މިއަދު ފަތިސް ނަމާދާއެކު ނަޞްރުގެ ދުވަހުގެ އިޙުތިފާލުތައް ރަސްމީކޮށް ފެށިއްޖެއެވެ. މާލޭ ހުކުރު މިސްކިތުގައި އަދާކުރެވުނު ފަތިސް ނަމާދުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި ނައިބު ރައީސްގެ އިތުރުން ކެބިނެޓް މެމްބަރުންނާއި ސިފައިން ބައިވެރިވެ ވަޑައިގެންނެވިއެވެ.

ނަޞްރުގެ ދުވަހަކީ ދިވެހިރާއްޖޭގެ މިނިވަންކަން ހިމާޔަތްކުރުމަށް ކުރެވުނު ހަނގުރާމައިގައި ލިބުނު ކާމިޔާބީ ފާހަގަކުރާ ދުވަހެވެ. މި ދުވަހަކީ ޤައުމީ ފެންވަރުގައި ފާހަގަކުރާ މުހިންމު ދުވަހެކެވެ. 1988 ވަނަ އަހަރުގެ ނޮވެމްބަރ 3 ގައި ރާއްޖެއަށް ކުރިމަތިވި ބަޣާވާތަކީ ދިވެހީންގެ މަދުބަޔަކާއި، ސްރީލަންކާގެ ޓެރަރިސްޓް ޖަމާޢަތަކާ އެކުވެގެން ދިން ނުރައްކާތެރި ޓެރެރިސްޓް ހަމަލާއެކެވެ.3 ނޮވެމްބަރުގެ އުދުވާނީ ޙަމަލާގައި 19 ދިވެހި ދަރީން ޝަހީދުކޮށްލާފައިވެއެވެ.

ހެނދުނު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ނަޞްރުގެ ދުވަހުގެ ސިފައިންގެ މައުރަޒު 2024 ރަސްމީކޮށް ހުޅުއްވައިދެއްވާފައެވެ. މި މައުރަޒުގައި ފެނިގެންދާނީ 1988 ވަނަ އަހަރުގެ ނޮވެންބަރު މަހުގެ 3 ވަނަ ދުވަހު ރާއްޖެއަށް ކުރިމަތިވި އުދުވާނީ ހަމަލާގައި ލިބުނު ގެއްލުންތަކާއި އެދުވަހު ނަޞްރު ހޯދުމަށް ސިފައިން ދެއްކި ހިތްވަރެވެ. އަދި މި މައުރަޒުގެ މައިގަނޑު އެއް ބޭނުމަކީ ނަޞްރުގެ ދުވަހުގެ މަޢުލޫމާތު އަދުގެ ޖީލަށް ބުނެދިނުމެވެ. މި މައުރަޒުން ގާތްގަނޑަކަށް 200 އަށްވުރެ ގިނަ ޑިސްޕްލޭ ފެންނަން ހުންނާނެއެވެ. އެހެން އަހަރުތަކާ ޚިލާފަށް މިއަހަރުގެ މައުރަޒުގައި ފޮޓޯގެ އިތުރުން ނަޞްރުގެ ދުވަހު ބޭނުންކުރެއްވި ބައެއް އަސްލު ހަތިޔާރާއި ބައެއް ތަކެތި އާންމުންނަށް ދައްކާލުމަށް ބަހައްޓާފައިވެއެވެ. ދައްކާލުމަށް ހަމަޖެހިފައިވެއެވެ.

ނަޞްރުގެ ދުވަހުގެ މުނާސަބަތުގައި ދުވަހުގެ ތެރޭގައި އެކި ހަރަކާތްތައް ކުރިއަށްދާނެ ކަމަށް ރައީސް އޮފީހުން މަޢުލޫމާތު ދެއްވާފައިވެއެވެ. މީގެ ތެރޭގައި ސިފައިންގެ ޚާއްޞަ ޕެރޭޑާއި، ޤައުމީ ދިދަ ނެގުމުގެ ރަސްމިއްޔާތު ހިމެނެއެވެ. މި ހަރަކާތްތަކުގައި ސަރުކާރުގެ އިސް ބޭފުޅުންނާއި، ސިފައިންގެ އިސް ވެރިން ބައިވެރިވެ ވަޑައިގަންނަވާނެ ކަމަށް ބެލެވެއެވެ.