާރުސީން މިއަހަރުގެ ތެރޭގައި 23 ފެއާ އާއި ރޯޑްޝޯ، 15 ޝޯޝަލް މީޑިޔާ ކެމްޕެއިން އަދި 23 ވާޗުއަލް އިވެންޓް އިންތިޒާމުކޮށްފައިވެއެވެ.

އެމްއެމްޕީއާރުސީން ވިދާޅުވީ އައިޓީބީ ބާލިން އަދި އޭޓީއެމް ދުބާއީގައި މި އަހަރު ބައިވެރިވި ވަފުދަކީ މިހާތަނަށް އެފަދަ އިވެންޓެއްގައި ބައިވެރިވި އެންމެ ބޮޑު ވަފުދު ކަމަށެވެ. މީގެ އިތުރުން ވެސް ވަރަށް ގިނަ ހަރަކާތްތަކެއް ފަތުރުވެރިކަން އިސްތިހާރު ކުރުމަށް ހިންގާފައިވެއެވެ.

މިފެށޭ 2025 ވަނަ އަހަރު އާ ކަންތައްތަކާ އެކު، ގިނަ ހަރާތްތަކެއް ހިންގުމަށް އެމްއެމްޕީއާރުސީން ވަނީ ކަނޑައަޅައިފައެވެ. މިގޮތުން ވިޒިޓް މޯލްޑިވްސް ޝޮޕް ލޯންޗްކުރުމާއި، ވިޒިޓް މޯލްޑިވްސް އެކަޑަމީއެއް ޤާއިމުކޮށް ޑެސްޓިނޭޝަން ސްޕެޝަލިސްޓް ސެޓްފިކެޓް ދިނުން ފަދަ އާ ކަންކަން ފައްޓަވާނެ ކަމަށް އެމްއެމްޕީއާރުސީން ވިދާޅުވެއެވެ.