ENGLISH
04 އޭޕްރީލު 2025
ވައިޑް ބޮޑީ މަތިންދާބޯޓުގެ ދަތުރުތައް ފެށުމުން އަހަރަކު 60،000 ޓޫރިސްޓުން ގެނެވޭނެ: އައިއޭއެސް
28 ޑިސެމްބަރު 2024
|
އެންމެ މަޤްބޫލު
ވައިޑް ބޮޑީ މަތިންދާބޯޓުގެ ދަތުރުތައް ފެށުމުން އަހަރަކު 60،000 ޓޫރިސްޓުން އެ ބޯޓުގައި ރާއްޖެ ގެވޭނެ ކަމަށް މޯލްޑިވިއަންގެ ޚިދުމަތްދޭ އައިލެންޑް އޭވިއޭޝަން ސާވިސް (އައިއޭއެސް) އިން ވިދާޅުވެއްޖެއެވެ.
ޕީއެސްއެމްގެ "ރާއްޖެ މިއަދު" ޕްރޮގްރާމްގައި މަޢުލާމާތު ދެއްވަމުން ޤައުމީ އެއާލައިންގެ ޑެޕިއުޓީ މެނޭޖިންގ ޑިރެކްޓަރ އަލީ ސަލީމް ވިދާޅުވީ، 264 މީހުންގެ ޖާގައިގެ އޭ-330 މަރުކާގެ ބޯޓުގެ ދަތުރުތައް އެންމެ ފުރަތަމަ ފައްޓަވާނީ ޗައިނާގެ ވެރިރަށް ބެއިޖިން އާއި ޝަންހާއި އާއި ޗެންދޫ އަށް ކަމަށެވެ. މިގޮތުން އެ ތިން ސިޓީއަށް ހަފުތާއަކު ދަތުރެއް ކުރާނެ ކަމަށް އޭނާ ވިދާޅުވިއެވެ.
"މިހާރު ދަތުރުތައް ރޭވިފައިވާ އޮތް ގޮތަށް ބަލާއިރު، މި ބޯޓުން އަހަރަކު ގާތްގަނޑަކަށް 60،000 ޓޫރިސްޓުން އިތުރަށް ރާއްޖެއަށް ގެނެވޭނެ. އެއީ ވަރަށް ބޮޑު ކުރިއެރުމަކަށް ވެގެންދާނީ،" ސަލީމް ވިދާޅުވިއެވެ.
ސަލީމް ވިދާޅުވީ ޓޫރިސްޓުން އުފުލުމުގައި މޯލްޑިވިއަން އިން މިހާރު ވެސް މުހިންމު ދައުރެއް އަދާކުރާއިރު، ވައިޑް ބޮޑީ މަތިންދާބޯޓުގެ ދަތުރުތައް ފެށުމުން، ޓޫރިޒަމްގައި އެ އެއާލައިންގެ ބައިވެރިވުން ބޮޑުވެގެންދާނެ ކަމަށެވެ.
އޭ-330ގެ ވައިޓް ބޮޑީ މަތިންދާ ބޯޓަކީ އިތުރު ތަނަކަށް މަޑުނުކޮށް 10 ގަޑިއިރު ދަތުރުކުރުމުގެ ޤާބިލުކަން ލިބިފައިވާ ބޯޓެއް ކަމުން، ޔޫފަރާއި އެފްރިކާ އަދި އޮސްޓްރޭލިޔާ އަށް ދަތުރުކުރުމުގެ މަގު ހުޅުވިގެންދާނެ ކަމަށް އޭނާ ވިދާޅުވިއެވެ.
އައިއޭއެސްގެ ޓެކްނިކަލް ސްޓްރެޓެޖީ މެނޭޖަރ އިސްމާޢިލް އާޠިފް މުޙައްމަދު ވިދާޅުވީ 10 ޓަނުގެ ކާގޯ އުފުލޭ މި ބޯޓުގައި ބިޒްނަސް ކްލާސް 18 ސީޓާއި، 36 ޕްރިމިއަމް އިކޮނޮމީ އަދި 210 އިކޮނޮމީ ސީޓު ހުންނާނެ ކަމަށެވެ.
އޭނާ ވިދާޅުވީ މި ބޯޓުގެ ދަތުރުތައް ފެށުމުން، ޗައިނާ އިން މުދާ ގެންނަން ބޭނުންވާ ފަރާތްތަކާއި ޗައިނާ އަށް މުދާ ފޮނުވަން ބޭނުންވާ ފަރާތްތަކަށް ވެސް ފަސޭހަވެގެންދާނެ ކަމަށެވެ.
އާޠިފް ވިދާޅުވި ގޮތުގައި މިހާރު ބޯޓު އޮތީ ސިންގަޕޫރުގަ އެވެ. ބޯޓުގެ ދަވާދު ބަދަލުކުރުމާއި އެހެން މަސައްކަތްތައް ވެސް މިހާރު ގާތްގަނޑަކަށް ނިމިފައިވާއިރު، ޖެނުއަރީ 6 ވަނަ ދުވަހު ބޯޓު މާލެ ގެނެވޭނެކަމަށް އޭނާ ވިދާޅުވިއެވެ.
މި ވަގުތު މޯލްޑިވިއަންގެ ފްލީޓުގައި 13 ބޯޓު އެބަ އޮތެވެ. އޭގެ ތެރޭގައި އެއާބަސް އޭ320 މަރުކާގެ އެއް ބޯޓާއި އޭޓީއާރްގެ ހަތަރު ބޯޓު ވެސް ހިމެނެ އެވެ. ބާކީ ހުރީ ޑޭޝް މަރުކާގެ ބޯޓުތަކެވެ. ބޭރު ދަތުރުތައް ކުރުމުގައި ގެންގުޅެނީ އެއާބަސް އޭ320 މަރުކާގެ ބޯޓު އެކަންޏެވެ.