ދިވެހި ޤައުމުގެ ތާރީޚުގައި ފާހަގަކޮށްލެވޭ އުފާވެރި ދުވަހެއްގެ ގޮތުގައި ނަސްރުގެ ދުވަސް ފާހަގަކުރުމަށް ބޭއްވުނު ޖަލްސާގައި ފެނިގެންދިޔަ މަންޒަރަކީ، ގިނަ ދިވެހިންގެ ހިތްތަކަށް އުފާވެރިކަމާއި ހިތްހަމަޖެހުން ގެނެސްދިން މަންޒަރެކެވެ. މި ޖަލްސާގައި ކުރީގެ ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލްޤައްޔޫމަށް ދަޢުވަތު ދެއްވައި، އަދި ވާހަކަފުޅު ދެއްކެވުމަށް ފުރުސަތު ދެއްވުމަކީ، މިހާރުގެ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ޤައުމީ އެއްބައިވަންތަ ކަމަށާއި ހިދުމަތްތެރިންގެ އަގު ވަޒަން ކުރައްވާކަން ހާމަކޮށްދޭ ކަމެކެވެ.

ދިވެހި ޤައުމުގެ ތަރައްޤީއާއި ކުރިއެރުމަށް އެތައް އަހަރެއްގެ ޚިދުމަތް ކުރައްވާފައިވާ ބޭފުޅެއްގެ ހައިސިއްޔަތުން، ރައީސް މައުމޫން މި ދަޢުވަތު ޤަބޫލުކުރައްވައި ޖަލްސާއަށް ވަޑައިގެން ޤައުމާ މުޚާޠަބުކުރެއްވުމަކީ، ޤައުމުގެ ހަމަޖެހުމާއި ކުރިއެރުމަށް އެޅުނު ވަރަށް މުހިންމު ފިޔަވަޅެކެވެ. މިކަމުން ހާމަވެގެންދަނީ ރައީސް މައުމޫންގެ ހިތްޕުޅުގައި ޒާތީ ތަޢައްޞުބެއް ނެތްކަމާއި، ޤައުމު ދެކެ ލޯބިވާ ވެރިންގެ ފަރާތުން ފެންނަންޖެހޭ ތަހުޒީބުގެ އަގު ވަޒަންކުރައްވާކަމެވެ.

މި އުފާވެރި މަންޒަރު ފެނިގެން ދިޔައީ ވަރަށް ދިގު އިންތިޒާރަކަށް ފަހު ގައެވެ. ގިނަ ދިވެހިންގެ ހިތްތަކުގައި އޮތް އުއްމީދެއް ޙަޤީޤަތަކަށް ވެގެންދިޔަ މަންޒަރެކެވެ. މިއީ ހަމައެކަނި ރައީސް މުޢިއްޒަށާއި ރައީސް މައުމޫނަށް ކުރާ އިޙްތިރާމް އިތުރު ވެގެންދިޔަ ކަމެއް ނޫނެވެ. މުޅި ދިވެހި ޤައުމަށް ލިބުނު ފަޚުރުވެރި ވަގުތެކެވެ.

މާޒީގެ ހަނދާންތައް އާކޮށްލަމުން، އަޅުގަނޑުގެ ހިތަށް އަންނަނީ ކުރީގެ ރައީސް މައުމޫންގެ ވެރިކަމުގައި ޤައުމަށް ލިބުނު އެތައް ކުރިއެރުންތަކެކެވެ. ތަޢުލީމީ ދާއިރާއިން ފެށިގެން، ޞިއްޙީ ދާއިރާއާއި، ފަތުރުވެރިކަމުގެ ދާއިރާއިން ލިބުނު ކުރިއެރުންތަކެވެ. އަދި މިހާރުގެ ރައީސް މުޢިއްޒުގެ ވެރިކަމުގައި ޤައުމު ކުރިއަރަމުންދާ ދިއުމެވެ. މި ދެ ވެރިން އެއް މަންޞަތެއްގައި ބައްދަލުވެ، ޤައުމީ މަޞްލަޙަތު އިސްކުރައްވައި، އެކުވެރިކަމާއެކު މުޚާޠަބުކުރެއްވި މަންޒަރަކީ ޤައުމީ ލޯބި އާލާވެގެންދިޔަ މަންޒަރެކެވެ.

ސޯޝަލް މީޑިއާގައި ވެސް މިކަމާ ގުޅޭގޮތުން އެކި މީހުން ދަނީ ޚިޔާލު ފާޅުކުރަމުންނެވެ. ގިނަ ބަޔަކު މިކަމަށް ތާއީދުކޮށް، މިފަދަ އުފާވެރި މަންޒަރުތައް އިތުރަށް ފެނުމުގެ އުއްމީދު ފާޅުކުރަމުންދެއެވެ. އާންމު ރައްޔިތުންގެ ތެރެއިން ގިނަ ބަޔަކު ދެކޭ ގޮތުގައި މިއީ ޤައުމީ އެއްބައިވަންތަކަމާއި އެކުވެރިކަން އާލާކުރުމަށް އެޅުނު މުހިންމު ފިޔަވަޅެކެވެ.

މިފަދަ އުފާވެރި މަންޒަރުތައް ގިނައިން ފެނުމަކީ ދިވެހި ރައްޔިތުން ވަރަށް ބޮޑަށް އެދޭ ކަމެކެވެ. ޤައުމުގެ ކުރިއެރުމާއި ތަރައްޤީއަށްޓަކައި، ކުރީގެ ވެރިންނާއި މިހާރުގެ ވެރިން އެކުގައި މަސައްކަތް ކުރުމަކީ ވަރަށް މުހިންމު ކަމެކެވެ. މިއިން ކޮންމެ ވެރިއެއްގެ ތަޖުރިބާއާއި ޙިކުމަތްތެރިކަމަކީ ޤައުމަށް ބޭނުންތެރި އަގުހުރި އެއްޗެކެވެ.

މި ޖަލްސާގައި ފެނިގެން ދިޔަ މަންޒަރަކީ ދިވެހި ޤައުމުގެ ވަޙުދަތާއި އެއްބައިވަންތަކަން އާލާވެ، ކުރިމަގަށް އުއްމީދީ ނަޒަރަކުން ބެލުމުގެ ފުރުޞަތު ލިބިގެންދިޔަ ވަގުތެކެވެ. ޤައުމީ ލޯތްބާއި އެކުވެރިކަމުގެ ރޫޙު އާލާވެ، ކުރިއަށް އޮތް ދުވަސްތަކުގައި މިފަދަ ގިނަ މަންޒަރުތަކެއް ފެނިގެންދާނެކަމުގެ އުއްމީދު އާވެގެންދިޔައެވެ. މިއީ ހަމަ ޔަޤީނުންވެސް ދިވެހި ޤައުމުގެ ފަޚުރުވެރި ޞަފުޙާއެއްގައި ރަން އަކުރުން ލިޔެވިގެންދާނެ ތާރީޚީ ވަގުތެކެވެ.