ޒުވާނުންނަށް ވަޒީފާގެ ފުރުސަތު ތަނަވަސްކޮށް ދިނުމަށްޓަކައި ޤައުމީ ޚިދުމަތުގެ ޕްރޮގްރާމެއް ފައްޓަވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ އިޢުލާނު ކުރައްވައިފިއެވެ

މިރޭ ބޭއްވުނު ނަޞްރުގެ ދުވަހުގެ ޖަލްސާގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ މި ޕްރޮގްރާމަކީ ޤައުމުގެ ސަލާމަތާއި މިނިވަންކަން ފޯރުކޮށްދޭ، އަދި ޒުވާނުންނަށް ވަޒީފާގެ ފުރުޞަތު ހޯދައިދޭ މުހިންމު ޕްރޮގްރާމެއް ކަމަށެވެ. މި ޕްރޮގްރާމުގެ ދަށުން، އުމުރުން 16 އަހަރު ފުރި އޯލެވެލް ނިންމާފައިވާ ނުވަތަ ތަޢުލީމު ޙާޞިލުކުރެވުނު ހިސާބަކުން ދެން މަތީ ދަރަޖައިގެ ތަޢުލީމު ޙާޞިލު ކުރުމުގެ ފުރުޞަތު ނުލިބޭ ކުދިން މި ޕްރޮގްރާމުގައި ބައިވެރިވާން ޖެހޭނެކަމަށެވެ.

ރައީސް ވިދާޅުވި ގޮތުގައި، ކޮންމެ އަހަރަކު 2,500 އާއި 3,000 އާ ދެމެދުގެ އަދަދެއްގެ ކުދިން އޯލެވެލް އިމްތިޙާނުން ފާސްނުވެ އޭލެވެލްއަށް ނުދެވި، ވަޒީފާ ވެސް ނުލިބި ތިބޭ ކަމަށާއި، އަދި އޭލެވެލް ނިންމާފައި ޑިގްރީއަށް ނުފެށޭ ގާތްގަނޑަކަށް ކޮންމެ އަހަރަކުވެސް 500 އާއި 1,000 އާ ދެމެދުގެ އަދަދެއްގެ ކުދިން ތިބެއެވެ.

މި ޕްރޮގްރާމުގެ ދަށުން، ބައިވެރިވާ ކުދިންނަށް މިލިޓަރީ ތަމްރީނު ދެވޭނެ ކަމަށާއި، އޭގެ ފަހުން ސިފައިންގެ ނުވަތަ ފުލުހުންގެ ޚިދުމަތަށް ބަދަލުވެވޭނެ ކަމަށް ރައީސް ވިދާޅުވިއެވެ. މި ޕްރޮގްރާމް ފެށުމަށް 2025 ވަނަ އަހަރުގެ ބަޖެޓުގައި 400 މިލިއަން ރުފިޔާ ހިމަނާފައިވާ ކަމަށާއި، ކޮންމެ އަހަރަކު އިތުރު 400 މިލިއަން ރުފިޔާ މި ކަމަށް ޚަރަދުކުރެވޭނެ ކަމަށް ރައީސް ވިދާޅުވިއެވެ.

ރައީސް މުޢިއްޒު ވިދާޅުވީ މި ޕްރޮގްރާމުގެ ސަބަބުން ކުރިއަށް އޮތް 4 އަހަރު ދުވަހުގެ ތެރޭގައި ސިފައިންގެއަށް 4,000 ކުދިންނާއި ފުލުހުންގެ ޚިދުމަތަށް 1,000 ކުދިން އިތުރުވެގެންދާނެ ކަމަށެވެ. އަދި މި ޕްރޮގްރާމުގެ ސަބަބުން ޒުވާނުންނަށް ވަޒީފާގެ ފުރުޞަތު ލިބި، ޤައުމުގެ ސަލާމަތާއި ރައްކާތެރިކަން އިތުރުވެގެންދާނެ ކަމަށް ރައީސް ވިދާޅުވިއެވެ.

