ފުރަތަމަ ހާފުގައި ވައްދާލި ދެ ލަނޑާއެކު އުދިނޭޒީ 2-0 އިން ބަލިކޮށް އިންޓަ މިލާން އިޓާލިއަން ކަޕްގެ ކުއާޓާ ފައިނަލަށް ދަތުރުކޮށްފިއެވެ.

މިލާނުގެ ސެން ސީރޯ ސްޓޭޑިއަމްގައި ރޭ ކުޅުނު މި މެޗުގައި އިންޓަގެ ލަނޑުތައް ޖަހައިދިނީ މާކޯ އާނައުޓޮވިޗް އާއި ކްރިސްޓަން އަސްލާނީ އެވެ.

ފަހު ހާފުގައި އިންޓަގެ ލީޑު ފުޅާކޮށްދޭން އެ ޓީމުގެ އީރާން ފޯވާޑް، މެހްދީ ތަރޭމީ ފޮނުވާލި ބޯޅަ އަމާޒުވީ ގޯލްގެ ހުރަސްދަނޑިއަށެވެ.

މުޅި މެޗުގައި ވެސް އުދިނޭޒީ އަށް އިންޓަގެ ގޯލަށް އަމާޒުކޮށް ފޮނުވާލެވުނީ އެންމެ ބޯޅައެކެވެ. 

މުބާރާތުގެ ޗެމްޕިއަންކަން ނުވަ ފަހަރު ހޯދާފައިވާ އިންޓަ ކުއާޓާގައި ނުކުންނާނީ ލާޒިއޯއާ ދެކޮޅަށެވެ. މި މެޗު ކުޅުމަށް ހަމަޖެހިފައި ވަނީ އަންނަ އަހަރުގެ ފެބުރުއަރީ މަހު އެވެ.