ނޮވެމްބަރު މަހުގެ 5 ވަނަ ދުވަހު ބޭއްވުމަށް ހަމަޖެހިފައިވާ އެމެރިކާގެ ރިޔާސީ އިންތިޚާބުގައި ވާދަކުރާ ޑިމޮކްރެޓިކް ޕާޓީގެ ކަމަލާ ހެރިސް އާއި ރިޕަބްލިކަން ޕާޓީގެ ޑޮނަލްޑް ޓްރަމްޕްގެ ތެރެއިން އެންމެ ތާއީދު ބޮޑު ކެންޑިޑޭޓް ބަލާލުމަށް ބީބީސީއިން ޕޯލެއް ވަނީ ހުޅުވާލައިފަ އެވެ.

ދެހާސް ވިހި ވަނަ އަހަރު ބޭއްވި އިންތިޚާބަށް ފަހު މި އަހަރުގެ އިންތިޚާބުގައި ޑިމޮކްރެޓިކްސްގެ ޓިކެޓުގައި ރައީސް ޖޯ ބައިޑެންގެ ފުރިހަމަ ތާޢީދާއެކު ކަމަލާ ހެރިސް ވާދަކުރުމަށް ނިންމައި ކެމްޕެއިން ވަނީ ވަރަށް ކުރީގަ އެވެ.

ސުވާލަކީ މި ފަހަރުގެ އިންތިހާބުގައި އެމެރިކާއިން ފުރަތަމަ އަންހެން ރައީސާއަކަށް މަރުހަބާ ކިޔާނީތޯ ނުވަތަ އަލުން ޓްރަމްޕްގެ ވެރިކަމެއް ގެންނާނީތޯ އެވެ.

ބީ.ބީ.ސީ އިން ނެރެފައިވާ ރިޔާސީ ޕޯލްގެ ކުރީގައި މިވަގުތު އުޅުއްވަނީ އެއް އިންސައްތައިގެ ކުރިއެރުމަކުން ކަމަލާ ހެރިސްއެވެ. ހެރިސް ހާމަކޮށްފައިވާ ގޮތުން ކެމްޕެއިންގެ ފުރަތަމަ ހަފްތާތަކުގެ ތެރޭގައި އޭނާއަށް ރައްޔިތުންގެ ތާޢީދު ލިބޭކަން އެނގުނު ކަމަށާއި އެކަން ޕޯލް މެދުވެރިކޮށް އޮގަސްޓް މަސް ނިމުނުއިރު ހަތަރު އިންސައްތައިގެ ކުރިއެރުމެއް ލިބުމުން ހާމަވި ކަމަށެވެ.

ސްޓޭޓް ޕޯލްތަކުގެ އެވްރެޖަށް ބަލާލުމަށް ފަހު މި ވަގުތު ކުރީގައި އުޅެނީ ކާކުކަން ބުނަން ދައްޗެވެ. އޮގަސްޓް މަސް ފެށުނުއިރު ޕެންސެލްވޭނިއާ، މިޝިގަން އަދި ވިސްކޮންސިންގެ ލީޑްގައި ކަމަލާ އޮތް ނަމަވެސް މިހާރު މި ތިން ސްޓޭޓްގެ ލީޑް ނަގާފައިވަނީ ޓްރަމްޕެވެ. ޕޯލްއިން ދައްކާ ނަތީޖާތައް އަންނަނީ އަވަސް އަވަހަށް ބަދަލުވަމުންނެވެ.