ގެދޮރުވެރިކަމާ ބެހޭ ވުޒާރާ އިން ދެންމެ ވިދާޅުވި ގޮތުގައި މިއަދު ހިނގި އަލިފާނުގެ ހާދިސާއާ ގުޅިގެން އެ މިނިސްޓްރީގެ ދެމުން ގެންދާ ޚިދުމަތްތައް ވަނީ ވަގުތީ ގޮތުން މެދުކަނޑާލާފައި. ޚިދުމަތް އަލުން ފަށާނެ ދުވަހެއް އިޢުލާން ކުރާނެ ކަމަށް ވެސް ވިދާޅުވި.

އަލިފާން ރޯވިތާ ހަތަރު ވަރަކަށް ގަޑިއިރު ފަހުން މިހާރު ވަނީ އަލިފާންގަނޑު ކޮންޓްރޯލްކޮށްފައި.

ގެދޮރުވެރިކަމާ ބެހޭ މިނިސްޓްރީން ވިދާޅުވި ގޮތުގައި އަލިފާނުގެ ހާދިސާގެ ސަބަބުން ގެދޮރުވެރިޔާ ސްކީމާ ގުޅޭ އެއްވެސް ލިޔެކިޔުމަކަށް ނުވަތަ މަޢުލޫމާތަކަށް އަސަރެއް ނުކުރާނެ. ސަބަބަކީ އެ ލިޔުންތަކަކީ އެ މިނިސްޓްރީގެ ކްލައުޑް ހޯސްޓިންގައި ޑިޖިޓަލްކޮށް ބަހަލަހައްޓަމުންދާ މަޢުލޫމާތުތަކަށް ވާތީ.

ގެދޮރުވެރިކަމާއި ބިމާ ޢުމްރާނީ ތަރައްޤީއާ ބެހޭ ވުޒާރާ އިން ވިދާޅުވި ގޮތުގައި އެ މިނިސްޓްރީ އާއި ކޮންސްޓްރަކްޝަން މިނިސްޓްރީ އަދި އެންވަޔަރްމަންޓް މިނިސްޓްރީ ހިންގަމުން އަންނަ ޢިމާރާތުގައި ވެސް ވަނީ ވަރަށް ބޮޑަށް ރޯވެފައި.

އަލިފާނުގެ ހާދިސާގައި މިހާތަނަށް އެއްވެސް މީހަކަށް ގެއްލުމެއް ލިބުނު ކަމުގެ ރިޕޯޓެއް އަދި ލިބިފައެއް ނުވޭ.

ހައުސިންގ މިނިސްޓްރީ އިމާރާތުގައި ރޯވުމާ ގުޅިގެން އިމާރާތުގައި ހުރި ސިޓީ ކައުންސިލްގެ ލޭންޑް އެންޑް ބިލްޑިންގ އަދި ވައިޓަލް ރެޖިސްޓްރޭޝަންގައި ހުރި ލިޔެކިޔުންތަކާއި މުދާތައް ނެރުމުގެ މަސައްކަތް ކުރިއަށް އެބަ ގެންދޭ.

ދުމުގެ އަސަރުކޮށްފައިވާ ސަރަހައްދުތަކަށް އާއްމުން ނުނިކުތުމަށް ހެލްތު ޕްރޮޓެކްޝަން އެޖެންސީ (އެޗްޕީ) އިން ވަނީ އިލްތިމާސްކޮށްފައި.

އަލިފާން ރޯވި ސަރަހައްދުގައި ހުންނަވައި ޑިފެންސް މިނިސްޓަރު ޣައްސާން މައުމޫން މީޑިއާތަކަށް ވިދާޅުވީ ސިފައިންގެ އަތުގައި ހުރި ހުރިހާ ސާމާނެއް ބޭނުންކޮށްގެން، އަލިފާން ނިއްވަން މަސައްކަތްކުރަމުން ދިޔަ ކަމާށާއި އެންމެ ފުރަތަމަ އިސްކަން ދިނީ ކައިރީ ހުރި އިމާރާތްތަކުގައި ތިބި މީހުން ރައްކާތެރި ހިސާބުތަކަށް ގެންދަން ކަމަށް. އެ މަސައްކަތް ނިމުމު އިރު އިމާރާތުގައި ވަރަށް ބޮޑަށް ރޯވެފައިވާ ކަމަށް މިނިސްޓަރު ވިދާޅުވި.

އިމަންޖަންސީ އިވެކުއޭޝަން ސެންޓަަރެއް މި ވަގުތު ވަނީ ސޯޝަލް ސެންޓަރގައި ގާއިމްކޮށްފަ. އެހީތެރިކަން ބޭނުންވާ ފަރާތްތަކުން 115 އަށް ގުޅައިގެން އެހީ ހޯދުމަށް ނުވަތަ އެ ސެންޓަރަށް ދިއުމަށް އެންޑީއެމްއޭއިން އިލްތިމާސްކުރައްވާ.

ހައުސިން މިނިސްޓްރީ ހުންނަނީ މީހުން ވެސް ދިރިއުޅޭ ސަރަޙައްދެއްގައި. އެެހެންކަމުން އަލިފާން ރޯވެފައިވާ އިމާރާތުގެ ވަށައިގެންވާ އިމާރާތްތަކުން މީހުން ހުސްކޮށް ސޯޝަލް ސެންޓަރަށް ބަދަލު ކުރުމުގެ މަސައްކަތް ދިވެހި ރެޑްކްރެސެންޓާއި އެންޑީއެމްއޭ އިން އަންނަނީ ކުރަމުން.

އަލިފާން ކޮންޓްރޯލް ކުރުމުގެ މަސައްކަތުގައި ވެލާނާ އެއާޕޯޓުގެ ފަޔާ އެންޑް ރެސްކިއު ޓީމުތަކުން ވެސް ބައިވެރިވަމުންދާ ކަމަށް އެމްއެންޑީއެފުން ބުނޭ.