ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމާމެދު އަންނަ އޭޕްރީލުމަހުގެ ހަތަރު ވަނަ ނަގާ ރެފަރެންޑަމްގައި ދުސްތޫރާ ހިލާފު ކަމެއް ނެތް ކަމަށް ސިޓީތަކާއި އިދާރީ ދާއިރާތައް ހިންގުމާއި އާއްމު މަސައްކަތްތަކާ ބެހޭ ވުޒާރާގެ ސްޓޭޓް މިނިސްޓަރު އަލްއުސްތާޒު މޫސާ ފަތުހީ އާދަމް ވިދާޅުވެއްޖެ އެވެ.

ދެ އިންތިހާބުގެ ރެފަރެންޑަމްއަށް ރައްޔިތުން ހޭލުތެރިކުރުމަށް އެމްއެމްޓީވީން ކުރިއަށް ގެންދާ "އާނއެކޭ" ސިލްސިލާގެ ފުރަތަމަ ޕްރޮގްރާމުގައި ބައިވެރިވެވަޑައިގެން ވާހަކަފުޅު ދައްކަވަމުން ފަތުހީ ވިދާޅުވީ ރާއްޖޭގެ ތަރީހަށް ބަލާއިރު ކަންކަމުގައި ރައްޔިތުންގެ ހިޔާލު ހޯދުމަކީ ދުސްތޫރުގައި ކަނޑައެޅިފައި އޮތް މަގެއް ކަމަށެވެ.

ގައުމުގެ ކަންކަން ނިންމުމުގައި ރައްޔިތުންގެ ހިޔާލާއި މަޝްވަރާ ހޯދުމުގެ މަގު ފަހިކޮށް، މިފަދަ ވޯޓެއް ނެގުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ޒައާމަތުގައި ކުރެއްވި އެންމެ މުހިންމު ކަމަކީ ފެންނަ ނުފެންނަ ވޯޓު ނެގުމުގެ ގާނޫނެއް ވުޖޫދުކުރެއްވުން ކަމަށް ފަތުހީ ވިދާޅުވި އެވެ. އެ ގާނޫނު ވުޖޫދުވި ފަހުން އެ ގާނުނު ގޯސްކޮށްފައި ރާއްޖޭގެ އެއްވެސް ސިޔާސީ ބޭފުޅަކު ވާހަކަ ދައްކާފައި ނުވާ ކަމަށް ވިދާޅުވި އެވެ. 

ގާނުނު އަސާސީއަށް އަށް ވަނަ އިސްލާހު ގެނައުމާ ގުޅޭގޮތުން ވާހަކަ ދައްކަވަމުން ފަތުހީ ވިދާޅުވީ މި އިސްލާހާ ވެސް ފާޅުގައި ދެކޮޅު ހައްދަވާ ބޭފުޅަކު ވާދަވެރިންގެ ތެރެއިން ނުފެންނަކަމަށެވެ. މި އިސްލާހުތަކަކީ ޣައިރު ދުސްތޫރީ އިސްލާހުތަކެކޭ ވާދަވެރިން ބުނަނީ ސިޔާސީ މަންފާއެއް ހާސިލުކުރުމަށް އެބޭފުޅުންނަށް ފެންނަ ނަޒަރިއްޔާތުތަކެއް އުފަންކުރުވައިގެން ވަކި މަގުސަދެއް ހާސިލުކުރުމަށް ކަމަށް ފަތުހީ ވިދާޅުވި އެވެ. 

ރާއްޖޭގެ ނިޒާމު އޮތް ގޮތުން ގާނޫނީ ގޮތުން މިކަމާ މެދު އެއްވެސް ކަންބޮޑުވުމެއް އޮތް ނަމަ ދާންޖެހޭ ތަންތަން ވެސް ގާނޫނު އަސާސީގައި ސާފުކޮށް ބަޔާންކޮށްދީފައި ވާކަމަށް ފަތުހީ ވިދާޅުވި އެވެ. ފަތުހީ ވިދާޅުވީ ގާނޫނީ ތަރަހައިގެ ތެރެއިން މައްސަލަތަކަށް ހައްލު ގެންނަން އުޅުމުގެ ބަދަލުގައި ޖަޒުބާތުގައި ޖެހި ފެންނަ ނުފެންނަ ވޯޓު ނެގުމުގެ ބަހުސްގައި ވަކިކޮޅެއް ނަގައިގެން ވަކި ނަތީޖާއެއް ހާސިލުވާނެކަން ރައްޔިތުންނަށް ދެއްކުމަކީ އެންމެ ރަނގަޅު ގޮތެއް ނޫން ކަމަށެވެ.