ދައުރު ނިމެން އުޅެނިކޮށް އެމް.ޑީ.ޕީ ސަރުކާރުން ކުރިއަށްގެންދިޔަ ބިންވެރިޔާ ސްކީމަކީ ސްކޭމެއް ކަމަށް، ރައްޔިތުންގެ މަޖިލީހުގެ މާފަންނު ދެކުނު ދާއިރާގެ މެންބަރު އަބްދުﷲ ރިފާޢު ވިދާޅުވެއްޖެއެވެ.

އެމް.އެމް.ޓީވީގެ "ބޮޑު ޚަބަރު" ޕްރޮގްރާމްގައި ވާހަކަދައްކަވަމުން މެންބަރު ރިފާޢު ފާހަގަކުރެއްވި ގޮތުގައި، ގޯތި ދިނުމުގައި ވަކިބަޔަކަށް ފުރުސަތު ފަހިވާގޮތަށް ނިމިދިޔަ ސަރުކާރުން އެތައް ޖަރީމާއެއް ހިންގާފައިވެއެވެ. އަދި އޭރުގެ ހައުސިންގ މިނިސްޓަރުގެ ބައިވެރިވުން މިކަމުގައި ވަރަށް ބޮޑަށް އޮތްކަމަށް އޭނާ ތުހުމަތު ކުރެއްވިއެވެ.

ބިންވެރިޔާ ސްކީމަކީ ފެށުނީއްސުރެ އޭގައި ކޮރަޕްޝަން އެކުލެވިގެންވާ ކަމެއް ކަަމަށްވެސް އެމް.ޕީ ރިފާޢު ތުހުމަތުކުރެއްވިއެވެ. ސްކީމް އިޢުލާން ކުރީއްސުރެ މައްސަލަތައް ފެންމަތިވަމުން ދިޔަކަން ރޭގެ ޕްރޮގްރާމުގައި އޭނާ ފާހަގަކުރެއްވިއެވެ. 

އެމް.ޑީ.ޕީގެ ނިމިދިޔަ ދައުރަކީ މިރާއްޖެ އެންމެ އެންމެ ބޮޑަށް ދަރުވާލި ފަސް އަހަރު ކަމަށާއި އަދި ރައްޔިތުންގެ ފައިސާ އިން ވައްކަންކުރުމުގެ ރެކޯޑެއް ވެސް އެމް.ޑީ.ޕީގެ ނިމިދިޔަ ދައުރުގައި ޤާއިމުކޮށްފައިވާ ވާކަމަށްވެސް ރިފާޢު ވިދާޅުވިއެވެ. އަދި ވައްކަން ކުރި މީހުން ޤާނޫނުގެ ކުރިމަށްޗަށް ގެނެސް، ޙައްޤުވާ އަދަބު މި ސަރުކާރުން ދޭނެކަމުގެ ޔަގީންކަންވެސް އެމް.ޕީ ޢަބްދުﷲ ރިފާޢު ދެއްވިއެވެ.