ENGLISH

04 އޭޕްރީލު 2025

Advertisement

އަންނަ އަހަރުގެ އަމާޒަކީ އިތުރު ތިން ލައްކަ ފަތުރުވެރިން ގެނައުން: މިނިސްޓަރ ފައިސަލް

26 ޑިސެމްބަރު 2024

|

އަހުމަދު ސައީދު

އަންނަ އަހަރުގެ އަމާޒަކީ ފަތުރުވެރިންގެ އަދަދު ތިން ލައްކަ އިތުރުކޮށް، ފަތުރުވެރިކަމުން ލިބޭ އާމްދަނީ ފަސް ބިލިއަން ޑޮލަރަށް އެރުވުން ކަމަށް ފަތުރުވެރިކަމާއި ބެހޭ ވަޒީރު އިބްރާހިމް ފައިސަލް ވިދާޅުވެއްޖެއެވެ.

ފައިސަލް މިހެން ވިދާޅުވީ ދެ މިލިއަން ވަނަ ފަތުރުވެރިޔާއަށް މަރުޙަބާ ކިޔުމަށް ވެލާނާ އިންޓަނެޝަނަލް އެއާޕޯޓުގައި މިއަދު ހެނދުނު ބޭއްވި ރަސްމިއްޔާތަށް ފަހު، ނޫސްވެރިންނާ ވާހަކަ ދައްކަވަމުންނެވެ. 

ފައިސަލް ވިދާޅުވީ މި އަހަރަކީ ރާއްޖޭގެ ފަތުރުވެރިކަމުގެ ދާއިރާއިން ފާހަގަކޮށްލެވޭ، ގިނަ ރެކޯޑުތަކެއް ހެދުނު ކާމިޔާބު އަހަރެއް ކަމަށެވެ. އެއް ދުވަހާއި އެންމެ ގިނަ ފަތުރުވެރިން ޒިޔާރަތް ކުރުމުގެ ރިކޯޑާއި އެއް މަސް ދުވަހުގެ ތެރޭގައި އެންމެ ގިނަ ފަތުރުވެރިން ޒިޔާރަތް ކުރުމުގެ ރިކޯޑު މިއަހަރުގެ ފެބްރުއަރީ މަހު ވަނީ ހާސިލުވެފައެވެ. 

"އަޅުގަނޑުމެންގެ އަމާޒަކީ މުޅި ސަރުކާރާއި މުޅި ޓީމު ގުޅިގެން މި އަންނަ އަހަރު 15 އިންސައްތަ ކުރިއެރުމެއް އެރައިވަލްސްއިން ހޯދުން. އަދި ރެވެނިއުއަށް ބަލާލާއިރު ގާތްގަނޑަކަށް 5 ބިލިޔަން ޑޮލަރާއި ގާތަށް އަޅުގަނޑަށް ގަބޫލުކުރެވެނީ ފަތުރުވެރިކަމުގެ ރެވެނިއު ދާނެކަމަށް. މިއީވެސް ވަރަށް ބޮޑު ކުރިއެރުމެއް،" ފައިސަލް ވިދާޅުވިއެވެ.

މި އަހަރުގެ މިހާތަނަށް ދެ މިލިއަން ފަތުރުވެރިން ހަމަވެފައިވާއިރު، އަންނަ އަހަރުގެ ލަނޑުދަނޑި ހާސިލުކުރެވިއްޖެނަމަ 2.3 މިލިއަން ފަތުރުވެރިން ރާއްޖެއަށް ޒިޔާރަތް ކުރާނެއެވެ. 

ފައިސަލް އިތުރަށް ވިދާޅުވީ ފަތުރުވެރިކަމާއި ގުޅުންހުރި ޓެކްސް އާއި ޤަވާއިދުތަކަށް އައިސްފައިވާ ބަދަލުތަކާއި ގުޅިގެން ފަތުރުވެރިކަމަށް، ނެދެވޭ އަސަރެއް ނުކުރާނެ ގޮތަކަށް މަސައްކަތް ކުރައްވާނެ ކަމަށެވެ. ރާއްޖޭގެ ޤައުމީ އުފެއްދުންތެރިކަމުގެ 30 އިންސައްތަ ހިއްސާކުރަނީ ފަތުރުވެރިކަމުގެ ދާއިރާއެވެ. 

ކިޔުންތެރިންގެ ހިޔާލު