ރާއްޖެއަށް ޒިޔާރަތްކުރާ ކޮންމެ ފަތުރުވެރިއެއްގެ އަތުން ސީދާ ގޮތުން ދައުލަތަށް އެވްރެޖްކޮށް 600 ޑޮލަރު، އާމްދަނީގެ ގޮތުގައި ލިބޭކަމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) އިން ވިދާޅުވެއްޖެއެވެ.

ރާއްޖޭގެ ފަތުރުވެރިކަން މާކެޓް ކުރުމަށް އުފައްދާފައިވާ ކުންފުނިން މި އަހަރު ހިންގި ހަރަކާތްތަކާއި ބެހޭ މައުލޫމާތު ދެއްވުމަށް މިއަދު ބޭއްްވި ނޫސްވެރިންގެ ބައްދަލުވުމެއްގައި އެމްއެޕީއާރުސީގެ ބޯޑުގެ ޗެއާޕާސަން އަބްދުﷲ ޤިޔާޒް ވިދާޅުވީ، ޓީޖީއެސްޓީ، އެއް ޕަސެންޓް އިތުރުކޮށްގެން ލިބޭ އާމްދަނީއާ އެއްވަރުގެ އަދަދެއް، ފަތުރުވެރިންގެ އަދަދު، އެއް ޕަސެންޓް އިތުރުކޮށްފިނަމަ ވެސް ހޯދޭނެ ކަމަށެވެ.

"މިއަންނަ އަހަރު ޓީޖީއެސްޓީ މި ބޮޑުކުރަނީ، ފައިނޭންސް މިނިސްޓްރީން އެ ލަފާކުރަނީ 200 މިލިއަން ރުފިޔާ ލިބޭނެ ދައުލަތަށް. އެއީ 12 މިލިއަން ޑޮލަރު، އެ އަދަދު އެބަ ދިވެހިރާއްޖެ އަށް ލިބޭ އަލަށް 20 ހާސް ފަތުރުވެރިން ގެނައީމަ، އެއީ ސީދާ ބޮލަކަށް 600 ޑޮލަރު ފަތުރުވެރިކަމާއި ގުޅުންހުރި ޓެކްސްތަކުން އެކަނި،" ގިޔާޒް ވިދާޅުވިއެވެ.

ރާއްޖެއަށް މި އަހަރު ދެ މިލިއަން ފަތުރުވެރިން ވަނީ ޒިޔާރަތްކޮށްފައެވެ. ދެ މިލިނަން ފަތުރުވެރިންގެ އެއް ޕަސެންޓަކީ 20 ހާސް ފަތުރުވެރިންނެވެ. 

ގިޔާޒް ވިދާޅުވި ގޮތުގައި ރާއްޖެއަށް ޒިޔާރަތްކުރާވަރާއި އެއްވަރަށް ފަތުރުވެރިން ޒިޔާރަތްކުރާ ޤައުމުތަކާއި އަޅާބަލާއިރު، ރާއްޖޭގައި ފަތުރުވެރިކަމުން ދައުލަތަށް ލިބޭ އާމްދަނީ ރަނގަޅީ ރާއްޖެއަކީ މަތީފަންތީގެ މަންޒިލަކަށްވާތީ އެވެ.

ގިޔާޒް ވިދާޅުވީ ރާއްޖެއިން ސަޕްލައި އިތުރުކުރުމުގައި ކޮންޓްރޯލެއް ނުގެންގުޅުމުގެ ސަބަބުން، ދިމާވާ ގޮންޖެހުންތަކެއް އެބަހުރި ކަމަށެވެ. 

"މިހާރުވެސް އެންމެ ބޮޑު ޗެލެންޖަކީ ސަޕްލައި މި އިތުރުވީ ޑިމާންޑަށްވުރެ ބޮޑަށް، ރާއްޖޭގައި ސަޕްލައިގައި ހިފެހެއްޓުމެއް ނެތް. ސަޕްލައި އިތުރުވާ ވަރަކަށް ޑިމާންޑް އިތުރުނުކުރެވެންޏާ ގޮންޖެހުންތައް ހުންނާނެ،" އެނާ ވިދާޅުވިއެވެ.

ގިޔާޒް ވިދާޅުވީ ގެސްޓުހައުސްތަކަށް ލިބޭ އާމްދަނީ އިތުރުކުރުމަށްޓަކައި، މަތީފަންތީގެ މާކެޓަށް ގެސްޓުހައުސްތަކުން ވެސް އަމާޒުކުރަން ޖެހޭ ކަމަށެވެ. ލިބޭ އާމްދަނީ އަށް ބަލާއިރު، މަތީފަންތީގެ ފަތުރުވެރިން ގެނައުމަށާއި ފަތުރުވެރިންގެ އަދަދު އިތުރުކުރުމަށް ވެސް އިސްކަންދެއްވާކަމަށް އޭނާ ވިދާޅުވިއެވެ.

އެމްއެމްޕީއާރުސީން ވިދާޅުވީ ޗައިނާ އާއި އިންޑިޔާއިން ޒިޔާރަތްކުރާ ފަރުތުވެރިންނަކީ ކުރު މުއްދަތެއް ހޭދަކުރާ ބަޔަކަށް ވާތީ، އޮކިޔުޕަންސީ ރަނގަޅުކުރުމަށްޓަކައި ރަޝިޔާ، ޖަރުމަނުވިލާތް އަދި ޔޫރަޕުގެ އެހެން ޤައުމުތަކަށް ސަމާލުކަން ދޭކަމަށެވެ.