އެފްއޭ ކަޕް ފުޓްބޯޅަ މުބާރާތުގެ ގުރުނެގުން ބާއްވައި، އަންނަ އޭޕްރީލް މަހުގެ 10 ވަނަ ދުވަހު ފަށަން ނިންމައިފިއެވެ.

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އިއްޔެ ގުރުއަތުލުން ބާއްވާފައިވާއިރު، މި ފަހަރުގެ މުބާރާތުގައި ފުރަތަމަ ޑިވިޝަނުން ވާދަކުރަނީ ހަތް ޓީމެކެވެ. 

އެގޮތުން، އެފްއޭ ކަޕްގެ މިއަހަރުގެ މުބާރާތުގައި ފުރަތަމަ ޑިވިޝަނުން ވާދަކުރާ ޓީމުތަކަކީ؛ ނިއު ރޭޑިއަންޓް ސްޕޯޓްސް ކްލަބާއި، އޮޑި ސްޕޯޓްސް ކްލަބުގެ އިތުރުން މާޒިޔާ ސްޕޯޓްސް އެންޑް ރެކްރިއޭޝަން، ކްލަބް އީގަލްސް، ވިކްޓްރީ ސްޕޯޓްސް ކްލަބް، ޓީސީ ސްޕޯޓްސް ކްލަބާއި، ބުރު ސްޕޯޓްސް ކްލަބެވެ. މި މުބާރާތުގައި ދެން ވާދަކުރަނީ ބްލޫސް ސްޕޯޓްސް ކްލަބެވެ.

ކުއާޓާ ފައިނަލާ ހިސާބުން ކުރިއަށްގެންދިއުމަށް ހަމަޖެހިފައިވާ މި ފަހަރުގެ މުބާރާތުގައި ފުރަތަމަ ދުވަހު (އޭޕްރީލް 10) ގައި ކުޅުމަށް ތާވަލުކުރެވިފައިވާ މެޗުތަކަށް ބަލާއިރު، ފުރަތަމަ މެޗުގައި އީގަލްސް ނިކުންނާނީ ބްލޫސް ސްޕޯޓްސް ކްލަބާ ދެކޮޅަށެވެ. ދެވަނަ މެޗުގައި ޕްރެޒިޑެންޓްސް ކަޕްގެ އެންމެ ފަހުގެ ޗެމްޕިއަން، އޮޑި ބައްދަލުކުރާނީ މުބާރާތުގެ އެންމެ ކާމިޔާބު ޓީމު ކަމަށްވާ، ނިއުއާ އެވެ. 

މުބާރާތުގެ ކުއާޓާ ފައިނަލުގެ އިތުރު މެޗުތަކަށް ބަލާއިރު، ތިންވަނަ މެޗުގައި ވިކްޓްރީއާއި ޓީސީ ބައްދަލުކުރުމަށް ހަމަޖެހިފައިވާއިރު، ފަހު މެޗުގައި މާޒިޔާ ނިކުންނާނީ ބުރު ސްޕޯޓްސް ކްލަބާ ދެކޮޅަށެވެ. މި ދެ މެޗުވެސް ކުޅުމަށް ހަމަޖެހިފައިވަނީ އޭޕްރީލް މަހުގެ 11 ގައެވެ.

އެއަށްފަހު މުބާރާތުގެ ސެމީ ފައިނަލުގެ މެޗުތައް އޭޕްރީލް 15 ގައި ކުޅުމަށް ހަމަޖެހިފައިވާއިރު، ފައިނަލް މެޗު އޮންނާނީ އޭޕްރީލް މަހުގެ 18 ގައެވެ.

އެންމެ ފަހުން އެފްއޭ ކަޕް ބޭއްވީ 2022 ވަނަ އަހަރު އެވެ. އެ ފަހަރުގެ މުބާރާތުގެ ޗެމްޕިއަންކަން މާޒިޔާ އިން ހޯދީ ފައިނަލުގައި ކްލަބް ވެލެންސިއާ ބަލިކޮށްގެންނެވެ. އޭގެކުރީން ބޭއްވީ 2017 ވަނަ އަހަރުގެ ޗެމްޕިއަނުންނަކީ ނިއު އެވެ.