ފީފާ ވޯލްޑް ކަޕް މި މަހު ފަށާއިރު، މި ފަހަރުގެ މުބާރާތުގައި ކުޅޭ އެންމެ ތަޖުރިބާކާރު ކުޅުންތެރިންނަކީ ކޮބައިހެއްޔެވެ؟ އެންމެ ހަގު ސްކޮޑަކީ ކޮބައިހެއްޔެވެ؟ މިއީ ފުޓްބޯޅައަށް ޝައުގުވެރިވާ، އަދި ޚާއްސަކޮށް ވޯލްޑް ކަޕަށް ޝައުގުވެރިވާ ފަރާތްތައް އެގެން ބޭނުންވާނެ މައުލޫމާތުތަކެކެވެ. 

ވޯލްޑް ކަޕުގައި ވާދަކުރާ 48 ގައުމުގެ ސްކޮޑުތައް މިހާރު ކަށަވަރުވެފައިވާއިރު، މުބާރާތް ފެށުމުގެ ކުރިން މި ޓީމުތަކުގެ އެކުލެވުމާއި، ޓީމުތަކުގެ މެދުގައި ހުރި ތަފާތުތަކަށް ބަލާލުމަކީ މުހިންމު ކަމެކެވެ.

މެންޗެސްޓާ ސިޓީއަށް މި ފަހަރުގެ އިނގިރޭސި ޕްރިމިއަރ ލީގު ކާމިޔާބު ނުކުރެވުނުކަމުގައި ވިޔަސް، ބައިނަލްއަގުވާމީ މައިދާނުގައި އެ ކުލަބުގެ ކުޅުންތެރިންނަށް އޮތް ޑިމާންޑް ނުހަނު ބޮޑެވެ. ކުރިއަށް އޮތް ހަފުތާތަކުގައި ތަފާތު 12 ގައުމަކަށް ނިސްބަތްވާ އެ ކުލަބުގެ 19 ކުޅުންތެރިން ވޯލްޑް ކަޕުން ފެންނާނެއެވެ. މިއީ ރިކޯޑު އަދަދެކެވެ.

މީގެ އިތުރުން ޖަރުމަން، އިނގިރޭސިވިލާތް، ފްރާންސް އަދި ސްޕެއިންގެ ޗެމްޕިއަން ކުލަބުތަކުންވެސް ގިނަ އަދަދެއްގެ ކުޅުންތެރިން މުބާރާތުގައި ބައިވެރިވެއެވެ. އެގޮތުން އާސެނަލްގެ 16 ކުޅުންތެރިން ތަފާތު 10 ގައުމެއް ތަމްސީލުކުރާނެއެވެ. އިޓާލިއަން ލީގު ކާމިޔާބުކުރި އިންޓަރ މިލާނުން މި ފަހަރުގެ މުބާރާތުގައި ފެންނާނީ އެންމެ 7 ކުޅުންތެރިންނެވެ. މީގެ މައިގަނޑު ސަބަބަކީ އިޓަލީ މުބާރާތަށް ކޮލިފައިނުވުމެވެ.

މިފަހަރުގެ ޕްރިމިއަރ ލީގުގައި ހިމެނޭ 20 ކުލަބަށް ބަލާއިރު، ޔުއެފާ ކޮންފަރެންސް ލީގުގެ ޗެމްޕިއަން ކްރިސްޓަލް ޕެލަސްގެ 12 ކުޅުންތެރިން ވޯލްޑް ކަޕުން ފެންނާނެއެވެ. އެ ކުލަބަށްވުރެ ގިނަ ކުޅުންތެރިން މުބާރާތަށް ފޮނުވަނީ މި ސީޒަނުގެ ގަދަ ތިން ޓީމު އެކަންޏެވެ.

ލޯނު އުސޫލުން އެކި ކުލަބުތަކަށް ކުޅެމުންދާ ކުޅުންތެރިން ހިމެނޭހެން، ސަންޑަލެންޑުގެ 11 ކުޅުންތެރިން ވޯލްޑް ކަޕުގައި ވާދަކުރެއެވެ. މިއީ ޗެލްސީ އާއި ލިވަޕޫލާ އެއްވަރުގެ އަދަދެކެވެ. މިއިން ހާމަވަނީ މިދިޔަ އަހަރު ޕްރޮމޯޓްވުމަށްފަހު، އެ ކުލަބުން ކުޅުންތެރިން ހޯދުމުގައި ބައިނަލްއަގުވާމީ ފެންވަރުގައި ގެންގުޅުނު ހަލި ސިޔާސަތެވެ.  އެހެން ނަމަވެސް ބްރެންޓްފަޑް، އެވަަޓަން އަދި ލީޑްސް ޔުނައިޓެޑުން މުބާރާތަށް ފޮނުވަނީ ކޮންމެ ކްލަބަކުން އެންމެ 4 ކުޅުންތެރިންނެވެ.

