މި ފަހަރުގެ ފީފާ ވޯލްޑް ކަޕުގެ "ރަން ބޫޓު" ހޯދުމުގެ ވާދަވެރިކަން މިވަނީ ތާރީޚީ ގޮތުން ފާހަގަކޮށްލެވޭ ފަދަ ފޯރިގަދަ މަރުހަލާއަކަށް ގޮސްފައެވެ.

މި ރޭހުގެ ކުރީގައި މިވަގުތު އުޅެނީ ކުޅުނު ދެ މެޗުން ފަސް ލަނޑު ޖަހާފައިވާ ލިއޮނެލް މެސީއެވެ. ކީލިއަން އެމްބާޕޭ އާއި އާލިން ހާލަންޑް، ކޮންމެ ކުޅުންތެރިއަކު ހަތަރު ލަނޑާއެކު އޮތީ ތާވަލުގެ ދެވަނައިގައެވެ. ވޯލްޑް ކަޕެއްގެ ފުރަތަމަ ދެ މެޗަށްފަހު، ތިން ކުޅުންތެރިއަކު ހަތަރު ލަނޑަށްވުރެ ގިނައިން ޖެހި މިއީ ތާރީޚުގައި ދެވަނަ ފަހަރެވެ. މީގެ ކުރިން މިފަދަ ކަމެއް ފެނިފައިވަނީ 1954 ވަނަ އަހަރެވެ.

ފުޓްބޯޅައިގެ މައިދާނުގައި މިހާރު ގުނާލެވޭ އެންމެ މޮޅު ފޯވާޑުންގެ ފަރާތުން މި ވޯލްޑް ކަޕުގައި ފެނިގެންދަނީ  ލަނޑުޖެހުމުގައި އާދަޔާ ޚިލާފަށް ކުރިހޯދަމުންނެވެ. އެގޮތުން އާޖެންޓީނާގެ ފުރަތަމަ މެޗުގައި އަލްޖީރިއާ ކޮޅަށް މެސީ ހެޓްރިކް ހަދައި، އެންމެ ގިނަ ލަނޑުގެ ރިކޯޑާ ހަމަކުރިއެވެ. އެއަށްފަހު އޮސްޓްރިއާއާ ދެކޮޅަށް އާޖެންޓީނާ ކުޅުނު މެޗުގައި މެސީ ޖެހި ދެ ލަނޑާއެކު، ވޯލްޑް ކަޕުގެ ލަނޑު ޖެހުމުގެ ރިކޯޑު މުގުރާލި މަންޒަރު ފެނިގެންދިޔައެވެ. އޭގެ ރައްދުގައި، ބައިނަލްއަގުވާމީ 100 ވަނަ މެޗުގައި އިރާގާ ދެކޮޅަށް އެމްބާޕޭވެސް ވަނީ ދެ ލަނޑު ޖަހާފައެވެ. އަދި ނޯވޭއިން ސެނެގޯލް ބަލިކޮށް، ދެވަނަ ބުރަށް ދަތުރުކުރި މެޗުގައި ހާލަންޑުވެސް ވަނީ ދެ ލަނޑު ޖަހާފައެވެ. މިއީ އޭނާގެ ފުރަތަމަ ވޯލްޑް ކަޕަށް ބަލާއިރު ވަރަށް ރަނގަޅު ފެށުމެކެވެ.

މި ކުޅުންތެރިންގެ މެދުގައި އޮތީ އެކަކަށްވުރެ އަނެކަކު ކުރިހޯދުމުގެ ރޫހެކެވެ. އަންގާރަ ދުވަހު އިންގްލެންޑުން ގާނާއާ ދެކޮޅަށް ނުކުންނައިރު، ހެރީ ކޭންއަށްވެސް އޭނާގެ ލަނޑުތައް އިތުރުކުރުމުގެ ފުރުސަތު އެބައޮތެވެ.

ދުނިޔޭގެ އެންމެ މޮޅު ކުޅުންތެރިން ބޮޑު މުބާރާތެއްގައި ރެކޯޑުތައް މުގުރަމުންދާއިރު، މިއީ ވަރަށް ޚާއްޞަ ކަންތައްތަކެއް ފެނިގެންދާނެ މުބާރާތެއްކަން މިހާރުވެސް ދަނީ ކަށަވަރުވަމުންނެވެ. 

