ކްލަބް މޯލްޑިވްސް ފުޓްސަލް ސީޒަންގައި ހިމެނޭ ކްލަސިލް 2026 ގެ ކުއާޓާ ފައިނަލަށް ކުލަބު އެވްސެކް، ކުލަބު ކްރިމިނަލް ކޯޓު (ސީއާރްސީ) އަދި އިޤުތިޞާދީި ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވުޒާރާ (އެމްއީޑީޓީޓީ) ދަތުރުކޮށްފިއެވެ.

ހުޅުމާލެ ރެހެންދި ފުޓްސަލް ދަނޑުގައި ކުރިއަށްދާ ކްލަސިކް މުބާރާތުގައި 19 ޓީމެއް ވާދަކުރެއެވެ. މި ޓީމުތައް ހަތަރު ގްރޫޕަކަށް ބަހާލާފައިވާއިރު، ގްރޫޕް އޭ، ބީ އަދި ސީގައި ފަސް ޓީމު ހިމެނެއެވެ. އަދި ގްރޫޕް ޑީގައި ހިމެނެނީ ހަތަރު ޓީމެވެ.

މި މުބާރާތުގެ ކުއާޓާގެ ޖާގައެއް ގްރޫޕް އޭގައި ހިމެނޭ އެވްސެކް އިން ހޯދީ ރޭ ކުޅުނު މެޗުގައި ފަހަތުން އަރައި 4-1 ގެ ނަތީޖާއަކުން އެންމެ ފަހުގެ ޗެމްޕިއަން ޓީމު އެޗްޕީއެސްއެން ބަލިކުރުމަށްފަހުއެވެ. މި ގްރޫޕުގެ އަނެއް މެޗުގައި ރޭ ރައްޔިތުންގެ މަޖިލިސް އިދާރާ (ޕެމާ) އިން ވަނީ 10-4 ގެ ތަފާތު ބޮޑު ނަތީޖާއަކުން ބަންޑާރަ ކުލަބު ބަލިކޮށްފައެވެ.

ރޭގެ މެޗުތަކާ ކުރިމަތިލުމުގެ ކުރިން މި ގްރޫޕުގެ އެއްވަނައިގައި އޮތް ހުޅުމާލެ ހޮސްޕިޓަލުން ވަނީ ކުޅުނު ހަތަރު މެޗުވެސް ކާމިޔާބުކޮށް، 12 ޕޮއިންޓާއެކު ކުއާޓާގެ ޖާގައެއް ކަށަވަރުކޮށްފައެވެ. ރޭގެ މޮޅާއެކު އެވްސެކަށް ދެވަނަ ލިބުނީ ނުވަ ޕޮއިންޓާއެކުއެވެ. ތިންވަނައަށްދިޔަ އެޗްޕީއެސްއެންއަށް ހަ ޕޮއިންޓް ލިބުނުއިރު، ހަތަރުވަނައިގައި ނިންމި ޕެމާއަށް ވަނީ ތިން ޕޮއިންޓް ލިބިފައެވެ. އަދި ފުލަށްދިޔަ ބަންޑާރަ ކުލަބަށް ޕޮއިންޓެއް ލިބިފައެއް ނުވެއެވެ.

މީގެ އިތުރުން ގްރޫޕް ބީގެ އެއްވަނަ ޓީމުގެ ގޮތުގައި ކުއާޓާއަށް ދަތުރުކުރީ ސީއާރްސީން ވަނީ ރޭ ކުޅުނު މެޗުގައި ކުލަބު އެސްއެމްއީ ޑިޖިޓަލް އަތުން ފަސޭހަކަމާއެކު 7-0 ގެ ނަތީޖާއަކުން މޮޅުވެފައެވެ. މި ގްރޫޕުގެ އަނެއް މެޗުގައި 5-1 ގެ ނަތީޖާއަކުން ހެލްތު ރެކްރިއޭޝަން ކުލަބު ބަލިކޮށް، ދެވަނަ ޓީމުގެ ގޮތުގައި ކުއާޓާއަށް ދަތުރުކުރީ އެމްއީޑީޓީޓީއެވެ.

މި ނަތީޖާތަކާއެކު ގްރޫޕް ބީގެ އެއްވަނަ ސީއާރްސީއަށް ލިބުނީ 10 ޕޮއިންޓާއެކުއެވެ. ދެވަނައަށް ދިޔަ އެމްއީޑީޓީޓީއަށް ނުވަ ޕޮއިންޓް ލިބުނުއިރު، ތިންވަނަ ހޯދި ކުލަބު ޑީޖޭއޭއަށް ލިބުނީ ފަސް ޕޮއިންޓެވެ. އަދި ހަތަރުވަނައިގައި ނިންމި ހެލްތަށް ހަތަރު ޕޮއިންޓް ލިބުނުއިރު، ފުލަށްދިޔަ އެސްއެމްއީ ޑިޖިޓަލަށް ޕޮއިންޓެއް ލިބިފައެއް ނުވެއެވެ.

މި މުބާރާތުގެ ގްރޫޕް ސްޓޭޖުގެ ފަހު މެޗުތައް މިރޭ ކުޅެވިގެންދާނެއެވެ.