ރައްޔިތުންނަށް ހިދުމަތްކުރަން ބޭނުންނުވާ ވެރިން ލޯކަލް ކައުންސިލް އިންތިހާބު ދޫކޮށްލާނީ " ބޮޑު ވަރިހަމަ" އަށް ކަމަށް ކޮންގްރެސް ޕާޓީގެ ޕީޖީ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހީމް ފަލާހު ވިދާޅުވެއްޖެ އެވެ. 

ދަ ގްރޭޓަރ އައްޑޫ ވިޝަންގެ ތަފްސީލު ލޯންޗުކުރުމުގެ ރަސްމިއްޔާތުގައި ވާހަކަފުޅުދައްކަވަމުން ފަލާހު ވިދާޅުވީ މާޒީއަށް ބަލާއިރު ލޯކަލް ކައުންސިލް އިންތިހާބު މާ މުހިންމު ކަމަށް ދެކިގެން ސިޔާސީ ބޭފުޅުން ނޫޅުއްވާ ކަމަށެވެ. އެކަން އެހެން ވަނީ ރައްޔިތުންނަށް ހިދުމަތް ކުރުމުގެ ވިސްނުން މާޒީގެ ވެރިކަންތަކުގައި ނުގެންގުޅޭތީ ކަމަށާއި އެހެންނަމަވެސް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވިސްނުން މިކަމުގައި ތަފާތު ކަމަށް ފަލާހު ވިދާޅުވި އެވެ. 

ރައްޔިތުންނަށް ހިދުމަތެއް ކުރުމަށް ބޭނުންވާ ވެރިންނަށް ލޯކަލް ކައުންސިލު އިންތިހާބަކީ "ބޮޑު" އިންތިހާބެއް ކަމަށާއި ސަބަބަކީ ސަރުކާރުން ރަށްރަށުގައި ހިންގާ ތަރައްގީގެ މަޝްރޫއުތަކަށް އެންމެ ބޮޑު އެހީތެރިކަމެއް ލިބޭނީ ކައުންސިލަރުންގެ ފަރާތުން ކަމަށް ވާތީ ކަމަށް މެމްބަރު ވިދާޅުވި އެވެ. 

ސަރުކާރެއް ހިންގުމުގެ އެންމެ މުހިންމު ތިން މަގާމު ރައީސް މުއިއްޒު ފުރުއްވާފައިވާތީ އެކަމުން ތަޖުރިބާ ލިބިގަނެ، މިހާރު އެމަނިކުފާނު ކުރައްވަމުން ގެންދަވާ މަސައްކަތްޕުޅުތަކަކީ ލާމަރުކަޒީ ނިޒާމު ހަރުދަނާ ކުރުމުގެ މަސައްކަތްކަމަށް ފަލާހު ވިދާޅުވި އެވެ. 

ކުރިއަށް އޮތް ކައުންސިލް އިންތިހާބު ރައީސް މުއިއްޒަށް މުހިންމު ވަނީ އެމަނިކުފާނު ވައުދުވަޑައިގެންފައި ވާގޮތަށް މުޅި ރާއްޖޭގެ ތަރައްގީގެ ދުވެލި ހަލުއި ކުރުމަށް ކަމަށް ވިދާޅުވި އެވެ. 

ޕީއެންސީގެ ޓިކެޓުގައި އައްޑޫ ސީޓީއަށް ކުރިމަތިލައްވާފައިވާ ކެންޑިޑޭޓުންގެ ފުރިހަމަ ތަސައްވުރެއް އެބައޮތް ކަމަށް ވިދާޅުވެ ފަލާހު ވަނީ ސިޓީއެއްގެ ރައްޔިތުންތަކެއް މާލެއަށް ޒިޔާރަތްކޮށް ޕީއެންސީން ރޭ ބޭއްވި ފަދަ ބޮޑު ޖަލްސާއެއް އަދި މިހާތަނަށް ރާއްޖޭގެ ތާރީހުގައި ބާއްވާފައި ނުވާކަމަށް ވިދާޅުވެފަ އެވެ.

އެހެންކަމުން މި ބޮޑު ޖަލްސާ މިގޮަތަށް ބާއްވައިދިން ކަމަށްޓަކައި ފަލާހު ވަނީ ރައީސްގެ ނަންފުޅުގައާއި، ޕާޓީގެ ނަމުގައި އައްޑޫ ރައްޔިތުންނަށް ޝުކުރު އަދާކުރައްވާފަ އެވެ.