އެމެރިކާގެ ރައީސް ޑޮނަލްޑް ޓްރަމްޕް، ފީފާގެ ރައީސް ޖިއާނީ އިންފަންޓީނޯއަށް ގުޅުއްވައި އެދިވަޑައިގަތުމާ ގުޅިގެން، އެމެރިކާގެ ފޯވާޑް ފޮލަރިން ބަލޮގަންއަށް ދެއްކި ރަތް ކާޑުގެ ސަބަބުން އައި ސަސްޕެންޝަނަށް ދުނިޔޭގެ ފުޓްބޯޅައިގެ މައި ޖަމުއިއްޔާ، ފީފާއިން ވަނީ ލުއިދީފައެވެ. އެއާއެކު ފީފާ ވޯލްޑް ކަޕް 2026 ގެ ގަދަ 16 ގައި ބެލްޖިއަމާ ދެކޮޅަށް ކުޅޭ މެޗުގައި ބަލޮގަންއަށް ކުޅުމުގެ ފުރުސަތު ވަނީ ލިބިފައެވެ.

މި ނިންމުމާ ގުޅިގެން ފުޓްބޯޅައިގެ އެކި އިދާރާތަކާއި، އިސް ފަރާތްތަކުން ވަނީ ނުރުހުމުގެ ޝުއޫރުތައް ފާޅުކޮށްފައެވެ.

"ފޮލަރިން ބަލޮގަންއަށް ދެއްކި ރަތް ކާޑާ ގުޅިގެން އައި އެއް މެޗުގެ ސަސްޕެންޝަން ތަންފީޒުކުރުން އެއް އަހަރު ދުވަހުގެ ޕްރޮބޭޝަނަކަށްފަހު ފަސްކުރުމަށް އިއްޔެ ނިންމި ނިންމުމަކީ ކަނޑައެޅިގެން ރަތް ރޮނގު ހުރަސްކުރުމެއް. ރަތް ކާޑަކަށްފަހު އަންނަ މަދުވެގެން އެއް މެޗުގެ ސަސްޕެންޝަނަކީ އިޚުތިޔާރީ ކަމެއް ނޫން. އަދި އެއީ ވަކި އިދާރާއަކުން ގޮތެއް ނިންމަންޖެހޭ ކަމެއްވެސް ނޫން. އެއީ ގަވާއިދުގައި ކަނޑައެޅިގެން ބަޔާންވެގެންވާ، އިސްތިސްނާ ނުކުރެވޭނެ އުސޫލެއް. ޚާއްސަކޮށް، އެހެން ކުޅުންތެރިންވެސް ހަމަ މިފަދަ ހާލަތްތަކުގައި ސަސްޕެންޝަން ތަންފީޒުކުރަމުންދާ މުބާރާތެއްގެ މެދުތެރެއިން މިފަދަ ނިންމުމެއް ނިންމުމަކީ ބަލައިގަނެވޭނެ ކަމެއް ނޫން. ގަވާއިދުތައް ހިމާޔަތްކުރަން ތިބޭ ފަރާތްތަކުން މިފަދައިން އަމަލުކުރުމުން، ކުޅިވަރުގެ އިންސާފުވެރިކަން ގެއްލި، މުބާރާތުގެ އިތުބާރު ކެނޑިގެންދާނެ."

"ފީފާއިން މި ނިންމުން ނިންމާފައިވަނީ ޑިސިޕްލިނަރީ ކޯޑުގެ 27 ވަނަ މާއްދާއަށް ރިއާޔަތްކޮށް. އެ މާއްދާ ބުނާގޮތުން ފީފާގެ ޑިސިޕްލިނަރީ ކޮމިޓީއަށް އަދަބެއް ތަންފީޒުކުރުން ފަސްކުރުމުގެ ބާރު ލިބިގެންވޭ. ނަމަވެސް، ހަމަ އެ ކޯޑުގެ 66.4 ވަނަ މާއްދާގައި ސާފުކޮށް ބަޔާންކޮށްފައިވަނީ، ރަތް ކާޑެއް ދެއްކުމާއެކު އޮޓޮމެޓިކުން ޖެހިގެން އަންނަ މެޗަށް ސަސްޕެންޑްވާނެ ކަމަށް. މިއީ މި މުބާރާތުގައި މީގެ ކުރިން ރަތް ކާޑު ދެއްކި ހުރިހާ ކުޅުންތެރިންނަށްވެސް އަމަލުކުރި ގޮތް."

"ބަލޮގަންގެ ރަތް ކާޑު އުވާލުމުގެ ކުރިން ރައީސް ޓްރަމްޕާއި އިންފަންޓީނޯ ފޯނުން ވާހަކަދެއްކެވި ކަމަށް ފެތުރޭ ޚަބަރުތަކާ ގުޅިގެން ފީފާއިން ވަގުތުން ބަޔާނެއް ނެރެންޖެހޭ. ކުޅިވަރުގެ ތެރެއަށް ސިޔާސީ ނުފޫޒު ވަދެފައިވާ ކަމަށް ކުރެވޭ ތުހުމަތުތައް އަވަހަށް ސާފުކޮށްދޭންޖެހޭ. މިއީ މުބާރާތުގެ އަދުލުވެރިކަމާއި ފީފާގެ އަބުރާ ގުޅިފައިވާ ކަމެއް."

