އެމެރިކާ، ކެނެޑާ އަދި މެކްސިކޯގައި މި އަހަރު ބާއްވާ ފީފާ ވޯލްޑް ކަޕަށް ޕޯޗުގަލްއިން އެކުލަވާލި ސްކޮޑުގައި ހިމެނި، ފުޓްބޯޅަ ތަރި އަދި އެ ގައުމުގެ ކެޕްޓަން ކްރިސްޓިއާނޯ ރޮނާލްޑޯ ރިކޯޑު ހަވަނަ ވޯލްޑް ކަޕެއްގައި ކުޅެން ތައްޔާރުވެއްޖެއެވެ.

އުމުރުން 41 އަހަރުގެ ފޯވާޑަކީ ފަސް ވޯލްޑް ކަޕެއްގައި ކުޅުނު ހަ ކުޅުންތެރިންގެ ތެރެއިން އެކަކެވެ. މިހާތަނަށް އެއްވެސް ކުޅުންތެރިއަކު ހަ ވޯލްޑް ކަޕެއްގައި ކުޅެފައި ނުވާއިރު، ޕޯޗުގަލްގެ ސްކޮޑުގައި ހިމެނުމާއެކު އެ ފުރުސަތު ރޮނާލްޑޯއަށް އެބައޮތެވެ. އެކަމަކު އާޖެންޓީނާގެ ވޯލްޑް ކަޕް ސްކޮޑުގައި އެ ޓީމުގެ ތަރި ލިއޮނެލް މެސީ ހިމެނޭނެ ކަމަށް ބެލެވޭއިރު، މި ފަހަރުގެ މުބާރާތް ވެގެންދާނީ މެސީގެވެސް ހަވަނަ މުބާރާތަށެވެ.

ގައުމީ ޓީމަކަށް މިހާތަނަށް އެންމެ ގިނަ ލަނޑު ޖެހުމުގެ ރިކޯޑު އޮންނަ ރޮނާލްޑޯ ވަނީ ޕޯޗުގަލްއަށް ކުޅެދިން 226 މެޗުގައި 143 ލަނޑު ޖަހާފައެވެ. ދުނިޔޭގެ އެންމެ މޮޅު ކުޅުންތެރިޔާއަށް ދޭ ބަލޮންޑޯ އެވޯޑު ފަސް ފަހަރު ހާސިލުކޮށްފައިވާ ރޮނާލްޑޯ އަންނަނީ 2023 ވަނަ އަހަރުގެ ޖެނުއަރީ މަހުން ފެށިގެން ސައުދީ އަރަބިއްޔާގެ އަލް ނަސްރަށް ކުޅެމުންނެވެ.

ޕޯޗުގަލް އިން 26 ކުޅުންތެރިންގެ ސްކޮޑެއް އިއުލާންކުރިއިރު، ރަމްޒީކޮށް ބުނެފައިވަނީ ސްކޮޑުގެ އަދަދަކީ 27+1 ކަމަށެެވެ. އެއީ މިދިޔަ އަހަރުގެ ޖުލައި މަހު ކާރު އެކްސިޑެންޓެއްގައި މަރުވި ލިވަޕޫލްގެ ފޯވާޑް، ޑިއޯގޯ ޖޮޓާގެ ނަން ލިސްޓުގައި ހިމަނައިގެންނެވެ. 

48 ޓީމު ވާދަކުރާ މި ފަހަރުގެ ވޯލްޑް ކަޕުގައި ޕޯޗުގަލް ހިމެނެނީ ގްރޫޕް ކޭގައެވެ. އެ ގްރޫޕުގައި ދެން ހިމެނެނީ ކޮންގޯ، އުޒްބެކިސްތާން އަދި ކޮލަމްބިއާއެވެ.