ރާއްޖެއަށް ސުނާމީ ކާރިސާ ކުރިމަތިވިތާ 20 އަހަރު ފުރުން ފާހަގަކުރުމުގެ ގޮތުން މާދަމާ ހެނދުނު 9:23 ގައި މުޅި ރާއްޖޭގައި ހަމަހިމޭންކަމުގެ ސުކޫތެއް ބޭއްވުމަށް ސަރުކާރުން ނިންމައިފިއެވެ.

މި ސުކޫތަކީ ސުނާމީ ކާރިސާގައި ނިޔާވި އަދި ގެއްލުނު މީހުންގެ ހަނދާނުގައި ބާއްވާ ސުކޫތެއްކަމަށް ކަލްޗަރ އެންޑް ހެރިޓޭޖް މިނިސްޓްރީން ސަރުކާރުގެ އެހެނިހެން ވުޒާރާތަކަށް ފޮނުވާފައިވާ ސާކިއުލާއެއްގައި ބުނެފައިވެއެވެ. މި ސާކިއުލާއާ ގުޅިގެން ހުރިހާ ވުޒާރާއަކުން ވެސް ވަނީ އެތަނެއްގައި މަސައްކަތްކުރާ ސިވިލް ސާވިސް މުވައްޒަފުންނާއި ސިޔާސީ މުވައްޒަފުންނަށް މި ސުކޫތުގައި ބައިވެރިވުމަށް އެދިފައެވެ.

މިކާރިސާގައި 82 މީހެއްގެ ފުރާނަ ގެއްލިފައިވާއިރު 24 މީހުން ވަނީ ވީނުވީއެއް ނޭނގި ގެއްލިފައެވެ. މިއީ ރާއްޖޭގެ ތާރީހުގައި ދުއް އެންމެ ކަޅު އަނދިރި ހާދިސާއެވެ. މި ބިރުވެރި ހާދިސާއަށް ކިތަންމެ ގިނަ ދުވަހެއް ވީ ނަމަވެސް ދިވެހިންގެ ހިތުން އެ ބިރުވެރި ދުވަސް ފިލައިގެނެއް ނުދާނެއެވެ.