ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ އާ ޓާމިނަލުގެ މަސައްކަތް ހަލުވިކުރަން އަބޫދާބީ ފަންޑް ފޯ ޑިވެލޮޕްމެންޓް (އޭޑީއެފްޑީ) އިން އިތުރު 40 މިލިއަން ޑޮލަރުގެ ލޯނެއް ނަގަން އެއްބަސްވެއްޖެ އެވެ.

އަބޫދާބީ ފަންޑުން އިތުރު 40 މިލިއަން ޑޮލަރުގެ ލޯނެއް ނެގުމުގެ އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ފިނޭންސް މިނިސްޓަރު މޫސާ ޒަމީރެވެ. އޭޑީއެފްޑީގެ ފަރާތުން ސޮއިކުރައްވާފައި ވަނީ އެ ފަންޑުގެ ޑިރެކްޓަ ޖެނެރަލް މުހައްމަދު ސައިފް އައްސުވައިދީ އެވެ.

އާ ޓާމިނަލުގެ މަސައްކަތް ފުރިހަމަ ކުރުމުން އަހަރަކު 7.5 މިލިއަން ފަސިންޖަރުންނަށް ޚިދުމަތް ދެވޭނެ ކަމަށް ވީއައިއޭ އިން ލަފާކުރެ އެވެ.

ސަރުކާރުން އަމާޒު ހިފާފައި ވަނީ އަންނަ އަހަރުގެ މެދު ތެރޭގައި އާ ޓާމިނަލުގެ މަސައްކަތް ނިންމައި ޚިދުމަތްދޭން ފެށުމަށެވެ.

ވީއައިއޭގައި ތަރައްގީކުރާ އާ ޓާމިނަލުގެ މަސައްކަތް ހަލުވިކުރަން މީގެކުރިން ވެސް އިތުރު ދެ ލޯނެއް ވަނީ ނަގާފަ އެވެ. އެގޮތުން ސައުދީ ފަންޑް ފޯ ޑިވެލޮޕްމަންޓް (ސައުދީ ފަންޑް) އިން 180 މިލިއަން ޑޮލަރު އަދި އަބޫދާބީ ފަންޑުން 50 މިލިއަން ޑޮލަރުގެ ލޯނުތަކެއް ނެގި އެވެ.

އެއްބަސްވުމާ ގުޅޭގޮތުން ޒަމީރު ވިދާޅުވީ ވީއައިއޭ ތަރައްގީ ކުރުމުގެ މަޝްރޫއަކީ ރާއްޖޭގެ ގައުމީ ތަރައްގީގެ އަމާޒަށް ވާސިލުވާން މަގުފަހިވާނެ މަޝްރޫއެއް ކަމަށެވެ. އަދި މަޝްރޫއުގެ ސަބަބުން ފަތުރުވެރިކަމުގެ ސިނާއަތުން ލިބޭ އާމްދަނީ އިތުރުވާނެ ކަމަށެވެ.

ފިނޭންސް މިނިސްޓަރު ވަނީ ރާއްޖޭގެ ތަރައްގީއަށް ޔުނައިޓެޑް އަރަބް އެމިރޭޓްސް (ޔޫއޭއީ) އިން ފޯރުކޮށްދެމުން އަންނަ އެހީތެރިކަމަށް އެ ގައުމަށާ އަދި ހާއްސަކޮށް އަބޫދާބީ ފަންޑަށް ޝުކުރުއަދާކުރައްވާފަ އެވެ.

އޭޑީއެފްޑީގެ ޑިރެކްޓަ ޖެނެރަލް ވިދާޅުވި ގޮތުގައި މި އެއްބަސްވުމުން އެކުވެރި ގައުމުތަކުގެ އުމްރާނީ ތަރައްގީގައި އެ ފަންޑުން އަދާކުރާ ދައުރު އިތުރަށް ހާމަވާ ކަމަށެވެ. ވީއައިއޭގެ ޓާމިނަލް ޒަމާނީ ފެންވަރަށް ތަރައްގީ ކުރުމަކީ ރާއްޖެއަށް ލިބޭނެ ބޮޑު ކުރިއެރުމެއްކަން އޭނާ ފާހަގަކުރެއްވި އެވެ. އަދި މި މަޝްރޫއާ އެކު ރާއްޖޭގެ ފަތުރުވެރިކަމުގެ ސިނާއަތަށް އޮތް ޑިމާންޑަށް ކޭޓާކުރުމުގެ ގާބިލުކަން އިތުރުވާނެ ކަމަށް ވެސް ވިދާޅުވި އެވެ.