ރަށްރަށުގައި ތިބޭ ކައުންސިލަރުންނަކީ ސަރުކާރު ޖަވާބުދާރީ ކުރުވަން ވެސް އަދި އެބޭފުޅުން ނިސްބަތްވާ ޕާޓީގެ ހިޔާލުތަކާއި ފިކުރުތައް ކުރިއަރުވަން ވެސް ތިބޭ ބައެއް ނޫން ކަމަށް ހދ. ވައިކަރަދޫ ކައުންސިލް މެމްބަރު ކަމަށް ވާދަކުރައްވާ ޕީއެންސީގެ ކެންޑިޑޭޓް ހުދާ މުހައްމަދު ވިދާޅުވެއްޖެ އެވެ. 

ކޮންގްރެސް ޕާޓީގެ ހދ. އަތޮޅު މާލޭ ޖަގަހަ ހުޅުވުމަށް ބޭއްވި ހަފްލާގައި ވާހަކަދައްކަވަމުން ހުދާ ވިދާޅުވީ ރައްޔިތުންނަށް ތަރައްގީ ގެނެސްދިނުމަށް ސަރުކާރުން ކުރާ މަސައްކަތްތަކަށް އެއްބާރުލުން ދޭންޖެހޭ ކަމަށެވެ. 

ރައްޔިތުން އެދޭ ގޮތަށް ރަށްރަށް ތަރައްގީ ކުރުމަށް ސަރުކާރުގެ މަޝްވަރާގެ މަތިން އެކުލަވާލާ ބިނާވެހި ޕްލޭން ފުރިހަމައަށް ތަންފީޒުވެގެންދާނީ ސަރުކާރާ ގުޅިގެން ކަމަށް ހުދާ ވިދާޅުވި އެވެ. 

ކައުންސިލުތަކަކީ ސިޔާސީ ވާދަވެރިންގެ ގޮތުގައި ހޮވިގެންވާނެ ބައެއް ނޫންކަމަށް ވެސް ހުދާ ވިދާޅުވި އެވެ.

އެމްޑީޕީއަކީ ތަރައްގީގެ ފިކުރުކަމަށް ކިތަންމެ ވަރަކަށް ދައްކަން އުޅުނަސް ހަގީގަތުގައި ފެނިގެންދަނީ ފަނާކުރަނިވި ވިސްނުމުގައި މަސައްކަތް ކުރަމުންދާ މަންޒަރުކަމަށް ހުދާ ވިދާޅުވި އެވެ. 

އެހެންކަމުން މިފަހަރު މިއީ އެމްޑީޕީގެ ފަނާކުރަނިވި ވިސްނުމާ ދެކޮޅަށް ނުކުން ފަހަރުކަން ފާހަގަކުރައްވައި ހުދާ ވިދާޅުވީ މިފަހަރަކީ ތަރައްގީގެ ފަހަރުކަމަށެވެ.