މުބާރާތުގެ ގްރޫޕް ސްޓޭޖުގައި އިނގިރޭސިވިލާތާ ދެކޮޅަށް ނުކުންނަ ޕެނަމާއަކީ މުބާރާތުގެ އެންމެ ދޮށީ ސްކޮޑެވެ. މީގެ އިތުރުން އެވްރެޖް އުމުރު 30 އަށްވުރެ މަތީގައި އުޅެނީ އީރާން އަދި ކޮލަމްބިއާގައެވެ.

ބްރެޒިލްގެ ކޯޗު ކާލޯ އަންޗެލޮޓީ، އެ ގައުމަށް 2002 ވަނަ އަހަރަށްފަހު ފުރަތަމަ ފަހަރަށް ވޯލްޑް ކަޕެއް ހޯދައިދިނުމަށް އިސްކަންދީފައިވަނީ ތަޖުރިބާކާރު ކުޅުންތެރިން ކަމަށްވާ ޑަނީލޯ، ކަސެމީރޯ އަދި ނޭމާ (އުމުރުން 34 އަހަރު) އަށެވެ. 1998 ވަނަ އަހަރަށްފަހު ފުރަތަމަ ފަހަރަށް ވޯލްޑް ކަޕަށް ކޮލިފައިވި ސްކޮޓްލެންޑަކީވެސް މުބާރާތުގެ އެންމެ ދޮށީ އެއް ސްކޮޑެވެ. މީގެ މައިގަނޑު އެއް ސަބަބަކީ ސްކޮޓްލެންޑުގެ ގޯލްކީޕަރު ކްރެއިގް ގޯޑަންއެވެ.

ސްކޮޓްލެންޑުގެ ގޯލްކީޕަރު ކްރެއިގް ގޯޑަން، މުބާރާތް ފެށޭއިރު އޭނާގެ އުމުރަކީ 43 އަހަރާއި 162 ދުވަހެވެ. މިއީ މުޅި މުބާރާތުގައިވެސް ހުރި އެންމެ ދޮށީ ކުޅުންތެރިޔާއެވެ. ކްރިސްޓިއާނޯ ރޮނާލްޑޯ އުމުރުން 41 އަހަރުގައި އޭނާގެ ހަވަނަ ވޯލްޑް ކަޕަށް ތައްޔާރުވަމުންދާއިރު، އުމުރުން 40 އަހަރުން މަތީގެ ކުޅުންތެރިންގެ ތެރޭގައި ލޫކާ މޮޑްރިޗް އަދި އެޑިން ޒެކޯވެސް ހިމެނެއެވެ.

އައިވަރީ ކޯސްޓަކީ މުބާރާތުގެ އެންމެ ޒުވާން ސްކޮޑެވެ. އެ ޓީމުގެ ހުނަރުވެރި ދެ ފޯވާޑުން ކަމަށްވާ ޔަންދިއޮމާންޑޭ (19 އަހަރު) އަދި ބަޒޫމާނާ ޓޫރޭ (20 އަހަރު) އަށް ބޮޑެތި ކުލަބުތަކުން ފާރަވެރިވަމުންދެއެވެ. އެފްރިކާގެ ޗެމްޕިއަން މޮރޮކޯ އަދި ޔޫރޯގެ ޗެމްޕިއަން ސްޕެއިންގައިވެސް ހިމެނެނީ ނިސްބަތުން ޒުވާން ސްކޮޑެކެވެ. ސްޕެއިން ޓީމުގައި ލަމީން ޔަމާލް (18 އަހަރު) އަދި ޕައު ކުބާސީ (19 އަހަރު) ފަދަ ޒުވާން ތަރިން ހިމެނެއެވެ.

މުޅި މުބާރާތުގައި ހުރި އެންމެ ޒުވާން ކުޅުންތެރިއަކީ މެކްސިކޯގެ ގިލްބާޓޯމޯރާއެވެ. މުބާރާތް ފެށޭއިރު އޭނާގެ އުމުރަކީ 17 އަހަރާއި 240 ދުވަހެވެ. އޭނާއަށް 18 އަހަރު ފުރޭނީ އަންނަ އޮކްޓޯބަރު މަހުއެވެ. ޗެކްރިޕަބްލިކްގެ ހިއުގޯސޮޗުރެކަށް މި އަންނަ އާދީއްތަ ދުވަހު 18 އަހަރު ފުރޭއިރު، ބަޔާން މިއުނިކްގައި މޮޅު ކުޅުމެއް ދެއްކި ޖަރުމަނުގެ ޒުވާން ތަރި ލެނާޓްކާލްވެސް މި މުބާރާތުން ފެންނާނެއެވެ.