މި މުބާރާތް ފެށުނުއިރު ވޯލްޑް ކަޕުގެ ތާރީޚުގައި އެންމެ ގިނަ ލަނޑު ޖެހި ކުޅުންތެރިއަކީ 16 ލަނޑާއެކު ޖަރުމަނުގެ މިރޮސްލާވް ކްލޯސާއެވެ. ނަމަވެސް އެންމެ ދެ މެޗަށްފަހު އުމުރުން 38 އަހަރުގެ މެސީ މިވަނީ 28 މެޗުން 18 ލަނޑު ހަމަކޮށް އެ ރިކޯޑު މުގުރާލާފައެވެ. އެމްބާޕޭވެސް އުޅެނީ މާ ފަހަތަކު ނޫނެވެ. އޭނާ މިހާރު ވަނީ 16 މެޗުން 16 ލަނޑު ޖަހައި ކްލޯސާގެ އަދަދާ އަރާ ހަމަކޮށްފައެވެ. އެމްބާޕޭ އާއި ކޭންގެ އަމާޒަކީ ދެ ފަހަރަށް ރަންް ބޫޓު ހޯދާ ފުރަތަމަ ކުޅުންތެރިޔާއަށް ވުމެވެ.

ހާލަންޑާ ބެހޭގޮތުން ވާހަކަ ދައްކަމުން ކުރީގެ ފޯވާޑް އެލީ މެކޯއިސްޓް ބުނީ، ފުޓްބޯޅަ ކުޅުމުގެ ހުނަރަށް ބަލާއިރު މެސީ އާއި އެމްބާޕޭ ކުރީގައި އުޅުނު ނަމަވެސް، ގޯލަށް ބޯޅަ ފޮނުވާލުމުގައި ހާލަންޑަކީ ދެވަނައެއް ނެތް ކުޅުންތެރިއެއް ކަމަށެވެ.

މި މުބާރާތުގައި ރިކޯޑުތައް އަންނަނީ ފުލުފުލުން މުގުރެމުންނެވެ. އެމްބާޕޭ މިހާރު ވަނީ ފްރެންޗް ޓީމުގެ އެންމެ ގިނަ ލަނޑު ޖެހި ކުޅުންތެރިޔާއަށް ވެފައެވެ. ހާލަންޑް ނޯވޭގެ ރިކޯޑު މުގުރާލިއިރު، ކޭން ވަނީ އިންގްލެންޑުގެ ގެރީ ލިނެކާގެ ރެކޯޑާ އަރާ ހަމަކޮށްފައެވެ. މި ހުރިހާ ކުޅުންތެރިންގެ ލޯ އަމާޒުވެފައިވަނީ 1958 ވަނަ އަހަރު ޖަސްޓް ފޮންޓެއިން އެއް މުބާރާތެއްގައި ޖެހި 13 ލަނޑުގެ ރެކޯޑަށެވެ.

48 ޓީމު ބައިވެރިވާ އައު ފޯމެޓުގެ ސަބަބުން ގިނަ ލަނޑުތަކެއް ފެނުމުގެ ފުރުސަތު ބޮޑުވެފައިވާ ކަމަށް ތަޖުރިބާކާރުން ބުނެއެވެ. ފްރާންސްގެ ކުރީގެ ޑިފެންޑަރު ގޭލް ކްލިޝީ ބުނިގޮތުގައި، މިހާރުގެ ޒުވާން ޖީލުގެ ކުޅުންތެރިންނަކީ އެއްވެސް ބިރެއް ނެތި ކުޅޭ ބައެކެވެ.

ރަން ބޫޓާ ބެހޭގޮތުން އެމްބާޕޭ  ބުނެފައިވަނީ އޭނާ މިވަގުތު އެކަމާ ނުވިސްނާ ކަމަށާއި، އޭނާގެ ހަމައެކަނި އަމާޒަކީ ޓީމަށް އެހީތެރިވުން ކަމަށެވެ. ނޯވޭގެ ކޯޗު ސްޓޭލް ސޯލްބަކަން ބުނީ ހާލަންޑަކީ ދުނިޔޭގެ އެންމެ މޮޅު ފޯވާޑް ކަމަށާއި، އޭނާއަށް އިތުރު ފުރުސަތުތައް ހޯދައިދޭން މަސައްކަތްކުރާނެ ކަމަށެވެ.