ރައީސުލްޖުމްހުރިއްޔާ ޑރ.މުހައްމަދު މުޢިއްޒަކީ ރާއްޖޭގެ މިނިވަންކަމާއި އިސްތިޤުލާލު ރައްކާތެރި ކުރައްވާނެ ރައީސެއް ކަމަށް ހިތަދޫ މެދު ދާއިރާގެ މެމްބަރު އަހްމަދު އަޒާން މަރުޒޫގު ވިދާޅުވެއްޖެއެވެ.

ވެރިކަމަށް ރައީސުލްޖުމްރިއްޔާ ޑރ. މުއްމަދު މުޢިއްޒު ވަޑައިގެންނެވިތާ މާ ގިނަ ދުވަސްތަކެއް ނުވެ ޤާނޫނު އަސާސީއަށް ގެންނަވާފައިވާ ބޮޑެތި ބަދަލުތަކަކީ މިކަމުގެ ހެއްކެއް ކަމަށާއި މިބަދަލުތަކަކީ އެމަނިކުފާނުގެ ރިޔާސީ ވަޢުދުފުޅުތަކުގެ ތެރޭގައި ހިމެނިވަޑައިގަންނަވާ ބަދަލުތަކެއް ކަމަށް އެމްއެމް ޓީވީގެ "ބޮޑު ޚަބަރު" ޕްރޮގްރާމުގައި ވާހަކަފުޅު ދައްކަމަވަމުން މެމްބަރު އަޒާންް ވިދާޅުވިއެވެ. އަދި މި ގެނެވުނު ބަދަލުތަކާއެކު ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުގެ މެމްބަރުންނާއި ރައްޔިތުންގެ ފުރިހަމަ ރުހުން ލިބިގެން ކަމަށް މެމްބަރު އަޒާން ފާހަގަކުރެއްވިއެވެ.

މީގެ އިތުރުން، މި ބަދަލާއެކު ރާއްޖޭގެ މިނިވަންކަމާއި އިސްތިޤްލާލަށް ގޮންޖަހާ އެމްޑީޕީ ފަދަ ޕާޓީއަކުން ވެރިކަމާ ހަވާލުވި ނަމަވެސް ދެން ރާއްޖޭގެ ސަރަޙައްދުން ބައެއް ގެއްލިގެން ނުދާނެ ކަމަށް މެމްބަރު އަޒާން ވިދާޅުވިއެވެ.