"މިއީ ނިންމި ނުބައި ނިންމުމެއް ކަމަށް އަޅުގަނޑުވެސް ގަބޫލުކުރަން. ކުޅިވަރުގެ ގަވާއިދުތަކާ މެދު ގޮތް ނިންމަންވާނީ ކުޅިވަރުގެ އިދާރާތަކުން، ސިޔާސީ ބޭފުޅުންނެއް ނޫން. ކުޅިވަރުގެ ނިންމުންތަކަށް ނުފޫޒު ފޯރުވުމަކީ ކުޅިވަރުގެ މިނިވަންކަން ގެއްލޭނެ ކަމެއް. އަޅުގަނޑުމެން ސަމާލުކަން ދޭންވީ ސިޔާސީ ބޭނުންތަކަށް ކުޅިވަރު ހަތިޔާރަކަށް ހެދުން ހުއްޓުވުމަށް."

"މި ޖުލައި މަހުގެ 5 ވަނަ ދުވަހަކީ އޭޕްރީލް ފޫލްގެ ދުވަސް ކަމެއް އަޅުގަނޑަކަށް ނޭނގޭ. އަޅުގަނޑުމެން މި ވަކާލާތުކުރަނީ ހަމައެކަނި ޤައުމީ ޓީމަކަށް ނޫން، މުޅި ފުޓްބޯޅައިގެ ހައްގުގައި."

"ސިޔާސީ ފޯނު ކޯލަކުން ރަތް ކާޑު އުވައެއް ނުލެވޭނެ. ރަތް ކާޑު އުވާލެވޭނީ ގަވާއިދާއި، ހެއްކާއި، މިނިވަން މުއައްސަސާތަކުގެ ތެރެއިން. އެމެރިކާގެ ރައީސަކު ފީފާގެ ރައީސަށް ނުފޫޒު ފޯރުވައިގެން މުހިންމު މެޗެއްގެ ކުރިން ކުޅުންތެރިއަކު ސަލާމަތްކުރުމުން އުފެދޭ ސުވާލަކީ، ފީފާ މި މިސްރާބު ޖަހަނީ ކޮން ދިމާލަކަށްތޯ؟ ފުޓްބޯޅައަކީ ސިޔާސީ ބާރުވެރިކަން ދައްކާ ކުޅޭ ކުޅިވަރަކަށް ވެގެން ނުވާނެ."

"އެންމެ ފުރަތަމަ ކަމަކަށް، އެއީ ރަތް ކާޑު ދައްކަންޖެހޭ ވަރުގެ ކަމެއް ނޫން. ނަމަވެސް ވީޑިއޯ އެސިސްޓަންޓް ރެފުރީ (ވީއޭއާރް) ބަލާފައި އެއީ ރަތް ކާޑެއް ކަމަށް ނިންމައި ރެފުރީ ވަނީ އޭނާ ބޭރުކޮށްފައި. އެހެންކަމުން އެއީ ނިމިފައި އޮތް ނިންމުމެއް. ދެން ކޮން އުސޫލަކުން، ކޮން ބަޔަކު މި ނިންމުން ބަދަލުކުރީ؟ މިއީ ވަރަށް އާދަޔާ ޚިލާފު ކަމެއް. އަޅުގަނޑުމެން އެދެނީ ހުރިހާ ނިންމުމެއްގައިވެސް އެއް އުސޫލެއް ހިފެހެއްޓުމަށް."

"މިއީ ފީފާއިން ހެދި ބޮޑު ގޯހެއް. ވީއޭއާރްއިން ބަލާފައި ރަތް ކާޑެއް ދިނުމުން، އޭގެ މާނައަކީ އެއް މެޗަށް ސަސްޕެންޑްވުން. މިކަމުގެ ސަބަބުން އެމެރިކާ ޓީމަށްވެސް ނޭދެވޭ އަސަރުކުރާނެ. އެމީހުން ބެލްޖިއަމް އަތުން މޮޅުވިޔަސް، އަބަދުވެސް މި ނިންމުމުގެ ސުވާލު އެމީހުންނާ އަމާޒުވާނެ. މިއީ މުޅި މުބާރާތަށާއި ކުޅިވަރަށް ލިބުނު ދެރައެއް."

"މިއީ އަޅުގަނޑުމެންގެ ކުޅިވަރެއް، އެމީހުންގެ ކުޅިވަރެއް ނޫން. ޑޮނަލްޑް ޓްރަމްޕާއި އިންފަންޓީނޯއާ ދެމެދު މިކަން ނިންމިނަމަ، އެއީ ބޮޑު މޮޔަކަމެއް. ފުޓްބޯޅައާ ބެހޭ އެއްވެސް މައުލޫމާތެއް ނެތް މި ދެ މީހުންނަކީ މިފަދަ ކަންކަމުގެ ތެރެއަށް ވަދެގެންވާނެ ބައެއް ނޫން."