ބްރެޒިލްގެ ގައުމީ ފުޓްބޯޅަ ޓީމުގެ 10 ނަންބަރު ޖާޒީއަކީ ހަމައެކަނި ނަންބަރެއް ނޫންނެވެ. އެއީ އެ ގައުމުގެ ފުޓްބޯޅަ އާއި ގުޅިފައިވާ ތާރީޚީ ރަމްޒެކެވެ. މި ތާރީޚީ 10 ނަންބަރު ޖާޒީ އެ ޓީމުގެ ވިނީޝިއުސް ޖޫނިއަރއަށް ދީ، ނޭމާ 13 ނަންބަރު ޖާޒީއަށް ބަދަލުވާން އުޅޭ ކަމަށް ޚަބަރުތައް ފެތުރުނެވެ. އެހެންނަމަވެސް ފަހުން މި ޚަބަރު ވަނީ ދޮގުކޮށްފައެވެ.  އަދި ރަސްމީކޮށް ޖާޒީ ނަންބަރުތައް ކަނޑަނޭޅި ނަމަވެސް، ބްރެޒިލްގެ ފުޓްބޯޅަ ތާރީޚުގައި އެންމެ ޝަރަފުވެރި މި ޖާޒީ ލާންވީ ކޮން ކުޅުންތެރިއެއްތޯ ކުރެވޭ ބަހުސް މިހާރު ވަނީ ހޫނުވެފައެވެ.

ސަބަބަކީ 10 ނަންބަރަކީ އެ ގައުމުން އުފެދުނު، ދުނިޔޭގެ ނަން މަޝްހޫރު ފުޓްބޯޅައިގެ ތަރިންވެސް ބެނުންކުރި ނަންބަރަށްވުމެވެ. ޕެލޭ، ޒިކޯ، ރިވާލްޑޯ، ރޮނާލްޑީނިއޯ އަދި ކަކާ ފަދަ ލެޖެންޑުން މި ޖާޒީގައި ކުޅެފައިވެއެވެ. އެއަށްފަހު ފާއިތުވި 10 އަހަރަށްވުރެ ގިނަ ދުވަހު މި ޖާޒީގެ ވާރުތަވެރިއެއްގެ ގޮތުގައި ނޭމާ ވަނީ ދެމިހުރެފައެވެ. އޭނާ ފުރަތަމަ މި ޖާޒީގައި ފެނުނީ 2013 ވަނަ އަހަރުގެ ޖޫން 21 ގައެވެ. އޭގެ ފަހުން، ނޭމާ ޓީމުގައި ހުންނަ ކޮންމެ ފަހަރަކުހެން އޭނާ ބޭނުންކުރަނީ މި ޝަރަފުވެރި ނަންބަރެވެ.

ވިނީޝިއުސް އަކީ ބްރެޒިލްގެ މުސްތަގުބަލު؟

ނަންބަރުގެ ވާރުތަވެރިޔާއާ ގުޅޭގޮތުން ކުރެވޭ ބަހުސްގައި ގިނަބަޔަކު ގަބޫލުކުރާ ގޮތުގައި ވިނީޝިއުސް ޖޫނިއަރ ބެލެވެނީ ބްރެޒިލްގެ ފުޓްބޯޅައިގެ މިއަދާއި މުސްތަގުބަލުގެ ގޮތުގައެވެ. ރެއާލް މެޑްރިޑަށް ކުޅެމުން އަންނަ މި ތަރި ފުރަތަމަ 10 ނަންބަރު ޖާޒީގައި ފެނުނީ 2023 ވަނަ އަހަރުގެ ޖޫން 17 ގައެވެ. އެއީ ނޭމާއަށް ލިބުނު އަނިޔާއަކާ ގުޅިގެން ކުޅުމާ ދުރުގައި ހުރި ދުވަސްވަރެކެވެ. އެއާއެކު، ގިނަ ސަޕޯޓަރުން ވަނީ އޭނާއަކީ ޓީމުގެ އައު ލީޑަރުގެ ގޮތުގައި ބަލައިގަންނަން ފަށާފައެވެ.

މިފަހަރު ކޯޗު ކާލޯ އަންޗެލޮޓީގެ އިރުޝާދުގެ ދަށުން މި ދެ ކުޅުންތެރިން ޓީމުގައި ހިމެނޭއިރު، މި ނިންމުމަކީ ވަރަށް މުހިންމު ނިންމުމަކަށް ވާނެއެވެ. ނޭމާގެ ތަޖުރިބާއާއި، ޓީމުގެ ތެރޭގައި އޭނާގެ އޮތް ނުފޫޒަކީ ދޫކޮށްލެވޭނެ ކަންކަމެއް ނޫނެވެ. ދަނޑުމަތީގައާއި ދަނޑުން ބޭރުގައިވެސް ނޭމާއަކީ ޓީމަށް މުހިންމު ކުޅުންތެރިއެއްކަން، ރަފީނިއާ ފަދަ ހުނަރުވެރި ކުޅުންތެރިން ވަނީ ފާހަގަކޮށްފައެވެ.

އިސްކަންދޭ އުސޫލުން ބަލާނަމަ، ނޭމާ 10 ނަންބަރުގައި ދެމިހުރުމާއި، ވިނީޝިއުސް ކުރިންވެސް ބޭނުންކުރި 7 ނަންބަރު ޖާޒީގައި ކުޅުމަކީ އެންމެ އެކަށީގެންވާ ގޮތެވެ.

ނޭމާއަށް ތާރީޚީ ރިކޯޑެއް ހެދުމުގެ ފުރުސަތު

ނޭމާ 10 ނަންބަރު ޖާޒީގައި ފެނުމަކީ ތާރީޚީ ގޮތުން މުހިންމު ކަމަކަށްވާނެއެވެ. އެއީ ކުރިއަށް އޮތް ފީފާ ވޯލްޑް ކަޕުގައި ނޭމާ 10 ނަންބަރު ޖާޒީގައި ކުޅެފިނަމަ، އޭނާ ވެގެންދާނީ ހަތަރު ވޯލްޑް ކަޕެއްގައި ބްރެޒިލްގެ 10 ނަންބަރު ޖާޒީ ލީ ހަމައެކަނި ކުޅުންތެރިޔާއަށެވެ. މިއީ ޕެލޭއަށްވެސް ލިބިފައިނުވާ ޝަރަފެކެވެ.

އެހެންކަމުން، ސުވާލަކީ އަދިވެސް 10 ނަންބަރު ޖާޒީގެ ހައްގުވެރިއަކީ ނޭމާ ހެއްޔެވެ؟ ނުވަތަ މިއީ އެ ޒިންމާ ވިނީޝިއުސް ޖޫނިއަރއާ ހަވާލުކުރަންވީ ވަގުތު ހެއްޔެވެ؟