އެގްރޯ ނެޝަނަލް ކޯޕަރޭޝަން ޕްރައިވެޓް ލިމިޓެޑް (އެގްރޯނެޓް) އުވާލައި، އެ ކުންފުނިން ކުރަމުން އައި މަސައްކަތް މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ޕަބްލިކް ލިމިޓެޑް ކޮމްޕެނީއަށް ބަދަލުކުރުމަށް ދައުލަތުން ނިންމުމާ ގުޅިގެން، އެ ކުންފުންޏާ ބެހޭ ދޮގު މަޢުލޫމާތު ފަތުރަމުންދާ ކަމަށް ބުނެ އެގްރޯނެޓުން ކަންބޮޑުވުން ފާޅުކޮށްފިއެވެ.

އެގްރޯނެޓުން މިއަދު ނެރުނު ނޫސްބަޔާނެއްގައި ވިދާޅުވެފައިވަނީ، ކުންފުނީގެ އިސް ދެ މުވައްޒަފެއްގެ ބައިވެރިވުމާއެކު، އެގްރޯނެޓާ ބެހޭގޮތުން ޙަޤީޤަތާ ޚިލާފު ދޮގު މަޢުލޫމާތުތަކެއް ބައެއް ނޫސްތަކުގައި ފަތުރަމުންދާ ކަމަށެވެ. އެގްރޯނެޓާ ބެހޭގޮތުން ގެނެސްދީފައިވާ މަޢުލޫމާތުގެ ޞައްޙަކަން ކަށަވަރުކުރުމަށް އެގްރޯނެޓުގެ އެއްވެސް މަސްދަރަކުން ސާފުކޮށްފައި ނުވާކަމަށް ވެސް ބަޔާނުގައި ފާހަގަކޮށްފައިވެއެވެ.

އެގްރޯނެޓް ކުންފުނިން މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ޕަބްލިކް ލިމިޓެޑް ކޮމްޕެނީއަށް ބަދަލުކުރާ މުވައްޒަފުންގެ ލިސްޓެއް ތައްޔާރުކުރަމުންދާ ކަމަށް ބުނެ ނޫހުގައި ޝާއިޢުކޮށްފައިވާ މަޢުލޫމާތަކީ ޙަޤީޤަތާ ޚިލާފު ދޮގު މަޢުލޫމާތެއް ކަމަށް ވެސް އެގްރޯނެޓުން ވިދާޅުވެފައިވެއެވެ. އެފަދަ ލިސްޓެއް ތައްޔާރުކުރަމުން ނުދާކަމަށާއި، އެކަމާ ބެހޭގޮތުން އެއްވެސް ފަރާތަކާއެކު މަޝްވަރާކޮށްފައިނުވާ ކަމަށްވެސް ބަޔާނުގައި ވިދާޅުވެފައިވެއެވެ.

މި މައްސަލައާ ގުޅިގެން އެގްރޯނެޓްގެ މުވައްޒަފުންގެ މެދުގައި ކަންބޮޑުވުން އުފެދި، ކުންފުނީގެ މަސްލަޙަތަށް ބުރޫ އަރަމުންދާކަން ފާހަގަކޮށް، އެގްރޯނެޓްގެ އާންމު މަޞްލަޙަތާއި މުވައްޒަފުންގެ ވިސްނުމަށް ނޭދެވޭ އަސަރުކުރާގޮތަށް މަޢުލޫމާތު ފަތުރާފައިވާކަން އެންމެ ހަރުކަށި އިބާރާތުން ކުށްވެރިކުރައްވާފައިވެއެވެ.