ރާއްޖެ އަށް ސަލާމަތުގެ އައްސޭރިއަކަށް މި ދެވެނީ ރައީސުލްޖުމްހޫރިއްޔާ ޙިކުމްތަތެރިކަމާއި، ވިސްނުންތެރިކަމާއެކީ ކުރެއްވެވި މަސައްކަތްޕުޅުތަކުގެ ސަބަބުން ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާބެހޭ ވުޒާރާގެ ސްޓޭޓް މިނިސްޓަރ އަލްއުސްތާޛު މޫސާ ފަތުޙީ އާދަމް ވިދާޅުވެއްޖެއެވެ.

އެމްއެމް ޓީވީގެ "ބޮޑު ޚަބަރު" ޕްރޮގްރާމް ވާހަކަދައްކަވަމުން މޫސާ ފަތުޙީ ވިދާޅުވީ، އެކަން އެގޮތަށް ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު އަށް ކުރެއްވޭ ގޮތްވީ ޤާނޫނުގެ ވެރިކަން ކުރިއަރުވައި، ދަމަހައްޓައި ޤާނޫނުއަސާސީ ނެގެހެއްޓެވުމަށް އެމަނިކުފާނު ދެއްވާ އަހައްމިއްޔަތުގެ ސަބަބުން ކަމަށެވެ.

މޫސާ ފަތުޙީ ވިދާޅުވީ، މީގެކުރިން އެމްޑީޕީގެ ރައީސް، ކުރީގެ ރައީސުލްޖުމްހޫރިއްޔާ މުޙައްމަދު ނަޝީދު ދެއްކެވި ވާހަކަފުޅެއްގައި ކުރީގެ ރައީސް އިބްރާހިމް މުޙައްމަދު ޞާލިހުގެ ސަރުކާރުން އެންމެ ފަހު ވަގުތު ޓްރާންސިޝަނަލް ޓައިމްގައި ރައްޔިތުންގެ މަޖިލީހަށް ފޮނުއްވި ބަޖެޓަކީ ވައްކަމުގެ ރަސީދެއް ކަމަށް ވިދާޅުވެފައިވާ ކަމަށެވެ. އަދި، އެމްޑީޕީ ސަރުކާރުން އޭރު ފޮނުވި ރަސީދު ގޮސް މިޖެހެނީ މި ދައުލަތް ބަނގުރޫޓުވުމާ ކަމަށާއި، އެކަމަކު އެކަންކަމުން މި ގައުމު ސަލާމަތްކުރައްވާފައިވަނީ އަދުގެ ރައީސުލްޖުމްހޫރިއްޔާ ކަމަށް ވެސް މޫސާ ފަތުޙީ ފާހަގަކުރެއްވެވިއެވެ.

ގައުމު ބަނގުރޫޓުވުމުން ސަލާމަތްވާގޮތްވީ ރައީސް ޑރ. މުޙައްމަދު މުޢިއްޒުގެ ޒަޢާމަތުގައި އެމަނިކުފާނު ސަރުކާރުން ކުރެއްވި ވިސްނުންތެރި މަސައްކަތްޕުޅުގެ ސަބަބުން ކަމަށް ވެސް ސްޓޭޓް މިނިސްޓަރ މޫސާ ފަތުޙީ ވިދާޅުވިއެވެ.

މޫސާ ފަތުޙީ އިތުރަށް ވިދާޅުވީ، ރައީސް ޑރ. މުޙައްމަދު މުޢިއްޒު މި ޒަޢާމަތާ ހަވާލުވިއިރު، ދިވެހިރާއްޖޭގެ އިޤްތިޞާދު އޮތީ ބިނާކުރަންޖެހިފައި ކަމަށާއި، ދައުލަތުގެ މާލީ ކަންކަން ވެސް އޮތީ އަލުން ފަށައިގެން ތަރުތީބު ކުރަންޖެހިފައި ކަމަށެވެ.