ވެލާނާ އިންޓަނޭޝަނަލް އެއާޕޯޓްގެ ކަފިހި ހުރަހުގެ ފުރާޅު މަރާމަތުކުރުމަށް އެސަރަހައްދުގެ ޓްރެފިކަށް ވަގުތީ ބަދަލެއް ގެނެސްފައިވާކަމަށް އެމްއޭސީއެލުން ބުނެފިއެވެ.

އެކުންފުނިން ނެރެފައިވާ އިއުލާންގައި ބުނެފައިވަނީ، އެއާޕޯޓު ޓާމިނަލް 2 ގެ ކަފިހި ހުރަހުގެ ފުރާޅު މަރާމާތު ކުރުމުގެ މަސައްކަތްކުރުމަށްޓަކައި، މާދަމާއިން ފެށިގެން މިމަހުގެ 30 ވަނަ ދުވަހާއި ހަމައަށް ދަންވަރު 12 އިން ފަތިހު 5 އަށް އެ ސަރަހައްދު ބަންދު ކުރާނެކަމަށެވެ. އެހެންކަމުން އެ ވަގުތުތަކުގައި ޓްރެފިކް ފްލޯއަށް ބަދަލުތަކެއް ގެންނަން ނިންމާފައިވާކަމަށެވެ.

މަސައްކަތް ކުރިއަށްދާވަގުތު ޓްރެފިކަށް ގެންނަ ބަދަލުތައް:

ޓެކްސީ: ޑޮމެސްޓިކް ޓާމިނަލުން ފަސިންޖަރުން ގޮވައިގެން އަންނަ ޓެކްސީތައް މަޑުކުރާނީ، ޓާމިނަލް އެކެއްގެ ޑިޕާޗާ  ގޭޓް 1 އަދި ގޭޓް 2 އަށެވެ. އަދި މިވަގުތުތަކުގައި ޓާމިނަލް ދޭއްގެ ޓެކްސީ ސްޓޮޕް ބަންދުވާނެއެވެ.

އެމްޓީސީސީ ބަސް: މި ބަސްތައް ފަސިންޖަރުން ބޭލުމަށާއި، ނެގުމަށް މަޑުކުރާނީ ހަމައެކަނީ އެއާޕޯޓްގެ ހުޅަނގު ފަރާތު ސައިކަލް ޕާކިން ބަސް ހުއްޓިއަށެވެ.

އެމްއޭސީއެލް އިންޓާނަލް ބަސް: އިންޓާނަލް ރޫޓް 1 (އޭޓީސީއިން އަންނަ ބަސް) ގެ ދަތުރުތައް ނިންމާލާނީ ޓާމިނަލް އެކެއްގެ ޑިޕާޗާ ގޭޓަށެވެ. އަދި ވޯޓާސަޕްލައިއަށް ދަތުރުކުރާ ބަސްތައް (ރޫޓް2) ފަށާނީ ޓާމިނަލް 2 ކުރިމަތީ ބުރު ކައިރިންނެވެ.

އެމްއޭސީއެލުން ބުނީ މިއީ މަރާމާތު ކުރާ ވަގުތުތަކުގައި ގެންނަ ބަދަލެއްކަމަށާއި، މި ބަދަލާއިއެކު އެއާޕޯޓްގެ އެއްވެސް ބަސް ޝެޑިއުލަކަށް ބަދަލެއް ނާންނާނެކަމަށެވެ. އަދި މި ބަދަލަށް ސަމާލުވުމަށް އެ ކުންފުނިންވަނީ އިލްތިމާސްކޮށްފައެވެ.