ކުރިއަށް އޮތް ކައުންސިލު އިންތިހާބުގައި އިދިކޮޅު އެމްޑީޕީގެ ކެންޑިޑޭޓުންނަށް ޖާގަ ދިން ނަމަވެސް ތަރައްގީއަށް ހުރަސް ނޭޅޭނެކަމަށް ބުނެ އިދިކޮޅު ފަރާތްތަކުން ދައްކަމުން އަންނަ ވާހަކަތަކަށް ނާއިބު ރައީސް އަލްއުސްތާޒު ހުސައިން މުހައްމަދު ލަތީފު ރައްދު ދެއްވައިފި އެވެ. 

ކޮންގްރެސް ޕާޓީގެ ހދ. އަތޮޅު މާލޭ ޖަގަހަ ހުޅުވުމަށް މިރޭ ބޭއްވި ހަފްލާގައި ވާހަކަފުޅުދައްކަވަމުން ނާއިބު ރައީސް ވިދާޅުވީ ރަށްރަށުގައި އޮންނަ ކައުންސިލުތައް ވެގެންދާންޖެހޭނީ އޭރަކު އޮންނަ ސަރުކާރަކާ ގުޅިގެން މަސައްކަތް ކުރަން ދަންނަ ބަޔަކަށް ކަމަށެވެ. 

ވާދަވެރިން މިއަދު އުފައްދާ ސުވާލަކީ އެމީހުންނަށް ކައުންސިލު ގޮނޑިތައް ލިބުނުނަމަވެސް ސަރުކާރުގެ ތަރައްގީއަށް ހުރަސް ނޭޅޭނެ ކަމުގެ ވާހަކަތައް ކަމަށް ވިދާޅުވެ، ނާއިބު ރައީސް ވަނީ މިހާރު ސަރުކާރަށް އެއްބާރުލުން ދެންތޯ އިދިކޮޅު ފަރާތްތަކާ ސުވާލު ކުރައްވާފަ އެވެ. 

މާޒީއަށް ބަލާއިރު ވާދަވެރިން އަބަދުވެސް ކަންތައް ކުރަމުން އައިސްފައިވަނީ އެގޮަތަށް ކަމަށް ނާއިބު ރައީސް ވިދާޅުވި އެވެ. 

އިދިކޮޅު ފަރާތްތަކުގެ އަމަލާއި ބަސް ދިމާނުވާކަމަށާއި އެންމެ ފުރަތަމަ އިންތިހާބުތައް އެއްކޮށްލުމަށް ގޮވާލުމަށް ފަހު މިއަދު އެކަމާ ދެކޮޅު ހެދުން އެއީ އަމަލާއި ބަސް ދިމާ ނުވާކަމުގެ ހެއްކެެއް ކަމަށް ވިދާޅުވި އެވެ. 

ނާއިބު ރައީސް ވަނީ ރަށަށް މޮޅު ގޮތް ހޯދައިދޭން އެދޭނަމަ ކޮންގްރެސް ޕާޓީއަށް ވޯޓު ދިނުމަށް ރައްޔިތުންގެ ކިބައިން އެދިވަޑައިގެންފަ އެވެ.