މިއަހަރުގެ ޙައްޖުގެ އަޅުކަމަށް ރާއްޖެއިން ދާ ޙައްޖާޖީން ފުރުމަށް ހަމަޖެހިފައިވާ ތާރީޚުތައް، ކަނޑައަޅައިފި އެވެ.

މޯލްޑިވްސް ޙައްޖު ކޯޕަރޭޝަނުން ބުނީ، ރާއްޖެއިން ޙައްޖަށްދާ މީހުންގެ 50 އިންސައްތަ މީހުން ގެންދިއުމަށް ހަމަޖެހިފައިވަނީ ސައުދީ އެއާލައިން އިން ކަމަށާއި، އަދި އަނެއް 50 އިންސައްތަ މީހުން ގެންދާނީ ޤައުމީ އެއާލައިން މޯލްޑިވިއަންގެ ފްލައިޓުގައި ކަމަށެވެ. ރާއްޖޭއިން ޙައްޖަށްދާ މީހުން ގެންދިއުމަށް ހަތަރު ފްލައިޓެއް ބޭއްވުމަށް ހަމަޖެހިފައިވެ އެވެ.

ރާއްޖޭގެ ޙައްޖާޖީން ފުރުމަށް ހަމަޖެހިފައިވާ ތާރީޚުތައް އެފަރާތްތަކާއި ހިއްސާކުރަމުން ގެންދާނެކަމަށްވެސް އެ ކޯޕަރޭޝަނުން ބުނެފައިވެ އެވެ.

ރާއްޖެއިން ފުރުމަށް ހަމަޖެހިފައިވާ ތާރީޚުތައް: 

ސައުދީ އެއާލައިންގެ ދަތުރުތައް ކުރާނީ މެއި 15 އަދި 18 ވަނަ ދުވަހު އެވެ. އަދި މެއި 17 އަދި 19 ވަނަ ދުވަހުގެ ދަތުރުތައް ކުރުމަށް ހަމަޖެހިފައިވަނީ މޯލްޑިވިއަން ފްލައިޓްގަ އެވެ.

ޙައްޖާޖީން ރާއްޖެ އެނބުރި އަންނަ ތާރީޚުތައް:

މޯލްޑިވިއަންގެ ފްލައިޓް ދަތުރުކުރާނީ ޖޫން 7 އަދި 9 ގަ އެވެ. ޖޫން 5 އަދި 8 ގެ ދަތުރުތައް ކުރުމަށް ހަމަޖެހިފައިވަނީ ސައުދީ އެއާލައިންގެ ފްލައިޓްގަ އެވެ.

މިއަހަރުގެ ޙައްޖުގެ އަޅުކަމަށް ރާއްޖެއިން ދާ ޙައްޖާޖީންނަށް ފޯރުކޮށްދޭ ހިދުމަތްތަކުގެ ފެންވަރު ރަނގަޅުކުރުމަށްޓަކައި، މޯލްޑިވްސް ޙައްޖު ކޯޕަރޭޝަނުން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން މިނާގެ ޓެންޓުތަކުގެ އިންތިޒާމުތައް މިހާރަށްވުރެ ފުރިހަމަކޮށް، ޙައްޖާޖީންނަށް ބޭނުންވާ އަސާސީ ހިދުމަތްތައް އެންމެ މަތީ ފަންތީގައި ފޯރުކޮށްދިނުގެ މަސައްކަތްތައް އަންނަނީ ކުރަމުންނެވެ. 

ރާއްޖެއިން ޙައްޖަށް މީހުން ގެންދިއުމަށް ކޮންމެ އަހަރަކުވެސް ލިބެނީ 1000 ކޯޓާ އެވެ. ޙައްޖާޖީންނަށް ހިދުމަތްތައް ފޯރުކޮށްދިނުމަށް ދާ ފަރާތްތައްވެސް ދަތުރުކުރަނީ މި ކޯޓާގަ އެވެ.

ޙައްޖުގެ އެންމެ ފަހުގެ ތައްޔާރީތަކަށް، މެއި 4 ވަނަ ދުވަހު ހައްޖު މިޝަންގެ ފަރާތްތައް ފުރުމަށް ހަމަޖެހިފައިވެ އެވެ،