ކުރިއަށް އޮތް ލޯކަލް ކައުންސިލް އިންތިޚާބުގައި ކޮންގްރެސް ޕާޓީގެ ފަރާތުން 1325 ކެންޑިޑޭޓުން ވާދަކުރާއިރު މީގެ ތެރެއިން 853 ކެންޑިޑޭޓުންނަކީ އަންހެނުން ކަމަށް އެޕާޓީގެ ވިމެންސް ވިންގުގެ މެމްބަރު އައިމިނަތު ހުސެއިން ޝަރީފް ވިދާޅުވެއްޖެއެވެ. 

އެމްއެމްޓީވީގެ ދިވެހީންގެ ރާއްޖެ ޕްރޮގްރާމުގައި ބައިވެރިވެވަޑައިގެން ކޮންގްރެސް ޕާޓީއިން ލޯކަލް ކައުންސިލް އިންތިޚާބަށް ވަމުންދާ ތައްޔާރީތައް ހިއްސާކުރައްވަމުން އައިމިނަތު ވަނީ އަންހެނުން ބާރުވެރިކުރުވުމަކީ އަބަދުވެސް އެޕާޓީގެ މައިގަނޑު މަގުސަދެއްކަން ފާހަގަކުރައްވާފައެވެ. 

މިގޮތުން އެޕާޓީއިން އިންތިޚާބުގައި ވާދަކުރާ ކެންޑިޑޭޓުންގެ ތެރެއިން ބޮޑު ބައެއް އަންހެނުން ހިއްސާކުރާއިރު މިކަމުން އެޕާޓީއިން އަންހެނުން ސިޔާސީ މައިދާނުގެ ބޮޑެތި މަގާމުތަކަށް ނެރެން ކުރާ މަސައްކަތް ފެނިގެންދާކަމަށް އައިމިނަތު ވިދާޅުވިއެވެ. މި ކަނބަލުންނަކީ ވަރަށް ގާބިލު އަދި ތަޖުރިބާއާއެކު ނިކުންނަ ބައެއްކަމަށާއި، އެ ޕާޓީގެ އަމާޒަކީ ޕާޓީގެ ކަންކަމުގެ އެންމެ އިސް ސަފުގައި ބައިވެރިވާނެ އަންހެނުންގެ އަދަދު އިތުރުކުރުން ކަމަށް ވިދާޅުވިއެވެ. 

މީގެ އިތުރުން ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން ޕީއެންސީ ވިމެންސް ވިންގުގެ މެމްބަރު ޒީނާޒް އަދުނާން ވިދާޅުވީ މިއަހަރުގެ ލޯކަލް ކައުންސިލް އިންތިޚާބުގައި ޕީއެންސީއިން ނިކުންނަ އަންހެނުންގެ އަދަދު ބޮޑުތަނުން އިތުރުވެފައިވާއިރު، މިއިން ދައްކުވައިދެނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަންހެނުން ސިޔާސީ މައިދާނަށް ނެރުއްވުމަށް ކުރައްވާ މަސައްކަތްފުޅުކަމަށެވެ.

މީގެ އިތުރުން ޒީނާޒް ވަނީ ޕީއެންސީއަކީ އަބަދުވެސް ފުޅާދާއިރާއެއްގައި އަންހެނުން ހަރަކާތްތެރިވާ ޕާޓީއެއްކަން ފާހަގަކުރައްވާފައެވެ.