ދިވެހިރާއްޖޭގެ ކުރީގެ ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލްޤައްޔޫމް ވަނީ 3 ނޮވެމްބަރުގެ މުނާސަބަތުގައި ސަރުކާރުން ބޭއްވި ރަސްމީ ޖަލްސާގައި މުހިންމު ޚިޠާބެއް ދެއްވާފައެވެ. މި ޖަލްސާއަށް ދައުވަތު ދެއްވި ކަމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ޝުކުރު ދަންނަވަމުން، މި ޖަލްސާގައި ބައިވެރިވުމަކީ އެމަނިކުފާނަށް ލިބުނު ވަރަށް ބޮޑު އުފަލެއް ކަމުގައި ފާހަގަކުރެއްވިއެވެ.

ކުރީގެ ރައީސް އަލްއުސްތާޛު މައުމޫން ޢަބްދުލްޤައްޔޫމް ވިދާޅުވީ، ދިވެހިރާއްޖޭގެ މިނިވަންކަމާއި ސިޔާދަތު ވަރުގަދަ ކުރެއްވުމަށްޓަކައި ރައީސުލްޖުމްހޫރިއްޔާ ޑރ. މުޢިއްޒު ގެންގުޅުއްވާ ހަރުދަނާ ސިޔާސަތަށް ތާއީދު ކުރައްވާ ކަމަށެވެ. އަދި 3 ނޮވެމްބަރަކީ ރާއްޖެއަށް ކުރިމަތިވި އެންމެ ބިރުވެރި ހާދިސާ ކަމަށް ފާހަގަކުރެއްވިއެވެ.

އެމަނިކްފާން އިތުރަށް ވިދާޅުވީ، 3 ނޮވެމްބަރުގެ ހާދިސާ ހިނގަމުން ދިޔައިރުވެސް ދިވެހިންގެ ވަރުގަދަ އެއްބައިވަންތަކަމުގެ މަންޒަރުތައް ފެނިފައިވާ ކަމަށެވެ. ސަރުކާރާ މެދު ހިތްހަމަ ނުޖެހިފައި ތިބި މަދު ބަޔަކު ތިބި ނަމަވެސް އެދުވަހު އެންމެންވެސް ތިބީ ސަރުކާރާ އެކީގައި ކަމަށް ފާހަގަކުރެއްވިއެވެ.

މީގެ އިތުރުން، ދިވެހިރާއްޖޭގެ ސިޔާދަތު ތާއީދު ކުރައްވާ އެކުވެރި ޤައުމުތަކަށާއި ބައިނަލްއަޤްވާމީ ޖަމްޢިއްޔާތަކަށް ޝުކުރު ދެންނެވިއެވެ. ޚާއްޞަކޮށް އިންޑިއާގެ ރަޙުމަތްތެރި ސަރުކާރަށާއި އިންޑިއާ ސިފައިންނަށް ޝުކުރު އަދާކުރެއްވިއެވެ.

އިތުރަށް ކުރީގެ ރައީސް މައުމޫން ވިދާޅުވީ، 3 ނޮވެމްބަރުގެ ހާދިސާއިން ދިވެހި ރައްޔިތުންނަށް ވަރަށް ގިނަ ފިލާވަޅުތަކެއް ދަސްކޮށްދޭ ކަމަށާއި، އަދި ޙާޞިލުކޮށްދޭ ޢިބްރަތްތައްވެސް އެހާ މުހިންމު ކަމަށެވެ.

