ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއް ދުވަހެއްގައި ބޭއްވުމަކީ ރާއްޖޭގެ ސިޔާސީ މައިދާނުގައި ހަރަކާތްތެރިވާ ހުރިހާ ސިޔާސީ ބޭފުޅުން އިއްތިފާގުވެވަޑައިގެންފައިވާ ކަމެއްކަމަށް ކޮންގްރެސް ޕާޓީގެ ޕީޖީ ލީޑަރު އަދި  އިނގުރައިދޫ ދާއިރާގެ މެމްބަރު އިބްރާހީމް ފަލާހު ވިދާޅުވެއްޖެ އެވެ. 

ފަލާހު މިފަދައިން ވިދާޅުވީ ދަ ގްރޭޓަރ އައްޑޫ ވިޝަންގެ ތަފްސީލު ލޯންޗުކުރުމަށް ރޭ އާޓިފިޝަލް ބީޗުގައި ބޭއްވި  ރަސްމިއްޔާތުގައި ވާހަކަދައްކަވަމުން ނެވެ. 

ފަލާހު ވިދާޅުވީ މައި ދެ އިންތިހާބު އެއް ދުވަހެއްގައި ބޭއްވުމުގެ މައްސަލަ ކުރިއަށް އޮތް ލޯކަލް ކައުންސިލް އިންތިހާބަށް ވުރެ ވާދަވެރިންނަށް މުހިންމުވެފައި ވާކަމަށެވެ.

ފަލާހު ވަނީ ދެ އިންތިހާބު އެއް ދުވަހެއްގައި ބޭއްވުމަށް ކުރިން އެމްޑީޕީން ތާއީދުކޮށްފައިވާކަން ހާމަކުރައްވައި، މިހާރު އެކަމާ ދެކޮޅު ހަދަނީ ސިޔާސީ މަންފާއެއް ހާސިލުކުރުމަށްކަމަށް ވިދާޅުވެފަ އެވެ. 

ދެ އިންތިހާބު އެއް ދުވަހެއްގައި ބޭއްވުމުގެ އެންމެ ބޮޑު ފައިދާއަކީ ގައުމަށް ލިބިގެންދާ ހަމަޖެހުންކަން ފާހަގަކުރައްވައި ފަތުރުވެރިކަމުގެ ސިނާއަތަށް މުޅިންހެން ބަރޯސާވެފައިވާ ކުޑަކުޑަ ގައުމެއްގައި ހަމަޖެހުން ގާއިމުވެފައި އޮތުމަކީ އިގްތިސާދީ ދުވެލި ހަރުދަނާ ކުރުމަށް އެޅިގެންދާ މުހިންމު ފިޔަވަޅެއްކަން ފަލާހު ފާހަގަކުރެއްވި އެވެ. 

ދެ އިންތިހާބު އެއްދުވަހެއްގައި ބާއްވަނީ ރައްޔިތުންގެ ކައިރިއަށް ދިއުން މަދުކުރަން ކަމަށް ބުނެ ދެކެވޭ ވާހަކަތަކަށް ރައްދު ދެއްވައި ފަލާހު ވިދާޅުވީ އެ ވާހަކަތަކަކީ ކަނޑައެޅިގެން ދޮގެއް ކަމަށެވެ. 

ބާރަ ވަރަކަށް ރައްޔިތުންގެ މަޖިލީހުގެ މެމްބަރުންގެ ހަ މަސް ދުވަހުގެ މުސާރައަށް ވުރެ ދައުލަތުގެ ބަޖެޓުން ކޮންމެ އަހަރަކު ސަލާމަތްވާ އަށް ސަތޭކަ މިލިއަން ރުފިޔާ ރައްޔިތުންނަށް މުހިންމު ކަމަށް ވެސް ފަލާހު ވިދާޅުވި އެވެ. 

އަދި ދެ އިންތިހާބު އެއް ދުވަހެއްގައި ބޭއްވުމުން ކޮންގްރެސް ޕާޓީއަށް ލިބޭނެ މޮޅެއް ނޯންނާނެ ކަމަށާއި މިއީ ގައުމާއި ރައްޔިތުންނަށްޓަކައި ގެނެސްފައިވާ ބަދަލެއް ކަމަށް ފަލާހު ވިދާޅުވި އެވެ. 

ފަލާހު ވަނީ ދެ އިންތިހާބުގެ ރެފަރެންޑަމްއާ ގުޅޭގޮތުން ވާދަވެރިން ދައްކާ ދޮގު ވާހަކަތައް ގަބޫލުނުކޮށް ޕީއެންސީގެ ސްޓޭންޑާ އެއްގޮތަށް ކުރިއަށް އޮތް ވޯޓުގައި ހެޔޮ ފާހަގަ ޖަހައި "އާނއެކޭ" ބުނުމަށް ރައްޔިތުންނަށް އިލްތިމާސްކުރައްވާފަ އެވެ.