ސްރީ ލަންކާގެ ވެރިރަށް ކޮލަމްބޯގައި ކުރިއަށްދިޔަ "12 ވަނަ މާސްޓާރސް އެނުއަލް އެތުލެޓިކްސް ޗެމްޕިއަންޝިޕް 2026" ގެ ޗެމްޕިއަންކަން ރާއްޖޭގެ މާސްޓާރސް އެތުލެޓިކްސް ޓީމުން ހޯދައިފިއެވެ.

މި މުބާރާތުގެ ޗެމްޕިއަންކަން ރާއްޖެއިން ހޯދިއިރު، މިދިޔަ އަހަރުގެ މުބާރާތްވެސް ކާމިޔާބުކުރީ ރާއްޖެއިންނެވެ. މި މަހުގެ 23-25 އަށް ކޮލޮމްބޯގެ ސުގަތަދާސާ ސްޓޭޑިއަމްގައި ކުރިއަށްދިޔަ މުބާރާތުގައި ރާއްޖެ، އިންޑީއާ އަދި ލަންކާއިން ޖުމްލަ 660 އެތުލީޓުން ވަނީ ވާދަކޮށްފައެވެ. މި މުބާރާތުގައި ރާއްޖެ ތަމްސީލުކުރީ 10 އެތުލީޓެކެވެ. އެއީ ފިރިހެން 6 އެތުލީޓުން އަދި އަންހެން 4 އެތުލީޓުންނެވެ.

މި މުބާރާތުގެ ޗެމްޕިއަންކަން ރާއްޖެއިން ހޯދާފައިވަނީ 21 މެޑެއްޔާއެކުއެވެ. އެއީ 6 ރަން މެޑެލް، 8 ރިހި މެޑެލް އަދި 7 ލޯ މެޑެއްޔެވެ.

މި މުބާރާތުގައި ރާއްޖެއިން އިންޑިވިޖުއަލް ޕާފޯމަންސް އެންމެ ރަނގަޅު ފިރިހެން އެތުލީޓަކަށް ހޮވުނީ މުޙައްމަދު އާމިރެވެ. އަދި އިންޑިވިޖުއަލް ޕާފޯމަންސް އެންމެ ރަނގަޅު އަންހެން އެތުލީޓަކަށް ހޮވުނީ ނާފިޒާ އަޙްމަދު (ނާފީ) އެވެ.