އެމަނިކުފާނު އިތުރަށް ވިދާޅުވީ، ދުނިޔޭގެ ކަންތައްތައް ބަދަލުވަމުންދާ ގޮތުން ރާއްޖޭގެ ޤައުމީ މަސްރަޙަށް އައި ނަމަވެސް، އަދި ޒަމާނާ އެކަށީގެން ވާގޮތަށް ރާއްޖޭގެ ޤާނޫނުތަކާއި ގަވާއިދުތައް ބަދަލުވަމުން ދިޔަ ނަމަވެސް، ރާއްޖޭގައި ސިޔާސީ ޕާޓީތަކެއް އުފެދި ހިންގަމުން ދިޔަ ނަމަވެސް، މިއީ އެވެސް ކަމެއްގެ ސަބަބުން ދިވެހިންގެ ޤައުމީ ވަޙްދަތަށް އުނިކަމެއް އައިސްގެން ނުވާނެ ކަމަށެވެ.

އެމަނިކުފާނު އިންޑިއާގެ ސަރުކާރާއި ސިފައިންނަށް ޚާއްޞަ ޝުކުރެއް އަދާކުރެއްވިއެވެ. އެންމެ ފުރަތަމަ އެދުވަހު އަޅުގަނޑުމެނަށް އަމަލީ ގޮތުން އެހީތެރިވެދިން އިންޑިޔާގެ ރަޙުމަތްތެރި ސަރުކާރަށާއި އިންޑިޔާ ސިފައިންނަށް އަޅުގަނޑުމެންގެ ހިފެހެއްޓުމެއް ނެތް ޝުކުރު އަބަދުވެސް އޮންނާނެ ކަމަށް ވިދާޅުވިއެވެ.

މީގެއިތުރުން، ކޮމަންވެލްތާއި އޭގެ އޭރުގެ ސެކްރެޓަރީ ޖެނެރަލް  އަދި ޑެޕިއުޓީ ސެކްރެޓަރީ ޖެނެރަލް ދެއްވި އެހީތެރިކަމުގެ އަގު ވަޒަންކުރެއްވިއެވެ.

ރައީސް މައުމޫން އިތުރަށް ވިދާޅުވީ،ދުނިޔޭގެ ސިޔާސީ އޮއިވަރުތައް ހިނގަމުންދާ ގޮތުން ރާއްޖެއަށް ކުއްލި ނުރައްކަލެއް ދިމާވުމަކީ އަބަދުވެސް ވެދާނެ ކަމެއްކަން އަބަދުވެސް ދިވެހި ރައްޔިތުން ތިބެން ޖެހޭނީ މިކަމަށް ހޭލާކަމަށެވެ.

އެމަނިކުފާނު ފާހަގަކުރެއްވި ގޮތުގައި، ދިވެހިރާއްޖޭގެ ރައްޔިތުން އިސްލާމްދީން ޤަބޫލުކުރިތާ ހިޖުރީ ސަނަތުން 898 އަހަރު ވެއްޖެއެވެ. މި ދިގު މުއްދަތުގެ ތެރޭގައިވެސް ދިވެހި ޤައުމު އޮތީ އިސްލާމީ އުންމަތުގެ ރޫޙާނީ ވިންދު ޖަހާޖަހާ އޮއި ގުނަވަނެއްގެ ގޮތުގައެވެ.

ރައީސް މައުމޫން އެމަނިކުފާނުގެ ވާހަކަފުޅު ނިންމަވާލެއްވީ، މާތް ﷲ އަށް ޙަމްދާއި ޝުކުރު ތަކުރާރުކުރަމުން، ދިވެހި ޤައުމަށްޓަކައި ޝަހީދުވެ ދިޔަ މާޒީގެ އަބްޠާލުންނޫނެ، 3 ނޮވެމްބަރުގެ އަބްޠާލުންގެ ފުރާނައަށް ހެޔޮ ރަޙުމަތް ލެއްވުން އެދި ދުޢާކުރަމުން، ދިވެހިރާއްޖެ މިނިވަން މުސްތަޤިއްލު އިސްލާމީ ޤައުމެއް ގޮތަށް ލެއްވުމަށް މާތް ﷲ ޙަޟްރަތަށް އިބްތިހާލްވުމަށް އެދި ދުޢާ ދަންނަވަމުންމެވެ.