އެމްޑީޕީއިން ނިކުމެގެން އުޅެނީ ރައްޔިތުންނާ ދެކޮޅަށް ކަމަށް ދެކުނު ފުވައްމުލައް ދާއިރާގެ މެމްބަރު އިބްރާހިމް ޙުޞައިން ވިދާޅުވެއްޖެއެވެ.

އެމްއެމްޓީވީގެ "ރައްޔިތުންގެ ދިފާޢުގައި" ޕްރޮގްރާމްގައި ވާހަކަ ދައްކަވަމުން މެމްބަރު އިބްރާހިމް ހުސައިން ވިދާޅުވީ ރައްޔިތުނަށްޓަކައި އެކުލަވައިލާ ޤާނޫނުތަކުގެ ފޮނި މީރުކަން ފެންނާނީ ޢަދުލު އިންސާފު ޤާއިމްކޮށްގެން ކަމަށާއި އެމްޑީޕީއިން މަސައްކަތް ކުރަމުންދަނީ އެއާ އިދިކޮޅަށް ކަމަށެވެ. އަދި މިހާރު އެމްޑީޕީއިން ޤާނޫނު އަސާސީ ދިފާއު ކުރުމުގެ ނަމުގައި އެ ނިކުންނަނީ އެމީހުން ވެރިކަމުގައި ކުރި ވައްކަންތައް މި ސަރުކާރުން ބައްލަވާފާނެތީ އެކަމާ ބިރުން ކަމަށް މެމްބަރު ސިފަކުރެއްވިއެވެ.

ރައީސުލްޖުމްހުރިއްޔާ ޑރ. މުހައްމަދު މުޢިއްޒު ޤާނޫނު އަސާސީއަށް ގެންނެވި ބަދަލު ތަކަކީ ރައްޔިތުންނަށް ފައިދާވާނެ ގޮތަށް، ރައްޔިތުން ބޭނުންވާ ގޮތަށް، ގެންނެވި އިޞްލާޙު ތަކެއް ކަމަށް އިބްރާހިމް ޙުޞައިން ވިދާޅުވިއެވެ. މިހާރު އެމްޑީޕީއިން މަސައްކަތް ކުރަމުން އެ ގެންދަނީ ރައްޔިތުންނާ މި ސަރުކާރާ ދެމެދު އޮތް ބްރިޖް ކަނޑާލަން ކަމަށް މެމްބަރު ފާހަގަކުރެއްވިއެވެ. އަދި މިއީ ހަމަ ޖެއްސުން ކުރުމުގެ ނިޔަތުގައި ކުރާ ކަމެއް ކަމަށްވެސް މެމްބަރު ސިފަކުރެއްވިއެވެ.

މީގެ އިތުރުން، އެމްޑީޕީއަށް އަދިވެސް ޤާނޫނު އަސާސީއަށް ގެންނަން ޖެހެނީ ކޮން އިޞްލާޙެއްތޯ ބުނެވިފައި ނުވާ ކަމަށް މެމްބަރު ވިދާޅުވިއެވެ.