މިހިނގާ ނޮވެމްބަރު މަހުގެ 10 ވަނަ ދުވަހު އޮންނަ، މޮރިޝަސްގެ އާންމު އިންތިޚާބާ ދިމާކޮށް އެޤައުމުގައި ސޯޝަލް މީޑިއާގެ ހުރިހާ ޕްލެޓްފޯމްތަކެއް ނޮވެމްބަރު 11 ވަނަ ދުވަހާ ހަމައަށް ބްލޮކްކުރުމަށް ނިންމައިފިއެވެ.

އެޤައުމުގެ ސިޔާސީ އިސް ބައެއްގެ ފޯންކޯލްތަކެއް ސޯޝަލް މީޑިއާގައި ލީކްކޮށްލި މައްސަލައަކާ ގުޅިގެން މިދިޔަ ހުކުރުދުވަހު ވަނީ މިކަން އިއުލާނުކޮށްފައެވެ. މިކަމާ ގުޅިގެން މޮރިޝަސްގެ އިދިކޮޅު ފަރާތްތަކުން ވަނީ ކަންބޮޑުވުން ފާޅުކޮށް، މިއީ މިހާރު އެގައުމުގެ ވެރިކަންކުރާ ޕާޓީން އިންތިޚާބުގައި ބަލިވުމުން ސަލާމަތްވުމަށް ރާވާފައިވާ ރޭވުމެއް ކަމަށް ވެސް އިދިކޮޅު ފަރާތްތަކުން ބުނެއެވެ.

މޮރިޝަސްގެ ބޮޑުވަޒީރު ޕްރަވިންދް ޖަގްނާތުގެ އޮފީހުން ބުނެފައިވަނީ، ބައެއް އޯޑިއޯ ކްލިޕްތައް ޝާއިޢުކުރުމާ ގުޅިގެން ޤައުމުގެ ސަލާމަތާއި ރައްކާތެރިކަން ދެމެހެއްޓުމަށްޓަކައި މިފަދަ ފިޔަވަޅުތައް އަޅަން ޖެހުނީ ކަމަށެވެ.