ވެރިކަމުގެ އެންމެ ފަހު ދުވަހާ ޖެހެންދެން ވެސް އެމްޑީޕީން ދިޔައީ، ސީދާ ރައްޔިތުންނަށް ޖެއްސުން ކުރުމުގެ ނިޔަތުގައި އެތައް ކަމެށް ކުރަމުން ކަމަށް ރައްޔިރުންގެ މަޖިލީހުގެ ކެލާ ދާއިރާގެ މެމްބަރު އަބްދުﷲ ޝަރީފް ވިދާޅުވެއްޖެއެވެ.

އެމްއެމްޓީވީގެ "ބޮޑު ޚަބަރު" ޕްރޮގްރާމްގައި ވާހަކަ ދައްކަވަމުން ޝަރީފް ވިދާޅުވީ އެމްޑީޕީ އަށް ރައްޔިތުން ބޮޑުތަނުން ނޫނެކޭ ބުނީމަ ވެސް ވެރިކަމުގެ އެންމެ ފަހު ދުވަހާ ޖެހެންދެން ރައީސް ޑރ. މުޙައްމަދު މުޢިއްޒުގެ ސަރުކާރަށް، ޖުމްލަ ގޮތެއްގައި މުޅި ދިވެހި ރައްޔިތުންނަށް ޖެއްސުން ކުރުމުގެ ނިޔަތުގައި އެމްޑީޕީން އެތައް ކަމެއް ކޮށްފައިވާ ކަމަށެވެ.

އެމްޑީޕީއިން ރިޔާސީ އިންތިޚާބުގެ ކެމްޕެއިން ތެރޭގައި އެއްވެސް ކަހަލަ ރޭވުންތެރި ކަމެއް ނެތި، ކުރެވޭނެ ގޮތެއް ވެސް ނެތި އެތަކެއް ޕޮރޮޖެކްޓެއްގައި ސޮއިކޮށްފައިވާ ކަމަށް ވެސް ޝަރީފް ވިދާޅުވިއެވެ. އަދި އޭރު ޕޮރޮޖެކްޓްތަކުގައި ސޮއިކޮށް އުޅުނު ގޮތުގެ މިސާލެއް ވެސް ވަނީ ދައްކަވާފައެވެ.

މި ފަހަރުގެ ބަޖެޓް ހަދާފައިވަނީ ޕްރޮޖެކްޓްތައް ހިންގުމުގައި އެއްވެސް ކަހަލަ އޮޅުވާލުމެއް ނުހިމެނޭހެން،ފަށާ މަސައްކަތެއް ނިމި ރައްޔިތުންނަށް އޭގެ ފޮނި މީރުކަން އެންމެ ފުރިހަމައަށް ލިބޭނެ ގޮތަށް ކަމުގައި ޝަރިީފް ވިދާޅުވިއެވެ. އަދި މި ރާއްޖޭގައި ރައްޔިތުންނަށް ޚިދުމަތް ކުރުމަށް ދެން އޮންނާނީ ރައްޔިތުންނަށްް ވެރިކަން ކޮށްދޭ ހެޔޮލަފާ ސަރުކާރެއް ކަމުގެ ޔަގީންކަން ވެސް ޝަރީފް ދެއްވިއެވެ.