އިރާގުގެ ކުރުދީސްތާނުގައި ހުންނަ އަސްކަރީ މަރުކަޒަށް ވައިގެ ހަމަލާތަކެއް ދީފިއެވެ. 

މިކަން ހާމަކޮށްފައިވަނީ އިރާގުގެ ޑިފެންސް މިނިސްޓްރީން އެކްސްގައި ކުރި ޕޯސްޓެއްގައެވެ.

އެގޮތުން އެ މިނިސްޓްރީން ބުނީ އާބިލްގައި ހުންނަ އިޓަލީގެ މަރުކަޒަކަށް މިސައިލް ހަމަލާތަކެއް އަމާޒުވެފައިވާ ކަމަށެވެ. ނަމަވެސް އެ މިނިސްޓްރީގެ މަސްދަރުތަކުން ފަހުން ބުނެފައިވަނީ އެއީ އަސްކަރީ އުޅަނދެއް ހަލާކުކޮށްލި ޑްރޯނަކުން ލިބުނު ހަމަލާއެއްކަމަށެވެ.

މީގެ އިތުރުން، މި ޑްރޯނަކީ ސީދާ އިޓަލީގެ މަރުކަޒަށް އަމާޒުކޮށް ދިން ހަމަލާއަކަށް ނުވެދާނެކަމަށާއި އޭގެ ބަދަލުގައި މިއީ މިސްރާބު ބަދަލުވެގެން ގޮސް، އެތަނަށް ވެއްޓުުނު ޑްރޯނެއްކަމަށް ބެލުމުގެ ފުރުސަތު އެބައޮތް ކަމަށް މިނިސްޓްރީން ބުނިއެވެ.

އެ ހަމަލާ އައީ ކޮންތާކުން ކަމެއް އަދި އެނގިފައެއް ނުވެއެވެ. އެއާ ރެއިޑް އެލާޓް ނިމިފައިވީ ނަމަވެސް ތަޖުރިބާކާރުން އަދިވެސް ދަނީ އެ ސަރަހައްދު ޗެކްކޮށް ⁠ބަލަހައްޓަމުންނެވެ.