އަންނަ އަހަރުގެ ޖަނަވަރީ މަހުން ފެށިގެން ނަގާ ގްރީން ޓެކްސް ދެ ގުނައަށް ބޮޑުވާނެކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން އިިޢުލާންކޮށްފިއެވެ.

ގްރީން ޓެކްސްގެ ރޭޓްތަކަށް ބޮޑެތި ބަދަލުތަކެއް ގެނެސް، މި ފެށޭ އަހަރުން ފެށިގެން އެގޮތަށް ޢަމަލުކުރަން ފަށާނެކަމަށް ވެސް މީރާއިން ވަނީ ބުނެފައެވެ.

ދިވެހި ރާއްޖޭގެ ޓޫރިޒަމާބެހޭ ޤާނޫނަށް ގެނެވުނު 14 ވަނަ އިޞްލާޙާއެކު ޓެކްސް ބޮޑުވާ ތަންތަނުގެ ތެރޭގައި ރިސޯޓުތަކާއި، ގެސްޓްހައުސްތަކާއި އަދި ފަތުރުވެރިކަމުގައި ބޭނުން ކުރާ އުޅަނދުތައަ ވެސް ހިމެނެއެވެ. 

އެގޮތުން ރިސޯޓުތަކާއި، އިންޓެގްރޭޓެޑް ޓޫރިސްޓް ރިސޯޓުތަކާއި، ރިސޯޓް ހޮޓާތަކާއި، 50 އަށް ވުރެ ގިނަ ކޮޓަރި ހުންނަ ޓޫރިސްޓް ގެސްޓްހައުސްތަކުގެ އިތުރުން އުޅަނދުތަކުން މިހާރު ކޮންމެ ގެސްޓަކަށް ރެއަކަށް 12 އެމެރިކާ ޑޮލަރު ނެގުމަށް ވަނީ ހަމަޖެހިފައެވެ. އަދި މީހުން ދިރިއުޅޭ ރަށްރަށުގައި 50 ނުވަތަ އެއަށްވުރެ މަދު ކޮޓަރި ހުންނަ ގެސްޓްހައުސްތަކުން ކޮންމެ ގެސްޓަކަށް ރެއަކަށް 6 އެމެރިކާ ޑޮލަރު ނަގާނެއެވެ.