މި ޕްރޮގްރާމަކީ ޤާނޫނީ ބާރު ލިބިގެން ހިންގޭ ޕްރޮގްރާމެއް ކަމަށާއި، މި ޕްރޮގްރާމުގެ ސަބަބުން ޒުވާނުންގެ މެދުގައި މަސްތުވާތަކެތީގެ ވަބާއިން ސަލާމަތްވެ، މުޖުތަމަޢުއަށާއި ޢާއިލާތަކަށް ކުރިމަތިވާ ގިނަ މައްސަލަތަކަށް ޙައްލު ލިބިގެންދާނެ ކަމަށްވެސް ރައީސް ވިދާޅުވިއެވެ.

ރައީސް މުޢިއްޒު އިތުރަށް ވިދާޅުވި ގޮތުގައި، މި ޕްރޮގްރާމުގެ ސަބަބުން ޤައުމުގެ އިޤްތިޞާދަށް ކުރާނެ ނޭދެވޭ އަސަރުތައް ކުޑަކުރެވި، ރަނގަޅު ތަރުބިއްޔަތެއް ލިބިފައިވާ، މިލިޓަރީ ތަމްރީނު ލިބިފައިވާ ޒުވާން ބަޔަކު އުފެދިގެންދާނެއެވެ. މީގެ ސަބަބުން ކުދިންނަށާއި، އާއިލާތަކަށާއި، ޤައުމަށާއި އަދި ސިފައިންނަށްވެސް ވަރަށް ބޮޑު ކުރިއެރުމެއް ލިބިގެންދާނެ ކަމަށް ރައީސް ފާހަގަކުރެއްވިއެވެ.

ރައީސް އިތުރަށް ވިދާޅުވީ، މި ޕްރޮގްރާމުގެ ދަށުން ކޮންމެ އަހަރަކު އިތުރު 1,000 ކުދިން ރެކްރޫޓް ކުރުމަކީ ކުރަންޖެހޭ ކަމެއް ކަމަށެވެ. އަދި ފުލުހުންގެ ޚިދުމަތްވެސް ފުޅާކުރަން ޖެހޭނެ ކަމަށާއި، ކުރިއަށް އޮތް 4 އަހަރު ދުވަހުގެ ތެރޭގައި 1,000 ފުލުހުން އިތުރުކުރަން ޖެހޭނެ ކަމަށް ވިދާޅުވިއެވެ.

މި ޕްރޮގްރާމް ފެށުމާއެކު، ޖުމްލަ 5,000 އެއްހާ ޒުވާނުންނަށް ވަޒީފާގެ ފުރުޞަތު ލިބި، ތަޢުލީމީ ގޮތުން ކުރިއަށްދިއުމުގެ ފުރުޞަތު ނެތިފައިވާ ގިނަ ކުދިންނަށް ރަނގަޅު ތަމްރީނާއި ވަޒީފާގެ ފުރުޞަތު ލިބިގެންދާނެ ކަމަށް ރައީސް ވިދާޅުވިއެވެ. އަދި މިއީ ސިފައިންގެ މަސައްކަތަށްވެސް ގިނަ ބަޔަކު ލިބި، ޤައުމީ ސަލާމަތަށް ފައިދާކުރާނެ ކަމެއް ކަމަށްވެސް ރައީސް ފާހަގަކުރެއްވިއެވެ.

ރައީސް މުޢިއްޒު ނިންމަވާލައްވަމުން ވިދާޅުވީ، މި ޕްރޮގްރާމަކީ ދިވެހިރާއްޖޭގެ ޤައުމީ ޚިދުމަތުގެ ޕްރޮގްރާމުގެ ގޮތުގައި "ނޭޝަނަލް ސަރވިސް" ގެ ނަމުގައި މި އަންނަ އަހަރުން ފެށިގެން ކޮންމެ އަހަރަކު ހިންގާނެ ޤައުމީ ޕްރޮގްރާމެއް ކަމަށެވެ. އަދި މި ޕްރޮގްރާމުގެ ސަބަބުން ޤައުމަށް ވަރަށް ގިނަ ފައިދާތަކެއް ކުރާނެ ކަމަށް އުންމީދުކުރައްވާ ކަމަށްވެސް ރައީސް ވިދާޅުވިއެވެ.