އަމިއްލަ ޖީބުން ފައިސާ ދައްކަން ޖެހޭ ހުރިހާ ހާލަތެއްގައި އާސަންދަ ލިބޭނެ ކަމަށް ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން ވިދާޅުވެއްޖެއެވެ.

އާސަންދަ ސްކީމް ރިފޯމް ކުރުމުގެ މަސައްކަތުގެ ތެރެއިން އައުޓް ޕޭޝަންޓްގެ ހިދުމަތްތަކަށް ބިލްކުރުމުގައި ޕްރައިވެޓް އިންޝުއަރެންސް އަށް އިސްކަންދިނުމަށް ސަރުކާރުން ވަނީ ނިންމަވައިފައެވެ.

ބައެއް ފަރާތްތަކުން މިކަމާ ގުޅިގެން ދޮގު މައުލޫމާތު ފަތުރަމުންދާތީ، އެންސްޕާއިން ނެރުނު ބަޔާނެއްގައި ވިދާޅުވީ އެއްވެސް ފަރާތަކަށް ޕްރައިވެޓް އިންޝުއަރެންސްގެ ކަވަރޭޖް ނުވަތަ ހިދުމަތް ނުލިބޭ ހާލަތެއްގައިނަމަ އެ ފަރާތަކަށް އާސަންދަ ސްކީމުން މިހާރު ވެސް ހިދުމަތް ލިބެމުންދާގޮތަށް ބޭސްފަރުވާގެ ހިދުމަތްތައް ލިބޭނެ ކަމަށެވެ.

"އަމިއްލަ އިންޝުއަރެންސް ކުންފުނިތަކުން ކޭޝްލެސް ޕޭމަންޓް ހުއްޓާލި ކަމުގައި ވިޔަސް އަމިއްލަ އިންޝުއަރެންސް ޕޮލިސީން ކަވަރޭޖް ނުލިބި އަމިއްލަ ޖީބުން ފައިސާދައްކަން ޖެހޭ ހުރިހާ ހާލަތެއްގައި އާސަންދައިގެ ކަވަރޭޖް ކުރިއެކޭވެސް އެއްގޮތަށް ލިބިގެންދާނެ،" އެންސްޕާގެ ބަޔާނުގައި ފާހަގަކުރައްވާފައިވެއެވެ.

ކަމުގެ ހަގީގަތް އޮޅޭ ގޮތަށް މިފަދަ ދަނޑިވަޅެއްގައި، އެކި ފަރާތްތަކުން ދޮގު މައުލޫމާތު ހާމަކުރަމުންދާތީ އެންސްޕާއިން ވަނީ ކަންބޮޑުވުންފާޅުކުރައްވައިފައެވެ. ކަމާ ގުޅުންހުރި ސައްހަ މައުލޫމާތު ފެތުރުމަށް އެންސްޕާ އިން ވަނީ އިލްތިމާސްކޮށްފައެވެ.

މިކަމާ ގުޅޭ އިތުރު މައުލޫމާތު ސާފުކުރުމަށް ބޭނުން ނަމަ، އާސަންދަ ކޮމްޕެނީ ލިމިޓެޑްގެ ހޮޓްލައިން 1400 އަށް ގުޅުއްވުމަށް އެންސްޕާގެ ބަޔާނުގައި އެދިފައިވެއެވެ.